အယ်ကလက်စီကို ဒါဘီမှာ နောက်ဆုံးအကြိမ် ဂိုးမရှိသရေကျထားတာ ၂၀၀၂ ခုနှစ်က ဖြစ်လို့ အခုတစ်ကြိမ်က ၁၇ နှစ်အကြာမှာ ပထမဆုံး ဂိုးမရှိသရေပွဲဖြစ်လာပါတယ်။
၁၇၉ ကြိမ်မြောက်တွ့ဆုံခဲ့တဲ့ အယ်ကလက်စီကို ဒါဘီပွဲကတော့ ဂိုးမရှိ သရေရလဒ်နဲ့ ပြီးဆုံးခဲ့တာကြောင့် နှစ်သားကြား ရမှတ်ကွာဟမှု မရှိသေးပဲ ရမှတ်တူ အဆင့် ၁ နဲ့ ၂ မှာ မူလအတိုင်း ဆက်ရှိနေကြပါတယ်။
နှစ်သင်းကြား ရမှတ်တူအနေအထားမှာ ဘာစီလိုနာက ရီးရဲမက်ဒရစ်အသင်းထက် ၂ ဂိုးသာ အနေအထားနဲ့ အမှတ်ပေးဇယားကို ဦးဆောင်နေတာလည်း ဖြစ်ပါတယ်။
ပွဲအပြီးမှာတော့ စံချိန်ကောင်းတင်နိုင်သူတွေ ရှိခဲ့သလို စံချိန်မှတ်တမ်းဆိုးတွေကို ပိုင်ဆိုင်ခဲ့သူတွေလည်း ရှိလာတဲ့ အကြောင်း BBC SPORT သတင်းဌာနကဖော်ပြလာပါတယ်။
ဒီဇင်ဘာ ၂၀၁၁ ကစပြီး ဘာစီလိုနာနဲ့ တွေ့ဆုံထားတဲ့ လာလီဂါ ၇ပွဲဆက်မှာ ရီးရဲအသင်းဟာ နိုင်ပွဲ လုံးဝမရှိသေးပဲ ၃ ပွဲသရေ ၄ ပွဲရှုံးရလဒ်ကို ပိုင်ဆိုင်ထားပါတယ်။
ဒါပေမယ့် ရီးရဲအသင်းခေါင်းဆောင် ရာမို့စ်ကတော့ အယ်ကလက်စီကိုပွဲကို ၄၃ ပွဲထိ ပါဝင်ကစားနိုင်ခဲ့တာကြောင့် အယ်ကလက်စီကိုပွဲ အများဆုံး ပါဝင်ကစားနိုင်သူ ဖြစ်လာခဲ့ပါပြီ။
နည်းပြ ဇီဒန်းဟာဆိုရင်လည်း နူးကမ့်ကို လိုက်ကစားတဲ့ ပြိုင်ပွဲစုံ ၅ ပွဲစလုံးကို မရှုံးအောင် ကစားထားနိုင်ခဲ့ပြီး ၂ ပွဲ နိုင် ၃ ပွဲသရေ စွမ်းဆောင်နိုင်မှုကြောင့် ရီးရဲအသင်းရဲ့ နည်းပြတွေ သမိုင်းမှာ ဘာစီလိုနာကွင်းမှာ မရှုံးသေးတဲ့ စံချိန်ကို အကြာဆုံးတင်ထားနိုင်သူ ဖြစ်လာခဲ့ပါပြီ။
ဘာစီလိုနာအသင်းရဲ့ အသင်းခေါင်းဆောင် လီယွန်နယ် မက်ဆီအတွက်တော့ အခုပွဲမှာ ဂိုးသွင်းနိုင်ခြင်းမရှိသလို ဂိုးဖန်တီးပေးနိုင်ခြင်းလည်း မရှိတာက ရီးရဲနဲ့တွေ့တဲ့ နောက်ဆုံး ၄ ပွဲမှာ ပထမဆုံး အကြိမ်လည်း ဖြစ်လာခဲ့ပါတယ်။
အယ်ကလက်စီကို ဒါဘီမှာ ဂိုးမရှိသရေကျခဲ့တဲ့ နောက်ဆုံးပွဲက ၂၀၀၂ နိုဝင်ဘာတုန်းက ဖြစ်လို့ ရက်ပေါင်း ၆၂၃၅ရက်အကြာမှာ ပထမဆုံးအကြိမ် ဂိုးမရှိသရေ ပြန်ဖြစ်တာလို့ဆိုရမှာပါ။
လာမယ့် စနေ၊တနင်္ဂနွေနေ့တွေမှာတော့ ဘာစီလိုနာက အလာဗက်စ်အသင်းကို အိမ်ကွင်းဧည့်ခံ ကစားရဖို့ရှိနေ လို ရီးရဲကလည်း ဘီလ်ဘာအိုအသင်းကို အိမ်ကွင်းမှာပဲ လာလီဂါပွဲအဖြစ် ဆက်လက်ကစားရမှာပါ။