အန်းဒရိုက်ဗားရှင်းပဲ ထွက်ထားပါတယ်

လက်အချက်ပြ ဘာသာစကား ၁၀ မျိုးပါဝင်ပြီး ကလေးငယ်များကို စာဖတ်ရာမှာ အကူအညီပေးသွားမယ့် app တစ်မျိုးကို Huawei ကနေ မိတ်ဆက်ထားပါတယ်။

huawei-storysign-app-1000x562.jpg

Photo: Android Authority

 

ကမ္ဘာပေါ်မှာ ဆွံ့အ နားမကြားဖြစ်နေတဲ့ ကလေးငယ်ပေါင်း ၃၂ သန်းရှိထားပြီး ဒီကလေးတွေဟာ စာအုပ်ပေါ်က စာလုံးတွေကို ဖတ်ဖို့ပြဿနာရှိနေကြတာပါ။ Huawei AI နဲ့လာတဲ့ StorySign app မှာတော့ Augmented Reality လို့ခေါ်တဲ့ ကွန်ပျူတာပုံဖော်နည်းပညာနဲ့AI စနစ်တို့ပေါင်းစပ်ပြီး စာသားတစ်ခုကို ဖတ်လိုက်တိုင်း လက်သင်္ကေတနဲ့ဘာသာပြန်ပြသွားမှာ ဖြစ်ပါတယ်။

StorySign ဟာ ဖုန်းကင်မရာနဲ့ချိတ်ဆက်ပြီး စာအုပ်ပေါ်က စာတွေကို လက်အချက်ပြစနစ်နဲ့ပြန်ရှင်းပြမှာပါ။ ဒီလို ရှင်းပြဖို့Star လို့နာမည်ပေးထားတဲ့ အန်နီမေးရှင်းအရုပ်လေးကို အသုံးပြုထားပါတယ်။ တစ်ခုကောင်းတာက စာအုပ်ပေါ် ဖုန်းကင်မရာနဲ့ရိုက်ရာမှာ ဘယ်ထောင့် ဘယ်နေရာကမဆို ရိုက်ရိုက် app က ဖတ်ရှုနိုင်တာပါ။ ဒီ app မှာ သုံးထားတဲ့ AI Engine စနစ်ဟာ စာရွက်ကို ဖတ်ရှုတဲ့ နှုန်းကို လိုသလို မြှင့်နိုင် လျှော့နိုင်တာပါပဲ။

ဆွံ့အ နားမကြား ကလေးတိုင်း စာဖတ်နိုင်စေဖို့ရည်ရွယ်ပြီး ထုတ်လိုက်တာ ဖြစ်ပေမယ့် လောလောဆယ်မှာတော့ ဒီ app ကို အန်းဒရိုက်စနစ်နဲ့ပဲ ထွက်ထားပြီး iPhone မှာ မရသေးပါဘူး။

Android မှာတော့ Android 6.0 နဲ့နောက်ထွက် ဖုန်းတွေမှာ အသုံးပြုနိုင်ပြီး Google Play Store ကဖြစ်စေ Huawei App Gallery ကဖြစ်စေ ရယူနိုင်မယ်လို့ဆိုပါတယ်။ ပိုကောင်းတာတစ်ခုက Huawei က ထုတ်တဲ့ app ဆိုပေမယ့် ဘယ်အန်းဒရိုက်ဖုန်းမှာ မဆို သုံးနိုင်တာပါပဲ။

လက်အချက်ပြ ဘာသာစကားအနေနဲ့ပြင်သစ် ၊ အင်္ဂလိပ် ၊ ဂျာမန် ၊ အီတလီ ၊ စပိန် ၊ ဒတ်ချ် ၊ ပေါ်တူဂီ ၊ အိုင်ယာလန် ၊ ဘယ်လ်ဂျီယံ နဲ့ဆွစ်-ဂျာမန် စကားဆိုပြီး ဘာသာစကား ၁၀ မျိုး နဲ့ထုတ်ထားပါတယ်။

 

ဈေးကွက်အနေနဲ့ဥရောပပဲ အရင်မိတ်ဆက်ထားတာ ဖြစ်ပြီး Huawei ကလည်း ဥရောပနဲ့ဗြိတိန်မှ ဆွံ့အ နားမကြားသူများ အစည်းအရုံးနဲ့ပူးပေါင်းပြီး ဒီ app ကို ထုတ်လုပ်လိုက်တာပါ။



က္က