၂၀၂၀ ပြည့်နှစ်အတွင်းမှာ စာအုပ်ကောင်းအများအပြား ထွက်ရှိလာခဲ့ပါတယ်။
Ye Yint Htay

၂၀၂၀ခုနှစ်ရဲ့ အချိန်အတော်များများကို ကိုဗစ်-၁၉ကပ်ရောဂါကြောင့် အိမ်ထဲမှာပဲကုန်ဆုံးခဲ့ရတဲ့အတွက် ကာလအတန်ကြာမလုပ်ဖြစ်တဲ့ စာဖတ်တဲ့အလုပ်ကို ပြန်လုပ်လာကြပါတယ်။ ဒီကာလမှာ စာအုပ်ကောင်းတွေအတော်များများလည်းထွက်ရှိခဲ့ပြီး အောင်မြင်ကျော်ကြားခဲ့တဲ့ ရုပ်ပြကာတွန်းတွေကို ပြန်လည်စုစည်းထုတ်ဝေမှုတွေလည်းရှိခဲ့သလို အားပေးဝယ်ယူမှုတွေလည်းရှိခဲ့ပါတယ်။ “ငါတို့စာပေ” စာအုပ်တိုက်နဲ့ “City Books and Music ” စာအုပ်ဆိုင်တွေမှာ ယခုနှစ်အတွင်း ရောင်းအားအကောင်းဆုံး ဖြစ်ခဲ့တဲ့ စာအုပ်တချို့ကို ပြန်လည်ဖော်ပြပေးလိုက်ပါတယ်။ 

(၁) The Guys of Rangoon, 1930

ကိုဗစ်ကာလအတွင်းအိမ်တွင်းအောင်းနေချိန်မှာ အပျင်းပြေဖတ်ရှုနိုင်ဖို့အတွက် စာရေးဆရာခက်ဇော်က ကိုလိုနီခေတ်နာမည်ကျော် မြန်မာ့လူမိုက်ကြီး လမ်းမတော်ဖိုးတုတ်ရဲ့ဘဝဇာတ်ကြောင်းကို The Guys of Rangoon,1930 အမည်နဲ့အခန်းဆက်ရေးသားဖော်ပြခဲ့ရာမှာ ပရိသတ်တွေအထူးတလည်အားပေးမှုခံခဲ့ရပါတယ်။ အဲ့ဒီနောက်မှာတော့ ငါတို့စာပေ(NDSP) စာအုပ်တိုက်ကနေ မေလဒုတိယအပတ်အတွင်းမှာ စာအုပ်အဖြစ်ပုံနှိပ်ဖြန့်ချိခဲ့တာပါ။ အွန်လိုင်းမှာ ပရိသတ်အားပေးမှုရခဲ့သလို ၂၀၂၀ အတွင်း “ငါတို့စာပေ”စာတိုက်တိုက်ထုတ် စာအုပ်တွေထဲမှာ နံပတ်-၁ ရောင်းအားအကောင်းဆုံး စာအုပ်ဖြစ်ခဲ့ပါတယ်။ 


(၂)မအေးပွင့်၊ မြင့်မြင့်စန်း၊လမ်းသုံးဆယ် 

၁၉၇၇ခုနှစ်ကရေးသားထုတ်ဝေခဲ့ပြီး ရုပ်ရှင်ဇာတ်လမ်းအဖြစ် နှစ်ကြိမ်တိုင်ရိုက်ကူးပြသခဲ့တဲ့ မအေးပွင့်၊မြင့်မြင့်စန်း၊လမ်းသုံးဆယ် ဆိုတဲ့ လျှို့ဝှက်သည်းဖိုအချစ်အက်ရှင်ဝတ္ထုကြီးကို ငါတို့စာပေ(NDSP) က ပြန်လည်ထုတ်ဝေခဲ့ရာမှာ လူကြိုက်များတဲ့စာအုပ်တစ်အုပ်ဖြစ်ခဲ့ပါတယ်။ စာရေးဆရာဆွေလှိုင်ဦးရဲ့ထင်ရှားကျော်ကြားတဲ့ ဝတ္ထုဇာတ်လမ်းဖြစ်ပြီး သူ့ခေတ်သူ့အခါက ရုပ်ပြအနေနဲ့ရော ရုပ်ရှင်ဇတ်လမ်းအနေနဲ့ပါ လျှမ်းလျှမ်းတောက်ထင်ရှားကျော်ကြားခဲ့တာပါ။ ဒီ ဝတ္ထုကိုတော့ စွန့်စားခန်းတွေကိုစိတ်ဝင်စားတဲ့ဒီနေ့ခေတ်လူငယ်တွေပြန်လည်စိတ်ဝင်စားခဲ့ပြီး ၂၀၂၀ရဲ့လူကြိုက်များပြီးရောင်းအားကောင်းတဲ့စာအုပ်စာရင်းထဲပါဝင်ခဲ့ပါတယ်။ 

(၃) မြန်မာ့နိုင်ငံရေးပြုပြင်ပြောင်းလဲမှုများနှင့် လက်လွတ်ဆုံးရှုံးခဲ့ရသော အခွင့်အလမ်းများ(၂၀၁၀-၂၀၁၆)

ဦးသိန်းစိန်အစိုးရလက်ထက်မှာ ပြန်ကြားရေးဝန်ကြီးအဖြစ်တာဝန်ထမ်းဆောင်ခဲ့တဲ့ ဦးရဲထွဋ်ရေးသားတဲ့  Myanmar’s Political Transition and Lost Opportunities ( 2010-2016) စာအုပ်ကို စာရေးဆရာ သက်ဆွေက ဘာသာပြန်ရေးသားထုတ်ဝေတဲ့  မြန်မာ့နိုင်ငံရေးပြုပြင်ပြောင်းလဲမှုများနှင့် လက်လွတ်ဆုံးရှုံးခဲ့ရသော အခွင့်အလမ်းများ(၂၀၁၀-၂၀၁၆) စာအုပ်က နိုင်ငံရေးလောကမှာတော့ အတော်လေးထင်ရှားလူသိများခဲ့ပါတယ်။ ဒီစာအုပ်မှာ အခန်းပေါင်း၉ခန်းပါဝင်ပါတယ်။ သမ္မတ ဦးသိန်းစိန်ခေါင်းဆောင်တဲ့ ပြည်ထောင်စု ကြံ့ခိုင်ရေးနှင့်ဖွံဖြိုးရေးပါတီ အစိုးရလက်ထက် နိုင်ငံရေးပြုပြင်ပြောင်းလဲမှုများ၊အဆိုပါနိုင်ငံရေးပြုပြင်ပြောင်းလဲမှုကြောင့် ဖြစ်ပေါ်လာတဲ့ပုဂ္ဂိုလ်ရေးအားပြိုင်မှုများ၊ နိုင်ငံရေးအားပြိုင်မှုများနဲ့ ပဋိပက္ခများကြောင့် နိုင်ငံနဲ့လူမျိုး တိုးတက်ရေးအတွက်လက်လွတ်ဆုံးရှုံးခဲ့ရသော အခွင့်အလမ်းများအကြောင်းကို ရေးသားဖော်ပြထားပါတယ်။ မြန်မာ့နိုင်ငံရေးလေ့လာသုံးသပ်သူတွေနဲ့ နိုင်ငံရေးကိုစတင်လေ့လာသူတွေအတွက် စာအုပ်ကောင်းတစ်အုပ်ဖြစ်တယ်လို့ သုံးသပ်ခဲ့ကြပြီး ၂၀၂၀မှာ ထင်ရှားတဲ့စာအုပ်တစ်အုပ်ဖြစ်ခဲ့ပါတယ်။ 


(၄) ဖြစ်တည်ခြင်း

ငါတို့စာပေ(NDSP) ကထုတ်ဝေတဲ့နောက်ထပ်စာအုပ်ကောင်းတစ်အုပ်ပါ။ အမေရိကန်သမ္မတဟောင်း အိုဘားမားရဲ့ဇနီးသည် မီရှယ်အိုးဘားမားကိုယ်တိုင်ရေးသားတဲ့ အတ္ထုပ္ပတ္တိ / ကိုယ်တွေ့မှတ်တမ်း Becoming ကို ဘာသာပြန်ရေးသားထုတ်ဝေတာပါ။ စာရေးဆရာဝင်းငြိမ်းရဲ့ဘာသာပြန်အရည်အသွေးနဲ့ သေသပ်လှပတဲ့စကားလုံးဖွဲ့နွဲ့ပုံတွေက ဒီစာအုပ်ကိုလူစိတ်ဝင်စားအောင်စွမ်းဆောင်နိုင်ခဲ့ပါတယ်။ စာအုပ်ခေါင်းစဉ်ကို မြန်မာလိုပြန်ပေးထားတဲ့ ဖြစ်တည်ခြင်းဆိုတဲ့စကားလုံးကလှပလွန်းပြီး အိုဘားမားဇနီးမောင်နှံရဲ့အိမ်ထောင်ကျကာစအခြေအနေကနေ သမ္မတဖြစ်ချိန်အထိ ဘဝခရီးလျှောက်လှမ်းခဲ့ပုံတွေအပြင် သမ္မတဒေါ်နယ်ထရန့်အပေါ်အမြင်တွေကိုပါဖော်ပြထားပါတယ်။ ၂၀၂၀ရဲ့စာအုပ်စင်တွေအပေါ်မှာ နေရာယူနိုင်ခဲ့တဲ့ ဘာသာပြန်စာအုပ်ကောင်းတစ်အုပ်ပါ။ 

(၅)ကိုယ်တိုင်သိရှိသွားမှု 

သရုပ်ဆောင်မင်းသား ဇာဏ်ခီရဲ့ကိုယ်တိုင်သိရှိသွားမှု အမည်ရစာအုပ်က သူ့ပရိသတ်တွေသာမကဘဲ ဗုဒ္ဓဘာသာဝင်တွေအတွက်တွေးစရာစာစုလေးတွေအဖြစ် အသိအမှတ်ပြုခဲ့ရတဲ့စာအုပ်ကောင်းတစ်အုပ်ပါ။ ဇလပ်နီစာပေကထုတ်ဝေခဲ့တာဖြစ်ပြီး အတွေးအေးအေးလေးနဲ့အတူ သူ့အယူအဆ ယုံကြည်ရာကို အစွန်းတဖက် မရောက်စေဘဲ နည်းလမ်းတကျမျှတမှန်ကန်တဲ့ အယူအဆ၊ တခြားသူတွေ တွေးတောဆင်ခြင် လက်ခံနိုင်အောင် ထက်မြက်တဲ့ အတွေးအခေါ်၊ထူးခြားတဲ့ ရေးဟန်လေးတွေနဲ့ အက်ဆေးစာစုလေး ၁၉ပုဒ်ကို စုစည်းတင်ဆက်ထားပါတယ်။

(၆) ကျောက်စိမ်းမြေ (အိန္ဒိယမှ မြန်မာပြည် မြောက်ပိုင်းကို ဖြတ်၍ တရုတ်ပြည်သို့ ခရီးကြမ်း)

မြန်မာ့နိုင်ငံရေးကို အစဉ်တစိုက်လေ့လာခဲ့ပြီးတစိုက်မတ်မတ်ရေးသားဖော်ထုတ်မှုတွေလုပ်ခဲ့တဲ့ ဆွီဒင်လူမျိုးသတင်းထောင် ဘာတေးလ်လင့်တနာရဲ့ခြေလျင်ခရီးကြမ်းအကြောင်းရေးဖွဲ့ထားတဲ့စာအုပ်ပါ။ ဇနီး ဆိုင်နောင့်လင့်တနာနဲ့ လသားအရွယ် သမီးလေးဆိုင်တိုင်းတို့ အိန္ဒိယပြည်မှ မြန်မာပြည်မြောက်ပိုင်းကို ဖြတ်ပြီးတရုတ်ပြည်ကိုသွားရောက်ခဲ့တဲ့ ခြေလျင်ခရီးကြမ်းကို ကမ္ဘာကသိအောင် ရေးဖွဲ့ထားတာပါ။ စာရေးဆရာနိုင်ဦးက ဘာသာပြန်ရေးသားထားပြီး လွင်ဦးစာပေ(လှည်းတန်း)က တတိယအကြိမ်မြောက် ထုတ်ဝေပါတယ်။ ခရီးကြမ်းကာလအတွင်း တိုင်းရင်းသားလက်နက်ကိုင်အဖွဲ့အစည်းတွေဖြစ်တဲ့ နာဂအမျိုးသား ဆိုရှယ်လစ်ကောင်စီ (NSCN)၊ကချင် (KIA)၊ရှမ်း (SNA)၊ ဗကပ (CPB)တို့ရဲ့ခေါင်းဆောင်တွေနဲ့တွ့ဆုံခဲ့ပြီး  မြန်မာပြည်၏ပြည်တွင်းစစ်အကြောင်းများ၊ မြန်မာ့တပ်မတော်နဲ့ ဗကပတို့ရဲ့နာမည်ကျော်တိုက်ပွဲဖြစ်တဲ့ စီစီဝမ်တာပန်တိုက်ပွဲကို မျက်မြင်ကိုယ်တွေ့အနီးကပ်လေ့လာပြီး ကမ္ဘာကသိအောင် တင်ပြခဲ့တဲ့စာအုပ်ဖြစ်လို့ ၂၀၂၀မှာ နိုင်ငံရေးစိတ်ဝင်စားသူတွေ ကိုစွဲဆောင်နိုင်တဲ့ စာအုပ်ဖြစ်ခဲ့ပါတယ်။ 


(၇) The Guys from Mandalay

The Guys of Rangoon ဖန်တီးရှင်စာရေးဆရာခက်ဇော်ရဲ့ဒုတိမြောက်လက်ရာပါ။ မန္တလေးလူမိုက်ကြီး စိန်ဓားမြှောင်(ခေါ်)မောင်ကလေးရဲ့ဇာတ်လမ်းကိုအခြေတည်ပြီး The Guys of Rangoon ရဲ့အဓိကဇာတ်ကောင်တစ်ဦးဖြစ်ခဲ့တဲ့ လမ်းမတော်ဖိုးတုတ်ရဲ့ညာလက်ရုံးလူမိုက်ကြီး ဂန္ဓမာတို့အဖွဲ့နဲ့ချိတ်ဆက်ရေးသားထားပါတယ်။ The Guys of Rangoon လိုပဲ စာအုပ်မထွက်ခင်မှာ အွန်လိုင်းမှာအခန်းဆက်ရေးသားခဲ့ပြီးလူကြိုက်များခဲ့သလို စာအုပ်ထွက်လာချိန်မှာလည်း ရောင်းအားအကောင်းဆုံး စာအုပ်တစ်အုပ် ဖြစ်ခဲ့ပါတယ်။

(၈) သူခိုး

ဟာသစာရေးဆရာ အကြည်တော်ရဲ့သူခိုးလုံးချင်းဝတ္ထုအသစ်ကလည်း ကိုဗစ်-၁၉ကပ်ရောဂါဂယက်ကြောင့် စိတ်ညစ်နေရချိန်မှာ ပျော်ရွှင်မှုပေးခဲ့တဲ့ ဟာသစာအုပ်အဖြစ် ပရိသတ်လက်ခံခဲ့ကြပါတယ်။ အကြည်တော်ရဲ့ထုံးစံအတိုင်းလှုပ်ရှားမှုအသားပေးဟာသပုံစံကို အဓိကဇာတ်ကောင်အဖြစ် သူခိုးငပိန်ကိုဇာတ်အိမ်တည်ရေးသားထားပါတယ်။ အကြည်တော်ရဲ့ဟာသဝတ္ထုတွေထုံးစံအတိုင်းပဲ ပုံနှိပ်ထုတ်ဝေပြီဆိုတာနဲ့ ဇတ်ကားအဖြစ်ဖန်တီးဖို့အတွက် ဒါရိုက်တာ ကိုပေါက်ကလည်းဝယ်ယူထားပါတယ်။ သူခိုးဝတ္ထုရဲ့ထူးခြားချက်ကအွန်လိုင်းမှာအပိုင်းလေးတွေနဲ့ရေးသားတင်ဆက်ရာကနေ ပရိသတ်နှစ်ခြိုက်တောင်းဆိုမှုကြောင့် စာအုပ်အဖြစ် ပုံနှိပ်ထုတ်ဝေခဲ့တာပါ။ ဒီစာအုပ်ကိုတော့ Wun Zinn Online စာပေကနေ ပထမဆုံးအကြိမ်ထုတ်ဝေခဲ့တာဖြစ်ပါတယ်။ 


မှတ်ချက်။ ။ ယခုစာရင်းထဲတွင် ကြီးပွားတိုးတက်ရေး၊ ဘာသာရေး၊ ကျန်းမာရေး အမျိုးအစား စာအုပ်များ ထည့်သွင်းဖော်ပြထားခြင်း မရှိပါ။ 




Author


က္က