ရာသီကြိုပြင်ဆင်မှု အဖြစ် ခြေစမ်းပွဲတွေ ကစားနေတဲ့ ပရီးမီးယားလိဂ်ကလပ် အဲဗာတန်အသင်းဟာ သြစတြီးယားကလပ် အသင်း တစ်သင်းဖြစ်တဲ့ ATV Irding အသင်းကို (၂၂)ဂိုးအထိ သွင်းယူနိုင်ခဲ့တယ်လို့ သိရပါတယ်။ နည်းပြ မာကိုဆေးဗားလ်ရဲ့ ပထမဆုံး ပွဲစဉ်အဖြစ် ခြေစမ်းပွဲ ကစားခဲ့တာ ဖြစ်ပြီး အဲဗာတန် ကစားသမား (၄)ဦးအထိ ဟက်ထရစ်သွင်းယူနိုင်ခဲ့တယ်လို့ သိရပါတယ်။
Photo : Daily Mail
သြစတြီးယားလိဂ်စတုတ္ထတန်းအသင်းတစ်သင်းဖြစ်တဲ့ ATV Irdning နဲ့ပွဲကို စနေနေ့၊ နေ့လည်က ကစားခဲ့တာဖြစ်ပါတယ်။ အဲဗာတန်ကစားသမားတစ်ဦးဖြစ်တဲ့ ကီဗင်မီရာလက်စ်က တစ်ဦးတည်း (၅)ဂိုး သွင်းယူနိုင်ခဲ့တယ်လို့ သိရပါတယ်။ ဘယ်လ်ဂျီယံအသင်းရဲ့ လူစာရင်းမှာ ရွေးချယ်မှုမခံခဲ့ရတဲ့ မီရာလက်စ်အတွက်တော့ စနေနေ့နေ့လည်ခင်းဟာ ပျော်ရွှင်စရာ ဖြစ်ခဲ့ပါတယ်။
Photo : Daily Mail
လွတ်ခ်မန်းက (၃)ဂိုး၊ တိုဆွန် နဲ့ နီယာဆီတို့က (၄)ဂိုးစီ သွင်းယူခဲ့ကြပြီး လေတန်ဘိန်းစ်၊ မိုက်ကယ်ကိန်း၊ ဟိုးလ်ဂိတ်တို့က တစ်ဂိုးစီသွင်းယူခဲ့ကြပြီး ဗယ်လာဆစ်က (၂) ဂိုးသွင်းယူနိုင်ခဲ့ပါတယ်။ သြစတြီးယားအသင်းဘက်က ကိုယ့်ဂိုးကိုယ် တစ်ဂိုးသွင်းယူခဲ့လို့ အဲဗာတန်အသင်းဟာ (၂၂)ဂိုးပြတ်နဲ့ အနိုင်ရရှိသွားခဲ့ပါတယ်။
Photo : Daily Mail
ခြေစွမ်းအဆင့်အတန်းချင်း ကွာဟခဲ့တဲ့ ပြိုင်ဘက်အသင်းနှစ်သင်းရဲ့ ပွဲစဉ်ဖြစ်တာကြောင့်လည်း အဲဗာတန်အသင်းက အလွယ်တကူ ဂိုးသွင်းယူနိုင်ခဲ့တာ ဖြစ်ပါတယ်။ ဒါပေမယ့်လည်း ဒီလောက်များပြားတဲ့ ဂိုးအရေအတွက်ကို သွင်းယူနိုင်ခဲ့မှုကတော့ အံ့သြစရာဖြစ်ခဲ့ပါတယ်။ မာကိုဆေးဗားလ်ကတော့ သူ့ရဲ့ အဲဗာတန်နည်းပြဘ၀ ပထမဆုံးပွဲကို မေ့ပျောက်နိုင်စရာ မရှိတော့တဲ့ သွင်းဂိုးအရေအတွက်နဲ့ အနိုင်ရရှိခဲ့ပါတယ်။
Photo : Daily Mail
ရာသီကြိုပြင်ဆင်မှုအနေနဲ့ အဲဗာတန်အသင်းဟာ ခြေစမ်းပွဲ (၅)ပွဲ ကစားသွားမှာဖြစ်ပြီး နောက်ထပ် (၄)ပွဲ ထပ်မံကစားဖို့ ကျန်ရှိနေသေးတယ်လို့ သိရပါတယ်။ အဲဒီနောက်မှာ သြဂုတ်လ (၁၁)ရက်နေ့မှာ ပရီးမီးယားလိဂ် ၂၀၁၈-၁၉ ဘောလုံးရာသီရဲ့ အဖွင့်ပွဲစဉ်အဖြစ် တန်းတက်အသင်း ဝုလ်ဗ်ရဲ့ အိမ်ကွင်းမှာ သွားရောက်ကစားရမှာ ဖြစ်ပါတယ်။