ရီးရဲမက်ဒရစ်အသင်းရဲ့အပယ်ခံဖြစ်တဲ့ ကိုလံဘီယာလက်ရွေးစင်ကြယ်ပွင့် ဂျိမ်းစ်ရိုဒရီဂွက်ဇ်ဟာ နာပိုလီအသင်းကို ယူရိုသန်း ၁၀၀ နဲ့ အပြီးသတ်ခေါ်ယူခွင့်ပါဝင်တဲ့ ၁ နှစ်အငှားစာချုပ်နဲ့ ပြောင်းရွှေ့ဖို့ သဘောတူညီလိုက်ပြီလို့ Corriere dello Sport ရဲ့ဖော်ပြချက်အရ သိရပါတယ်။

Corriere dello Sport က အပြောင်းအရွှေ့ဖြစ်မြောက်ခဲ့ပြီဖြစ်ကြောင်း အတည်ပြုခဲ့ပေမယ့် ၂ သင်းစလုံးကတော့ ထုတ်ပြန်ကြေညာခြင်းမရှိသေးဘဲ တိတ်ဆိတ်နေတာဖြစ်ပါတယ်။ ဂျိမ်းစ်ရိုဒရီဂွက်ဇ်ဟာ ၎င်းရဲ့ဆရာဟောင်းဖြစ်တဲ့ အန်ဆယ်လော့တီနဲ့ ပြန်လည်ဆုံစည်းရတော့မှာဖြစ်ပြီး လစာ၊ လက်မှတ်ထိုးခ၊ ပြောင်းရွှေ့ကြေးစုစုပေါင်းဟာ ပေါင် ၈၉ သန်းကျော် တန်ကြေးရှိတယ်လို့ သိရပါတယ်။

ဂျိမ်းစ်ရိုဒရီဂွက်ဇ်ဟာ ၂၀၁၄ ခုနှစ်မှာ မိုနာကိုအသင်းကနေ ရီးရဲမက်ဒရစ်အသင်းကို ပေါင် ၆၃ သန်းနဲ့ ပြောင်းရွှေ့ခဲ့သူဖြစ်ပြီး ရီးရဲမက်ဒရစ်အသင်းအတွက် ၁၁၁ ပွဲ ပါဝင်ကစားပေးခဲ့ရာမှာ ၃၆ ဂိုး သွင်းယူပေးခဲ့သူဖြစ်ပါတယ်။

ရီးရဲမက်ဒရစ်အသင်းဟာ အသက် ၂၇ နှစ်အရွယ်ရှိပြီဖြစ်တဲ့ ဂျိမ်းစ်ရိုဒရီဂွက်ဇ်ကို အပြီးသတ်ရောင်းချနိုင်ဖို့ မျှော်လင့်နေပေမယ့် ဂျိမ်းစ်ရိုဒရီဂွက်ဇ်ရဲ့ လစာပမာဏနဲ့ ပြောင်းရွှေ့ကြေးကြောင့် ဝယ်ယူလိုတဲ့အသင်း ရှိမလာသေးတာဖြစ်ပါတယ်။