တရုတ်နိုင်ငံက မြန်မာပြည်သူတွေအတွက် ကိုဗစ်-၁၉ ရောဂါကာကွယ်ဆေး အလုံး (၃) သိန်းကို ကူညီပံ့ပိုးပေးသွားမှာဖြစ်တဲ့အပြင် ကိုဗစ်ရောဂါတိုက်ဖျက်ရေးလုပ်ငန်းတွေအတွက်လည်း ယွမ် (၃) သန်း တန်ဖိုးရှိတဲ့ ဆေးပစ္စည်းတွေ ပံ့ပိုးရေးအတွက် ဆွေးနွေးခဲ့ကြတယ်လို့ နိုင်ငံတော်သမ္မတရုံးက သတင်းထုတ်ပြန်ပါတယ်။

Photo- Myanmar President Office

နိုင်ငံတော်သမ္မတ ဦးဝင်းမြင့်နဲ့ တရုတ်နိုင်ငံခြားရေးဝန်ကြီး မစ္စတာဝမ်ယိတို့ တွေ့ဆုံရာမှာ မြန်မာနဲ့ တရုတ်နှစ်နိုင်ငံ ရှိရင်းစွဲ ချစ်ကြည်ရင်းနှီးမှုနှင့် ပူးပေါင်း ဆောင်ရွက်မှုတွေ တိုးမြှင့်သွားရေးနဲ့ နှစ်နိုင်ငံအကြား အေးအတူပူအမျှ အသိုက်အဝန်း ထူထောင်သွားရေးအတွက် နှစ်နိုင်ငံ ဆက်လက်ပူးပေါင်းဆောင်ရွက်သွားရေး တို့ကို ဆွေးနွေးခဲ့ကြတာပါ။

နှစ်နိုင်ငံ ယဉ်ကျေးမှုခရီးသွားနှစ် အကောင်အထည်ဖော်ရေးဆိုင်ရာ ဆောင်ရွက်မှုတွေကို ဆက်လက်လုပ်ဆောင်ရေး၊ နှစ်နိုင်ငံ ပူးပေါင်းဆောင်ရွက်ရေး စီမံကိန်းများ အရှိန်အဟုန်မပြတ် ဆက်လက်အကောင်အထည် ဖော်သွားရေးတို့ကို ပွင့်ပွင့်လင်းလင်းဆွေးနွေးခဲ့ကြတာဖြစ်ပါတယ်။

တရုတ်နိုင်ငံခြားရေးဝန်ကြီး မစ္စတာဝမ်ယိဟာ ဇန်နဝါရီ (၁၁) ရက် မြန်မာနိုင်ငံကို ရောက်ရှိလာခဲ့ပြီး ညနေပိုင်းမှာ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်နဲ့လည်း တွေ့ဆုံခဲ့ပြီး မြန်မာ-တရုတ်နှစ်နိုင်ငံကြား စီးပွားရေးနှင့် နည်းပညာပူူးပေါင်းဆောင်ရွက်ရေး သဘောတူစာချုပ်အပါအဝင် နားလည်မှုစာချွန်လွှာ (၅) ခုကို လက်မှတ်ရေးထိုးခဲ့ကြတယ်လို့သိရပါတယ်။

Photo- Myanmar StateCouncellor Office

နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်က လာမယ့် အစိုးရသက်တမ်းအတွင်း ငြိမ်းချမ်းရေးနှင့် အမျိုးသား ပြန်လည်သင့်မြတ်ရေးတွေကို ဆက်လက်အလေးပေးဆောင်ရွက်မှာဖြစ်ပြီး တရုတ်နိုင်ငံအနေနဲ့လည်း မြန်မာ့ငြိမ်းချမ်းရေးတွေမှာ အပြုသဘောကူညီသွားရေးတွေကို ဆွေးနွေးခဲ့ကြပါတယ်။