စစ်တွေမှာ ပြည်တွင်းကူးစက်မှု အခြေအနေကို သိရှိနိုင်ဖို့ ရောဂါကူးစက်နိုင်ခြေများတဲ့ လူအုပ်စုတွေကို အဓိကထားပြီး သွေးနမူနာရယူစစ်ဆေးနေပြီလို့ ရခိုင်ပြည်နယ်၊ ပြည်သူ့ကျန်းမာရေးဦးစီးဌာနက သိရပါတယ်။

ဒီနေ့ သြဂုတ်လ ၃၁ ရက်ကစတင်ကာ သွေးနမူနာရယူစစ်ဆေးနေပြီး  ပြည်နယ်ကျန်းမာရေးဌာနက ကျန်းမာရေးဝန်ထမ်းတွေ၊ ဆေးရုံဝန်ထမ်းတွေ စုစုပေါင်း အယောက် ၂၆၀ ကိုတော့ ဒီကနေ့မှာ စစ်ဆေးခဲ့တယ်လို့ ရခိုင်ပြည်နယ်၊ ပြည်သူ့ကျန်းမာရေးဦးစီးဌာနမှ လက်ထောက်ညွန်ကြားရေးမှူး ဒေါက်တာ စိုးဝင်းပိုင်က ဆိုပါတယ်။

"ဒီနေ့ ပြည်နယ်ကျန်းမာနဲ့ ဆေးရုံဝန်ထမ်း ၂၆၀ ကို သွေးဖောက်ယူတယ်။ မနက်ဖန်ကို စစ်တွေမြို့မဈေးနဲ့ ဘဏ်က လူတွေကို သွေးဖောက်မယ်။ နောက်ပြီး ကိုဗစ်အတည်ပြုလူနာ အများဆုံးတွေ့ရှိရတဲ့ ရပ်ကွက်တွေထဲက ကူးစက်မှုအများဆုံး ရပ်ကွက် (၅) ခုကို သွားမယ်။ ပြည်တွင်းကူးစက်မှုကို သိရှိဖို့ ကျပန်းသွေး နမူနာယူစစ်ဆေးတာပါ "လို့ ဒေါက်တာ စိုးဝင်းပိုင်က ဆိုပါတယ်။ 

ဒီကနေ့ သြဂုတ်လ ၃၁ ရက်နေ့ မနက် ၈ နာရီအထိ ကျန်းမာရေးနှင့်အားကစားဝန်ကြီးဌာန ထုတ်ပြန်ထားတဲ့ သြဂုတ်လ ၁၆ ရက်နောက်ပိုင်းကစပြီး ရခိုင်ပြည်နယ်မှာ ကိုဗစ်အတည်ပြုလူနာ ၃၄၆ ဦးရှိနေခဲ့ရာမှာ စစ်တွေမြို့မှာတော့ ပိုးတွေ့လူနာ ၁၈၂ ဦးနဲ့ ပိုးတွေ့လူနာအများဆုံးမြို့ ဖြစ်နေပါတယ်။

(အလွတ်တန်းသတင်းထောက် ချစ်ခွန်းချိုပေးပို့သောသတင်းဖြစ်ပါသည်)