ပြင်သစ်ဝါရင့်နည်းပြကြီးဟာ အာဆင်နယ်မှာ နှစ်ပေါင်း ၂ဝကျော်ကြာ နည်းပြအဖြစ် ကိုင်တွယ်ခဲ့သူဖြစ်ပြီး ပရီးမီးယားလိဂ်ဖလား ၃လုံး နဲ့ အက်ဖ်အေဖလား ၇ လုံးရရှိခဲ့သူဖြစ်ပါတယ်။
အာဆင်နယ်အသင်းရဲ့နည်းပြဟောင်း အာစင်ဝင်းဂါးက မန်ချက်စတာယူနိုက်တက်အသင်းဟာ သူ့ကိုနည်းပြအဖြစ် ကမ်းလှမ်းမှုပြုလုပ်ခဲ့တယ်လို့ ထုတ်ဖော်ပြောဆိုလိုက်ပါတယ်။ ပြင်သစ်ဝါရင့်နည်းပြကြီးဟာ အာဆင်နယ်မှာ နှစ်ပေါင်း ၂ဝကျော်ကြာ နည်းပြအဖြစ် ကိုင်တွယ်ခဲ့သူဖြစ်ပြီး ပရီးမီးယားလိဂ်ဖလား ၃လုံး နဲ့ အက်ဖ်အေဖလား ၇ လုံးရရှိခဲ့သူဖြစ်ပါတယ်။
အသက် ၇၀ အရွယ်ရှိနေပြီဖြစ်တဲ့ ဝင်းဂါးဟာ ပရီးမီးယားလိဂ်ခေတ်ဦးပိုင်းမှာ ဆာအဲလက်စ်ဖာဂူဆန်ရဲ့ မန်ချက်စတာယူနိုက်တက်အသင်းအတွက် အကောင်းဆုံးပြိုင်ဘက်အဖြစ်ရှိနေခဲ့ပါတယ်။ သူတို့နှစ်သင်းက ပရီးမီးယားလိဂ်ကို လွှမ်းမိုးထားခဲ့ပြီး အပြိုင်အဆိုင်ယှဉ်ပြိုင်ခဲ့မှုတွေက ပရီးမီးယားလိဂ်ကို သက်ဝင်နေစေခဲ့တာလည်းဖြစ်ပါတယ်။
ပြီးခဲ့တဲ့ ၂ နှစ်မှာ ဝင်းဂါးက အာဆင်နယ်နည်းပြအဖြစ်ကနေ ထွက်ခွာခဲ့တာဖြစ်ပါတယ်။ ဝင်းဂါးအနေနဲ့ အဆိုပါအချိန်ကစပြီး နည်းပြအဖြစ် တာဝန်ယူခဲ့ခြင်းမရှိတော့တာ ဒီနေ့အချိန်ထိဖြစ်ပြီး ယူနိုက်တက်ဘက်က ဘယ်အချိန်မှာကမ်းလှမ်းခဲ့လဲဆိုတာကို ထုတ်ဖော်မပြောဆိုခဲ့ပေမယ့် ပြီးခဲ့တဲ့ ၃ နှစ်အတွင်းမှာပဲဖြစ်မယ်လို့ ယူဆရပါတယ်။
ယူနိုက်တက်အနေနဲ့ ၂၀၁၃ မှာ ဖာဂူဆန်အနားယူခဲ့ပြီးနောက် အမှတ်ပေးဖလားကို မရရှိတော့တာ ဒီနေ့အချိန်ထိဖြစ်ပါတယ်။ ဝင်းဂါးကတော့ အာဆင်နယ်မှာ ဆက်လက်ရှိနေခဲ့ပေမယ့် အောင်မြင်မှုမရတော့တဲ့နောက်မှာ လမ်းခွဲခဲ့ရပါတယ်။ ယူနိုက်တက်အနေနဲ့ ဝင်းဂါးကို ဖာဂူဆန်အနားယူချိန်ကစပြီး ကမ်းလှမ်းခဲ့သလား၊ အာဆင်နယ်ကထွက်ခွာပြီးမှ ကမ်းလှမ်းခဲ့တာလားဆိုတာကတော့ ဝင်းဂါးဖွက်ထားတဲ့ ပဟေဠိဖြစ်လာခဲ့ပါတယ်။