ပေါက်ခေါင်းမြို့က အသက် ၁၀ နှစ်အရွယ်ယောကျာ်းလေးတစ်ဦးအပါအဝင် နောက်ထပ် ၃ ဦး Negative နှစ်ကြိမ်ဆက်ပြထားတာကြောင့် မြန်မာနိုင်ငံမှာ ရောဂါပိုးကင်းစင်သူ ၃၁ ဦးရှိလာပြီလို့ ကျန်းမာရေးနှင့်အားကစားဝန်ကြီးဌာနက ဒီနေ့ မေလ ၁ ရက် ည ၈နာရီမှာ သတင်းထုတ်ပြန်ပါတယ်။

ဒီနေ့မှာပဲ ပိုးကင်းစင်ထားသူ (၁၀) ဦးကိုလည်း ဆေးရုံကဆင်းခွင့်ပြုလိုက်ရာမှာ တရားဟောဆရာဒေးဗစ်လား၊ အသက် ၆၀ အရွယ် ဧည့်လမ်းညွှန်အမျိုးသမီးတို့လည်း ပါဝင်ခဲ့ပါတယ်။ ဆေးရုံက ဆင်းခွင့်ပြုထားသူ ( ၁၀) ဦးမှာ လူနာအမှတ် ၂၊ ၆၊ ၃၂၊ ၃၃၊ ၃၈၊ ၄၁၊ ၄၇၊ ၅၀၊ ၅၄ နဲ့ ၅၈ တို့ဖြစ်ပါတယ်။ လက်ရှိအချိန်ထိ ဆေးရုံဆင်းခွင့်ရရှိသူမှာ စုစုပေါင်း ၂၇ ဦးအထိ ရှိနေပြီး သူတို့ကို တော့သတ်မှတ်နေရာမှာ အသွားအလာကန့်သတ်စောင့်ကြည့်ထားဆဲဖြစ်ပါတယ်။

ဒါ့အပြင် ဒီနေ့ ည ၈နာရီထုတ်ပြန်ချက်အရ မေလ ၁ ရက်နေ့အတွက် ဓာတ်ခွဲနမူနာ စုစုပေါင်း ၁၉၆ ခုကို စစ်ဆေးရာမှာတော့ အားလုံးမှာ ရောဂါပိုးမတွေ့ရှိဘူးလို့လည်း ဆိုပါတယ်။ လက်ရှိအချိန်ထိ မြန်မာနိုင်ငံမှာ COVID-19 အတည်ပြုလူနာ ၁၅၁ ဦး၊ ရောဂါပိုးကင်းစင်သူ ၃၁ ဦးနဲ့ သေဆုံးသူ ၆ ဦးရှိနေပါတယ်။