ရော်နယ်ဒိုက ရာစုနှစ်ရဲ့အကောင်းဆုံးကစားသမားအဖြစ် သတ်မှတ်ခံခဲ့ရပြီး မက်ဆီက ဒုတိယနေရာမှာရှိခဲ့ကာ အီဂျစ်တိုက်စစ်မှူးဆာလာက တတိယနေရာမှာရှိနေခဲ့ပါတယ်။
ပေါ်တူဂီတိုက်စစ်မှူးရော်နယ်ဒိုဟာ ဒူဘိုင်းမှာ ပြုလုပ်ခဲ့တဲ့ Globe Soccer ဆုပေးပွဲမှာ ရာစုနှစ်ရဲ့အကောင်းဆုံးကစားသမားအဖြစ် ရွေးချယ်ခံခဲ့ရပါတယ်။ အသက် ၃၅ နှစ်အရွယ် ဂျူဗင်တပ်စ်တိုက်စစ်မှူးအတွက်တော့ ဂုဏ်ယူဖွယ်ရာဆုတစ်ခုကို ထပ်မံရယူနိုင်ခဲ့တာဖြစ်သလို မက်ဆီကိုလည်း နောက်ထပ်တစ်ကြိမ်နောက်ကောက်ချနိုင်ခဲ့တာလည်းဖြစ်ပါတယ်။
အငြင်းပွားဖွယ်ရာတွေရှိနေခဲ့ပေမယ့်လည်း ပရိသတ်တွေရဲ့ မဲပေးရွေးချယ်မှုအတိုင်း ရလဒ်ထွက်ပေါ်ခဲ့တာဖြစ်ပါတယ်။ ရာစုနှစ်ရဲ့အကောင်းဆုံးနည်းပြအဖြစ် ဂွာဒီယိုလာ ရွေးချယ်ခံခဲ့ရပြီး ၂၀၂၀ ခုနှစ်အတွက် တစ်ဦးချင်းအကောင်းဆုံးကစားသမားဆု နဲ့ နည်းပြဆုကိုတော့ ဘိုင်ယန်မြူးနစ်အသင်းက လီဝန်ဒေါစကီးနဲ့ နည်းပြဟန်ဆီဖလစ်တို့ရရှိခဲ့တယ်လို့ Goal.com က ဖော်ပြခဲ့ပါတယ်။
ရီးရဲလ်မက်ဒရစ်အသင်းကတော့ ရာစုနှစ်ရဲ့အကောင်းဆုံးအသင်းအဖြစ် သတ်မှတ်ခံခဲ့ရပါတယ်။ အကောင်းဆုံးဘောလုံးအေးဂျင့်အဖြစ် ရော်နယ်ဒိုရဲ့ အေးဂျင့်ဖြစ်သူ ဂျော့မန်ဒက်စ်ကပဲရရှိခဲ့ပြီး ပြီးခဲ့တဲ့ ၁၀ နှစ်အတွင်းမှာ ၉ ကြိ်မ်အထိရရှိမှုဖြစ်ခဲ့ပါတယ်။ ဆုပေးပွဲမတိုင်ခင်ကတည်းက ရော်နယ်ဒိုက သေချာပေါက် ဆုတစ်ခုခုရရှိလိမ့်မယ်လို့ ရေပန်းစားခဲ့တဲ့အတိုင်း ရာစုနှစ်ရဲ့အကောင်းဆုံးကစားသမားအဖြစ် သတ်မှတ်ခံခဲ့ရတာဖြစ်ပါတယ်။