အာဆင်နယ်အသင်းဟာ လိုင်လီအသင်းက အိုင်ဗရီကို့စ် တိုက်စစ်မှူး နီကိုးလက်စ်ပီပီကို ပြောင်းရွှေ့ကြေး ပေါင် ၇၂ သန်းနီးပါးနဲ့ ခေါ်ယူနိုင်ခဲ့တယ်လို့ ပြီးခဲ့တဲ့ ရက်ပိုင်းကတည်းက သတင်းဌာနတွေက ဖော်ပြခဲ့ကြပါတယ်။ ဒီပြောင်းရွှေ့စရိတ်က ကလပ်အသင်းသမိုင်းတစ်လျှောက် စံချိန်တင် ပြောင်းရွှေ့ကြေးလည်း ဖြစ်လာခဲ့သလို ဒီနှစ် လူဝယ်ရာသီမှာ ပရီးမီးယားလိဂ် ကလပ်အသင်းတွေထဲမှာ ဈေးအကြီးဆုံး ကစားသမားခေါ်ယူမှုလည်း ဖြစ်လာခဲ့တာပါ။

ကစားသမားကတော့ ဒီတစ်ပတ်အကုန်လောက်မှာ လန်ဒန်ကိုလာပြီး ဆေးစစ်မှု ပြုလုပ်သွားမယ်လို့ သိရပြီး ဒီကစားသမားကို အာဆင်နယ်အသင်း ၅ နှစ်အရစ်ကျနဲ့ ခေါ်ယူနိုင်ခဲ့တာကတော့ နည်းပြ အူနိုင်း အမ်မရီကို မချီးကျူးပဲ မဖြစ်ဘူးလို့ နိုင်ငံတကာ မီဒီယာတွေက ဖော်ပြလာပါတယ်။ ပီပီကို မန်ချက်စတာ ယူနိုက်တက်၊ ပီအက်စ်ဂျီနဲ့ နာပိုလီအသင်းတို့ကလည်း အပြိုင်စိတ်ဝင်စားခဲ့ပါတယ်။ အာဆင်နယ်အသင်းကတော့ နောက်ထပ် တတိယမြောက် ကစားသမားခေါ်ယူမှုအဖြစ် ဆဲလ်တစ်နောက်ခံလူ တီယာနေးကိုလည်း ဆက်လက် ချိတ်ဆက်ကြိုးပမ်းနေပါတယ်။