ဆော်ဒီရုပ်သံလိုင်းတွေ လွှမ်းမိုးလာမှာကို စိုးရိမ်နေတာပါ။
Pyae Phyo Thein

ကာတာအခြေစိုက် beIN SPORTS ဟာ နယူးကာဆယ်အသင်းကို ဝယ်ယူမယ့် အစီအစဉ်ကို ပရီးမီးယားလိဂ်ကလပ်အသင်းတွေအနေနဲ့ တားဆီးသင့်တယ်လို့ ပြောဆိုခဲ့ကြောင်းသိရပါတယ်။ လက်ရှိမှာ နယူးကာဆယ်အသင်းကို ဆော်ဒီမင်းသားဘင်ဆယ်လ်မန်က ဝယ်ယူဖို့ နီးစပ်နေတာဖြစ်ပြီး ပေါင်သန်း ၃၀၀ ခန့်နဲ့ အရောင်းအဝယ်ဖြစ်ဖွယ်ရှိနေပါတယ်။

Public Investment Fund (PIF) ဟာ နယူးကာဆယ်အသင်းရဲ့ ရှယ်ယာ ၈၀%ကို ဝယ်ယူသွားမှာဖြစ်ပြီး မိုက်အက်ရှ်လေရဲ့ ထိန်းချုပ်ထားမှုကို လက်လွှဲပြောင်းယူမှာလည်းဖြစ်ပါတယ်။ လက်ရှိအချိန်ထိတော့ အလုံးစုံသဘောတူညီမှုမရရှိသေးပေမယ့် စရန်ငွေပေးချေထားပြီးပြီလို့ သိရပြီး အသေးစိတ်အချက်အလက်တွေ သဘောတူညီမှုရရှိတာနဲ့ အရောင်းအဝယ်ဖြစ်မြောက်သွားမှာဖြစ်ပါတယ်။ 

ရုပ်သံထုတ်လွှင့်ခွင့်အပိုင်းကို ဆော်ဒီမီဒီယာတွေက ဝင်ရောက်လာမယ့်အပေါ်မှာ beIN Sports က အဓိကအားဖြင့် စိုးရိမ်နေတာဖြစ်တယ်လို့ သိရပါတယ်။ ဆော်ဒီရုပ်သံလိုင်းတစ်ခုဖြစ်တဲ့ beoutQ ဟာ ပရီးမီးယားလိဂ်ပွဲတွေကို တရားမဝင်ခိုးယူပြသနေတဲ့ ရုပ်သံလိုင်းဖြစ်ပြီး အခြားအားကစားပွဲတွေကိုလည်း တိုက်ရိုက်ပြသနေတဲ့ ခိုးကူးချန်နယ်တစ်ခုအဖြစ်လူသိများနေတယ်လို့ Sportskeeda က ဖော်ပြခဲ့ပါတယ်။ 

အဆိုပါရုပ်သံလိုင်းမျိုးတွေက ပရီးမီးယားလိဂ်ကို တရားဝင်ချုပ်ကိုင်လာမယ့်အပေါ် beIN Sports က ပူပန်နေပြီး အဆိုပါအားကစားရုပ်သံလိုင်းရဲ့CEO ဖြစ်သူ ယူဆတ်အိုဘိုင်ဒလီက "နယူးကာဆယ်ကို သူတို့ဝယ်ယူမယ့်အလားအလာက ပရီးမီးယားလိဂ်ရဲ့ အကျိုးအမြတ်တွေကို အကြီးအကျယ်ပျက်စီးစေလိမ့်မယ်" လို့ ကလပ်အသင်းဥက္ကဌတွေကို သတိပေးစာပေးပို့ခဲ့ကြောင်း သိရပါတယ်။ 

၂၀၁၈ ခုနှစ်တုန်းကတော့ ပရီးမီးယားလိဂ်က beoutQ ကို ဝေဖန်ရှုတ်ချခဲ့ပြီး အရှေ့အလယ်ပိုင်းနဲ့ မြောက်အာဖရိကတို့မှာ ပရီးမီးယားလိဂ်ကိုတိုက်ရိုက်ထုတ်လွှင့်ပြသခွင့်ရှိတဲ့ တရားဝင်အားကစားလိုင်းအဖြစ် beIN Sports က ရပ်တည်နေကြောင်း အသိပေးစာထုတ်ပြန်ခဲ့ဖူးပါတယ်။ ဝေဖန်သုံးသပ်သူတချို့ကတော့ ကာတာအုပ်စုနဲ့ ဆော်ဒီအုပ်စုတို့ကြားမှာ ပရီးမီးယားလိဂ်ကို ထိန်းချုပ်ဖို့အတွက် လွန်ဆွဲမှုတွေစတင်လာတာဖြစ်တယ်လို့ ယူဆရကြောင်း ဆိုခဲ့ပါတယ်။ 


က္က