စင်ကာပူပရီးမီးယားလိဂ်ချန်ပီယံ Albirex Niigata FC အသင်းဟာ မြန်မာနိုင်ငံကိုလာရောက်ပြီး မြန်မာ့လက်ရွေးစင်ယူ-၁၉၊ ယူ-၂၂အသင်းတွေနဲ့ရန်ကုန်မြို့မှာခြေစမ်းပွဲနှစ်ပွဲကစားမယ်လို့ မြန်မာနိုင်ငံဘောလုံးအဖွဲ့ချုပ်က တရားဝင်သတင်းထုတ်ပြန်ခဲ့ပါတယ်။
ဒေသတွင်းပြိုင်ပွဲနဲ့ အာရှပြိုင်ပွဲတွေအတွက်ပြင်ဆင်လေ့ကျင့်နေတဲ့ မြန်မာယူ-၂၂လက်ရွေးစင်ဘောလုံးအသင်းနဲ့ မြန်မာယူ-၁၉လက်ရွေးစင်ဘောလုံးအသင်းတို့ဟာ မတ်လအတွင်းမှာ နိုင်ငံတကာခြေစမ်းပွဲနှစ်ပွဲကစားဖို့ရှိနေပါတယ်။ မြန်မာလူငယ်လက်ရွေးစင်အသင်းတွေနဲ့ခြေစမ်းကစားမယ့် အသင်းက လက်ရှိစင်ကာပူပရီးမီးယားလိဂ်ချန်ပီယံ Albirex Niigata FC အသင်းပါ။ Albirex Niigata FC အသင်းဟာ မတ်လအတွင်းမှာ မြန်မာနိုင်ငံကိုလာရောက်ပြီး မတ်လ၇ရက်မှာ မြန်မာယူ-၁၉၊ မတ်လ ၉ရက်မှာ မြန်မာယူ-၂၂အသင်းတွေနဲ့ရန်ကုန်မြို့၊ သုဝဏ္ဏကွင်းမှာ ခြေစမ်းကစားမယ်လို့ မြန်မာနိုင်ငံဘောလုံးအဖွဲ့ချုပ်က ထုတ်ပြန်ထားပါတယ်။
မြန်မာယူ-၁၉အသင်းဟာ ၂၀၁၉ခုနှစ်အတွင်းမှာ အာဆီယံယူ-၁၉ချန်ပီယံရှစ်ပြိုင်ပွဲအတွက် ပြင်ဆင်နေတဲ့အသင်းဖြစ်ပြီး နည်းပြချုပ်အဖြစ် ဦစိုးမြတ်မင်းတာဝန်ယူကိုင်တွယ်နေတာပါ။ မြန်မာယူ-၂၂အသင်းကတော့ အာဆီယံယူ-၂၂ချန်ပီယံရှစ်၊ အာရှယူ-၂၃ခြေစစ်ပွဲ၊ ဆီးဂိမ်းအစရှိတဲ့ပြိုင်ပွဲတွေဝင်ပြိုင်ဖို့ရှိနေပြီး နည်းပြချုပ်အဖြစ် ဘူဂေးရီးယားလူမျိုးနည်းပြ ဗီလီဇာပိုပေါ့က တာဝန်ယူကိုင်တွယ်နေပါတယ်။ Albirex Niigata FC အသင်းဟာ မတ်လ ၆ရက်မှာ ရန်ကုန်မြို့ကိုရောက်ရှိမယ်လို့ အဖွဲ့ချုပ်ရဲ့ထုတ်ပြန်ချက်အရသိရပါတယ်။
Albirex Niigata FC အသင်းဟာ ဂျပန်ကလပ်အသင်းတစ်သင်းဖြစ်ပြီး ၂၀၀၄ခုနှစ်ကတည်းက စင်ကာပူလိဂ်မှာ ဝင်ရောက်ကစားနေတာပါ။ အသင်းမှာ စင်ကာပူကစားသမား လေးဦးပါဝင်ပြီး ဂျပန်ကစားသမားတွေနဲ့ဖွဲ့စည်းထားပါတယ်။ စင်ကာပူအမှတ်ပေးချန်ပီယံဆုကို ၂၀၁၆၊၂၀၁၇၊၂၀၁၈ သုံးကြိမ်ဆက်ချန်ပီယံဖြစ်ထားတဲ့အသင်းဖြစ်ပြီး လိဂ်ဖလားလေးကြိမ်၊ ရှုံးထွက်ဖလားလေးကြိမ်ရရှိထားပါတယ်။