ပရီးမီးယားလိဂ်လက်ရှိချန်ပီယံမန်ချက်စတာစီးတီးအသင်းဟာ လီဗာပူးအသင်းနဲ့ ၇ မှတ်ကွာဟပြီး ဒုတိယနေရာမှာ ရပ်တည်နေတာဟာ လီဗာပူးအသင်းနည်းပြ ယာဂင်ကလော့ပ်အတွက် အံ့အားသင့်စရာဖြစ်ခဲ့ပုံရပါတယ်။

မန်ချက်စတာစီးတီးအသင်းဟာ ခရစ်စမတ်ပွဲကြပ်ကာလမှာ ခရစ်စတယ်ပဲလေ့စ်နဲ့ လက်စတာစီးတီးအသင်းတို့ကို အံ့အားသင့်ဖွယ် ၂ ပွဲဆက်ရှုံးနိမ့်ခဲ့တာကြောင့် လီဗာပူးအသင်းရဲ့နောက် အဆင့် ၃ နေရာအထိ ကျဆင်းခဲ့တာဖြစ်ပါတယ်။

ငွေကြေးမြောက်မြားစွာသုံးစွဲပြီး ခံစစ်အတွက် အယ်လီဆင်၊ ဗန်ဒိုက်တို့ကို ခေါ်ယူအားဖြည့်ခဲ့ပေမယ့် လီဗာပူးအသင်းနည်းပြ ယာဂင်ကလော့ပ်က ပရီးမီးယားလိဂ်အမှတ်ပေးဇယားထိပ်ဆုံးမှာ ရပ်တည်နိုင်လောက်တဲ့အထိ ဖြစ်လာနိုင်မယ်လို့ မမျှော်လင့်ခဲ့ကြောင်း ပြောကြားခဲ့ပါတယ်။

“ကျွန်တော်တို့ရှိနေတဲ့အခြေအနေဟာ အံ့အားသင့်စရာပါပဲ။ အားလုံးကပြောကြတယ်။ ‘ဟုတ်တယ်။ သူတို့အရမ်းကောင်းတယ်’ဆိုပြီး၊ ဒါပေမယ့် ဘယ်သူကမှ မန်စီးတီးနဲ့မတွေ့ခင်အချိန်မှာ ကျွန်တော်တို့ ၇ မှတ်အကွာမှာ ရှိနေတယ်ဆိုတာ မတွေးမိကြပါဘူး”

“ဒီဇင်ဘာလ အစလောက်မှာ ကျွန်တော်တို့အသင်းက မန်စီးတီးထက် ၁ မှတ်နည်းနေပြီး အခု ၇ မှတ်ဖြတ်ထားနိုင်တာဟာ မဖြစ်နိုင်တဲ့ကိစ္စပါ။ ဘာလို့လဲဆိုတော့ ကျွန်တော်တို့ ကစားတဲ့ပွဲနဲ့ သူတို့ကစားတဲ့ပွဲတွေကြောင့်ပါ။ ဒါပေမယ့် အဲဒါက တကယ်ဖြစ်ပျက်ခဲ့ပါတယ်။ အဲဒါက သူတို့ကို ပိုဆိုးသွားအောင်မလုပ်နိုင်သလို ကျွန်တော်တို့ကိုလည်း ပိုကောင်းလာအောင် မလုပ်နိုင်ပါဘူး။ ဒါက အခုလက်ရှိဖြစ်ပျက်နေတဲ့အခြေအနေတစ်ခုပါ။ အခု ကျွန်တော်တို့ ပွဲစဉ်တစ်ခုကို ကစားရတော့မယ်”

“ပရိသတ်တွေက လွန်ခဲ့တဲ့ ၄၊ ၅ ၊ ၁၀ နှစ်လောက်က ဘာတွေဖြစ်ပျက်ခဲ့လဲဆိုတာကို နားထောင်နေကြတယ်။ ကျွန်တော့်အတွက်ကတော့ အဲဒါက ကျွန်တော့်ရဲ့ကိစ္စမဟုတ်တဲ့အတွက် အရေးမကြီးပါဘူး။ အဲဒီကိစ္စနဲ့ပတ်သက်ပြီး စိတ်လှုပ်ရှားတာမျိုးလည်းမရှိပါဘူး။ တကယ်လို့ ကျွန်တော် ကျရှုံးခဲ့ရင်တောင် ကျွန်တော် ကျရှုံးတာမဟုတ်ဘူး။ ဘာလို့လဲဆိုတော့ လွန်ခဲ့တဲ့ နှစ် ၂၀ လောက်ကတည်းက တစ်စုံတစ်ယောက်က ကျရှုံးခဲ့ပြီးသားမို့လို့ပဲ”