ပရီးမီးယားလိဂ်ရဲ့ နည်းပြသစ်နှစ်ဦးတွေ့ဆုံခဲ့တဲ့ ပထမဆုံးလန်ဒန်ဒါဘီမှာ အိမ်ရှင် ချယ်လ်ဆီးအသင်းက အာဆင်နယ်ကို ၃-၂ဂိုးနဲ့အနိုင်ရပြီး ချယ်လ်ဆီးနည်းပြ ဆာရီက အာဆင်နယ်နည်းပြ အမ်မရီကို ပညာပေးနိုင်ခဲ့ပါတယ်။ ဒီရလဒ်ကြောင့် အာဆင်နယ်နည်းပြ အမ်မရီဟာ ပရီးမီးယားလိဂ်ပွဲစဉ်(၂) ပြီးချိန်အထိ ပရီးမီးယားလိဂ်ရမှတ်မရသေးပဲ ရုန်းကန်နေရပါတယ်။

အဖွင့်ပွဲမှာ အနိုင်ရထားတဲ့ ချယ်လ်ဆီးရဲ့ရာသီသစ်အိမ်ကွင်းအဖွင့်ပွဲဖြစ်သလို လန်ဒန်ဒါဘီလည်းဖြစ်တာကြောင့် အိမ်ရှင်အသင်းက ဒီပွဲမှာ အနိုင်သုံးမှတ်အတွက် စနစ်တကျပြင်ဆင် လာခဲ့ပါတယ်။ နည်းပြသစ် အမ်မရီရဲ့အာဆင်နယ်ကတော့ ပွဲမတိုင်ခင်ကတည်းက ခံစစ်ကြောင်းပြဿနာတွေ၊ ဒဏ်ရာပြဿနာတွေကြောင့် ပွဲထွက်လူစာရင်းအပြောင်းအလဲရှိခဲ့ပါတယ်။ အိမ်ရှင်ချယ်လ်ဆီးဟာ ၄-၃-၃ ပုံစံမှာ ဟာဇက်ကလွဲရင် အဓိက ကစားသမားတွေဖြစ်တဲ့ ဂျော်ဂင်ဟို၊ အလွန်ဆို၊ ဝီလီယမ်၊ ပက်ဒရို၊ ကန်တီ၊ မိုရာတာ စတဲ့ကစားသမားအစုံအလင်ပါဝင်လာပါတယ်။ အာဆင်နယ်ကတော့ ခံစစ်ကြောင်းမှာ မွန်ရီယယ်ပြန်ပါလာသလို မူစတာဖီ၊ ဘယ်လာရင်၊ ပါပက်သိုပူးလော့စ်တို့ပါဝင်ခဲ့ပြီး ကွင်းလယ်မှာတော့ ရမ်ဆေးကိုအနားပေးပြီး လူငယ်ကစားသမား ဂွမ်ဒိုဇီကို ဆက်လက်အသုံးပြုခဲ့ပါတယ်။