တကယ်ပဲ Square ပုံစံ သုံးလုံးတွဲကင်မရာ သုံးလာမလား
Nyein Min Wai

၂၀၁၉ မော်ဒယ် iPhone သစ်တွေရဲ့ dummy ကိုယ်ထည်ပုံစံတွေကတော့ တရုတ်လူမှုကွန်ရက်တွေပေါ်မှာ တက်လာပြီ ဖြစ်ပါတယ်။

Photo: macrumors

         Weibo လူမှုကွန်ရက်ပေါ်မှာ တက်လာတဲ့ ပုံတွေအရ iPhone XI/XI Max အဖြစ် နာမည်ပေးသွားဖို့ရှိတဲ့ ဒီဖုန်းသစ်တွေဟာ ကျောဘက်မှာ စတုရန်းကွက်ပုံစံ ကင်မရာဖွဲ့စည်းမှုနဲ့လာတာ တွေ့ရပါတယ်။ စတုရန်းကွက်ထဲမှာတော့ ကင်မရာ ၃ လုံးအတွက် နေရာပေးထားတာ တွေ့ရလို့ဒီနှစ်ထဲ Apple ဟာ triple lens သုံး iPhone ထုတ်မယ်ဆိုတဲ့ သတင်းဟာ အတော်ကို နီးစပ်နေတယ်လို့ဆိုနိုင်ပါတယ်။

         SlashLeaks မှာပဲ iPhone XI/XI Max တို့ရဲ့ ရှေ့ခြမ်း panel အကြမ်းပုံကို ပြထားရာမှာ iPhone X အတိုင်း notch ကို ဆက်သုံးထားတာ တွေ့ရပါတယ်။ notch ထဲမှာ sensor လေးခုနဲ့စပီကာပေါက်တစ်ခု ပါလာပါတယ်။ iPhone သစ်တွေ မိတ်ဆက်ဖို့လတော်တော်ကြာကတည်းက dummy မော်ဒယ်အဖြစ် စက်ရုံထုတ် ပုံကြမ်းဒီဇိုင်းတွေဟာ တက်လာနေကျ ဖြစ်ပါတယ်။

         ပြီးခဲ့တဲ့ ၂၀၁၇ ၊ ၂၀၁၈ ထုတ် iPhone X နဲ့iPhone XS မော်ဒယ်တွေ မထွက်ခင် ပေါက်ကြားလာခဲ့တဲ့ dummy ပုံစံတွေဟာ အပြင်ဈေးကွက်မှာ တရားဝင် မိတ်ဆက်လိုက်တဲ့ မော်ဒယ်တွေနဲ့အတော်လေးကို တူနေခဲ့တာကြောင့် iPhone XI စီးရီးသစ်ရဲ့ dummy မော်ဒယ်ကလည်း ဈေးကွက်ဝင်မော်ဒယ်နဲ့တစ်ထပ်တည်းမဟုတ်တောင် အတော်လေး ဆင်ဖို့ရှိပါတယ်။

         ၂၀၁၉ မှာ ထွက်လာမယ့် iPhone သစ်တွေဟာလည်း OLED display သုံး မျက်နှာပြင် ၆.၅ လက်မနဲ့၅.၈ လက်မ အပြင် LCD panel မျက်နှာပြင် ၆.၁ လက်မမော်ဒယ်ဆိုပြီး ၃ မျိုး ထွက်လာမယ်လို့သတင်းထွက်နေပါတယ်။ high-end မော်ဒယ်နှစ်ခုဟာ triple-lens နဲ့LCD မော်ဒယ်ကို dual cameras ဆိုပြီး ထွက်လာဖို့လည်း ရှိနေပါတယ်။

         ကင်မရာပိုင်းမှာ Sony ထုတ် Super-Wide ကင်မရာစနစ်ကို ဒီဖုန်းတွေမှာ မြင်ရမယ်လို့လည်း ယူဆနေပါတယ်။ နာမည်ကြီး iPhone သတင်း သုံးသပ်သူ မင်ချိကုအိုကတော့ ၂၀၁၉ မော်ဒယ် iPhone တွေဟာ USB C port ထက် အရင်အတိုင်း Lightning Connector ကိုပဲ ဆက်သုံးသွားမယ်လို့ခန့်မှန်းထားပါတယ်။ ဒီဖုန်းတွေမှာ တစ်ခြားဖုန်းတွေကိုပါ ကြိုးမဲ့ အားသွင်းနိုင်မယ့် Bilateral Wireless Charging စနစ် ပါလာမယ်လို့လည်း ဆိုပါတယ်။ သတင်းတွေ ဘယ်လို ထွက်နေပေမယ့် iPhone သစ်တွေကို တကယ်ကြေညာမယ့် စက်တင်ဘာလရောက်မှ အတိအကျ သိရမှာပါ။ 


ဆက်စပ်အကြောင်းအရာများ


က္က