ကျန်းမာရေးနဲ့ အားကစားဝန်ကြီးဌာနရဲ့ သတင်းထုတ်ပြန်ချက်တွေအရ လက်ရှိ ရခိုင်ပြည်နယ်မှာ ကိုဗစ်- ၁၉ရောဂါပိုး တွေ့ရှိသူဦးရေ နေ့စဉ်တိုးလာနေတဲ့အတွက် ကိုဗစ်လူနာများထားရှိဖို့နေရာတွေကို ကြိုတင်ပြင်ဆင်မှုပြုလုပ်နေပြီး စစ်တွေမြို့နယ်မှာ ဆိုရင်တော့ နေရာနှစ်ခု ထပ်မံပြင်ဆင်ထား တယ်လို့ သိရပါတယ်။

" စစ်တွေဆိုရင် ၁၀၀ပြင်ဆင်ထားပေမဲ့ ၁၈၃ ဖြစ်သွားပြီ ။ ဆေးရုံကြီးရဲ့ဘေးကပ်လျက်ရှိတဲ့ သူနာပြုသင်တန်းကျောင်း ၊ အဲဒီမှာရောဂါပိုးတော့ရှိတယ် လက္ခဏာဘာမှမပြတဲ့သူတွေပေါ့ ထားတယ် ။ အဲဒီမှာ medical team (ဆေးအဖွဲ့) ဆရာဝန်တွေ သူနာပြုတွေနဲ့ စောင့်ကြည့်တယ်ပေါ့နော် ။ သူနာပြုသင်တန်းကျောင်းဆီ တိုးချဲ့ခဲ့တယ်ပေါ့ ။ နောက်ပိုင်းလိုအပ်လာလျှင် တိုင်းရင်းဆေး ဆေးရုံ ၊ စစ်တွေတက္ကသိုလ်ဝင်းထဲမှာရှိတဲ့ အဆောင်တွေပေါ့ ။ ဒါတွေကိုသုံးဖို့ စီစဉ်ထားတယ် " လို့ ရခိုင်ပြည်နယ် ၊ ကျန်းမာရေးဦးစီးဌာန လက်ထောက်ညွှန်ကြားရေးမှူး ဒေါက်တာစိုးဝင်းပိုင်က Duwun ကို ပြောပါတယ်။

ဒါပေမယ့် လက်ရှိအနေအထားအရ ရောဂါပိုးရှိသူ လူနာရှာဖွေတဲ့အပိုင်းကို အားထည့် လုပ်ဆောင်နေတာဖြစ်လို့ ပိုးတွေ့သူလူနာအရေအတွက် တိုးလာနေပေမယ့်လည်း ရောဂါပျောက်ကင်းပြီး ဆေးရုံဆင်းနိုင်သူတွေရှိလာဖို့ တာဝန်ရှိသူတွေက မျှော်လင့်နေပါတယ် ။

သြဂုတ်လ ၁၆ရက်နေ့မှာ မြန်မာနိုင်ငံအတွင်း ပြည်တွင်းကူးစက်မှုအနေနဲ့ ကိုဗစ်-၁၉ ရောဂါပိုးကို စစ်တွေမြို့နယ်ကစတင်တွေ့ရှိခဲ့တာဖြစ်ပါတယ် ။ ရခိုင်ပြည်နယ်တစ်ခုလုံးအနေနဲ့ လက်ရှိမှာတော့ ကိုဗစ်-၁၉ရောဂါပိုးတွေ့ရှိသူတွေကို ဆေးရုံမှာပဲ ထားရှိကုသဖို့အတွက် ၇၂၆ခုတင်ပြင်ဆင်ထားပြီး လူနာကတော့ ၃၄၅ဦးရှိလာခဲ့ပြီ ဖြစ်ပါတယ်။