ဒီစာအုပ်တစ်အုပ်လုံး ဖတ်ပြီးသွားရင် အနှစ်အကျဆုံးအချက်တစ်ခုကို တွေ့ရပါလိမ်
Nyein Min Wai

ကျွန်တော်တို့အားလုံး ထိပ်ဆုံးရောက် ပေါက်မြောက်အောင်မြင်ကျော်ကြားသည့် လူပုဂ္ဂိုလ်နှင့် အဖွဲ့အစည်းများအကြောင်းကို သိလိုစိတ် (တစ်နည်းအားဖြင့်) စူးစမ်းချင်စိတ် ထက်သန်လေ့ရှိကြသည်။ အဘယ့်ကြောင့်နည်း။

      အောင်မြင်ပေါက်မြောက်သူတို့ လမ်းနောက် လိုက်ကြည့်ခြင်းအားဖြင့် သူတို့ရဲ့ ဖြတ်သန်းမှု ၊ အတွေ့အကြုံ ၊ ဦးဆောင်ပဲ့ကိုင်မှုနဲ့ ပင်မစံတန်ဖိုးထား ခံယူချက်များအကြောင်းကို သင်ခန်းစာယူနိုင်သည်။ ကိုယ်ပိုင်အတွေ့အကြုံတွေမှာ အသုံးချနိုင်သည်။ ကိုယ့်သဘောကို ပိုကောင်းအောင် ပြောင်းလဲနိုင်သည်။

Huawei အကြောင်း မြန်မာဘာသာပြန်အနေနဲ့ ထွက်ရှိလာတဲ့ "ခေါင်းဆောင်မှု ၊ အစဉ်အလာနှင့် ဆက်သွယ်နိုင်စွမ်းရှိမှု" စာအုပ်ဟာ ကျွန်တော်တို့ရဲ့ သိလိုစိတ်ကို မီးထိုးပေးမယ့် စာအုပ်လို့ ဆိုနိုင်ပါသည်။ စာအုပ်ထဲမှာ Huawei ဒဿနအကြောင်းကို ကျယ်ကျယ်ပြန့်ပြန့် ၊ စေ့စေ့စပ်စပ် ဆုပ်ကိုင် တင်ပြထားခြင်းကြောင့် ဖြစ်သည်။ 

ပြီးခဲ့တဲ့နှစ်များအတွင်း Huawei ဆိုသည့် ကုမ္ပဏီတစ်ခုကို နည်းပညာပစ္စည်းတစ်မျိုးမျိုး သုံးသူတိုင်း နားယဉ်လာခဲ့သည်။ သာမန်လူတန်းစားများအကြားမှာပါ ထိုကုမ္ပဏီအကြောင်း ဆွေးနွေးပြောဆိုမှုတွေ လုပ်လာကြသည်။ 

အကြောင်းနှစ်ခု ရှိပါသည်။ တစ်ချက်မှာ Huawei သည် ကမ္ဘာ့အမှတ်တံဆိပ်အဖြစ် ကျွန်တော်တို့ လူနေမှုဘဝထဲ အသားတကျစီးဝင်လာခြင်းကြောင့် ဖြစ်သည်။ နောက်တစ်ကြောင်းမှာ အမေရိကန်ဦးဆောင်တဲ့ အနောက်အုပ်စုမှ Huawei ကွန်ရက်ပစ္စည်းများ သုံးပြီး အရေးကြီးတဲ့သတင်းအချက်အလက် စုဆောင်းနိုင်ကြောင်း သံသယနဲ့ ဖိနှိပ်မှု လုပ်ဆောင်လာသည့် သတင်းတွေကြောင့် ဖြစ်သည်။ 

"ခေါင်းဆောင်မှု ၊ အစဉ်အလာနှင့် ဆက်သွယ်နိုင်စွမ်းရှိမှု" စာအုပ်ထဲမှာ Huawei ကို သံနဲ့မဟုတ်တဲ့ ဘယ်လို မာကျောတဲ့ ထောက်တိုင်တွေနဲ့ တည်ဆောက်ထားသလဲဆိုတာ ကွက်ကွက်ကွင်းကွင်း ဖော်ပြထားပါသည်။ စိတ်ဝင်စားဖွယ်ရာ အတွေ့အကြုံလေးတွေကိုလည်း လက်ဆင့်ကမ်းထားသည်။ မှတ်သားနည်းယူဖွယ် အတွေးအခေါ်နဲ့ မျှဝေချက်တွေလည်း ဖတ်ရပါမည်။

ပို၍အရေးကြီးသည်မှာ ဤစာအုပ်ထဲမှ လူတစ်ယောက်အကြောင်းဖြစ်သည်။ ဆိုင်မွန်မာရေး၏ အမှာစာအရ ဆိုပါမူ ဤစာအုပ်သည် ကုမ္ပဏီတစ်ခု၏ဇာတ်လမ်းပင်မဟုတ် ၊ လူတစ်ယောက်ရဲ့ ဇာတ်လမ်းပဲ ဖြစ်ပေလိမ့်မည်။ ဤစာအုပ်ရဲ စာမျက်နှာ ၂၈၄-၂၈၅ မှာ ပြောထားသည့်အတိုင်းဆိုလျင် "

- ကျွန်တော်တို့ သူဌေး ရန်ကျန့်ဖေးသည် နည်းပညာကို ကျွမ်းကျင်တတ်မြောက်ထားသူ တစ်ယောက်ဖြစ်သလော။ တက်ရောက်သူ ခုနှစ်ယောက်က ငြင်းဆိုခဲ့သည်။ 

- သူဌေးသည် ရောင်းအားကို နားလည်သလော။ ခုနှစ်ယောက်က ထပ်မံ ငြင်းဆိုခဲ့ပြန်သည်။ 

- လက်တွေ့ဥပမာတစ်ခုအရ ရန်သည် IPD နှင့် ICS ဆိုသည့် ဝေါဟာရနှစ်ခုကို စာသားအဓိပ္ပါယ်မှ လွဲပြီးအခြားဘာမှ မသိသူဟု စာအုပ်မှာ ဖော်ပြထားသည်။ 

- ဒါဆို ရန့်ကျန့်ဖေးက ဘယ်လိုလူလဲ။

- သူသည် နည်းပညာ အရောင်းကော်ပိုရိတ် စီမံခန့်ခွဲဆိုင်ရာ အတွေးအခေါ်ပညာရှင်ဖြစ်သည်။"


ကျွန်တော်တို့ ဖတ်ရှုရမှာ ရန့်ကျန့်ဖေးရဲ့ တွေးခေါ်ပုံဖြစ်ပါသည်။ သူ့ရဲ့ ခံယူချက်နဲ့ ပြုမူပုံဖြစ်ပါသည်။သူ့ဖြတ်သန်းမှုနဲ့ Huawei ရဲ့ အစဉ်အလာ အကြောင်းဖွင့်ဟချက် ဖြစ်သည်။

Huawei Myanmar ရဲ့ အမှုဆောင်အရာရှိချုပ်ဖြစ်သူ Mr. Ding Zhaoyi အမြင်မှာ "မစ္စတာ ရန့်ကျန့်ဖေးသည် Huawei တည်ထောင်သူ ၊ မောင်းနှင်သူနဲ့ ပုံဖော်ဒီဇိုင်းချတဲ့ ဗိသုကာတစ်ဦး။ ထို့အပြင် ဖခင်တစ်ယောက် ၊ ကြင်နာစိတ်ရှိသည့် အကြီးအကဲ နောက်ပြီး အမျှော်အမြင်ရှိတဲ့ ပညာကြီးသူတစ်ယောက်လည်း ဖြစ်တယ်။" ဟု ဆိုသည်။ 

Huawei ကုမ္ပဏီအတွင်းမှာ စိတ်ဝင်စားစရာကြွေးကြော်သံနဲ့ လက်စွဲဆောင်ပုဒ်တွေ ရှိကြသည်။ "ငါတို့ ရှုံးသွားရင် တစ်ယောက်ကိုတစ်ယောက် ကယ်တင်ဖို့ ရင်ဆိုင်တိုက်ခိုက်ကြမယ်။ ငါတို့နိုင်ရင်တော့ အချင်းချင်းအတွက် ဆုမွန်ကောင်းတောင်းပေးမယ် "။ "မီးရှို့လို့ မလောင်ကျွမ်းနိုင်တဲ့ ငှက်ဟာ ဖီးနစ်ပဲ"

စစ်ထွက်ခါနီး ဗိုလ်ချုပ်တစ်ဦးရဲ့ တပ်ထွက်မိန့်ခွန်းလိုမျိုး ထိုဆောင်ပုဒ်တွေက Huawei ဝန်ထမ်းတွေကို နိုးကြားရဲရင့်စေမှာ အမှန်ပင် ဖြစ်သည်။ ထို့အပြင် Huawei စရိုက် ၊ Huawei ဉာဉ်ဖြစ်စေနိုင်အောင် စွမ်းဆောင်နိုင်ပေလိမ့်မည်။ ထို့ကြောင့်ပင် ကုမ္ပဏီမှာ ၁၀ နှစ်ကျော်ကြာ အလုပ်လုပ်ခဲ့သည့် Mr. Ding Zhaoyi အဖို့ ထိုစကားလုံးတို့သည် ကြွေးကြော်သံ သက်သက်မျှ မဟုတ်တော့။ သူအပါအဝင် သူ့လုပ်ဖော်ကိုင်ဖက်တို့ရဲ့ အပြုအမူနဲ့ တွေးခေါ်နည်းမှာ နက်နဲစွာ အမြစ်တွယ်လာတာကို သတိပြုမိလာသည်ဟု ဝန်ခံသည်။

"Huawei- ခေါင်းဆောင်မှု ၊ အစဉ်အလာနဲ့ ဆက်သွယ်နိုင်စွမ်းရှိမှု စာအုပ်" ကို ဘာကြောင့် ဖတ်သင့်သလဲလို့ မေးရာမှာ Mr. Ding Zhaoyi က ရိုးရိုးလေးပဲ ဖြေသည်။ "ဘာကြောင့် Huawei လို့ ဖြစ်လာခဲ့သလဲ။ Huawei က ဘာဖြစ်လို့ အခုလို ဖြစ်လာအောင် လုပ်နိုင်ခဲ့တာလဲ စိတ်ဝင်စားတယ်ဆိုရင် ဒီစာအုပ်ထဲမှာ ရှာကြည့်ပါ"တဲ့။

"Huawei - Leadership, Culture and Connectivity "စာအုပ်ကို မြန်မာဘာသာပြန်အနေနဲ့ ထုတ်ဖြစ်တဲ့အပေါ် "ငါတို့စာပေ"တည်ထောင်သူ ကိုမြေမှုန်လွင်က "များသောအားဖြင့် ကျွန်တော်က လာပြီးအပ်တဲ့ စာအုပ်တွေ ဘာသာပြန်ထုတ်တာမျိုး မလုပ်ပါဘူး။ကျွန်တော် ကြိုက်မှပဲ ထုတ်တာပါ။ အခုဒီစာအုပ်ကို ဖတ်ကြည့်တဲ့အခါမှာ Huawei ကုမ္ပဏီအကြောင်းမဟုတ်ဘဲ လုပ်ငန်းရှင်တစ်ယောက်ရဲ့ ခေါင်းဆောင်မှုတွေ ၊ စီမံခန့်ခွဲမှုတွေ အထူးသဖြင့် တိန့်ရှောင်ဖိန်လက်ထက် တရုတ်နိုင်ငံရဲ့ အပြောင်းအလဲကာလမှာ စီးပွားရေး ဘယ်လိုလုပ်ခဲ့တယ်ဆိုပြီး ရေးထားတော့ ကျွန်တော်တို့မြန်မာနိုင်ငံမှာလည်း အခုဟာ ဒီမိုကရေစီစနစ်ကို အပြောင်းအလဲကာလ ဖြစ်နေတယ်။ အပြောင်းအလဲကာလမှာ တွေ့ရတဲ့ အခက်အခဲတွေချင်းလည်း သွားတူနေတယ်။ နိုင်ငံတကာက ကုမ္ပဏီကြီးတွေ ဝင်လာတယ်။ ဒီထဲက SME လုပ်ငန်းလေးတွေကို လက်ဝါးကြီးအုပ်သွားတယ်။ အဲ့ဒါမျိုး အဖြစ်အပျက်တွေ သွားတူနေတယ်။ ဒီတော့ ဒီစာအုပ်မျိုး မြန်မာပြန်ရှိထားရင် ဒီက လုပ်ငန်းရှင်ငယ်လေးတွေ နဲ့ လူငယ်တွေ ဖတ်မိတယ်ဆိုရင် အကျိုးများမယ်လို့ ယူဆပြီး စာအုပ်ထုတ်ဖို့ ဆုံးဖြတ်တာပါ။" ဟု ဆိုသည်။

မြန်မာဘာသာပြန် "Huawei - ခေါင်းဆောင်မှု ၊ အစဉ်အလာနှင့် ဆက်သွယ်နိုင်စွမ်းရှိမှု" စာအုပ်ကို ဖတ်ရသည်မှာ စွန့်စားခန့်းဖွင့်သည်နှင့် တူနိုင်သည်။ ဤစာအုပ်ထဲမှ တချို့စာပိုဒ်များ ၊ ပြောကြားချက်များ ၊ အမှတ်ရချက်များနှင့် ဖြစ်စဉ်များသည် ကျွန်တော်တို့ခေါင်းနဲ့ ဝင်ဆောင့်မိနိုင်သည့်အတွက် ဖြစ်သည်။ အနည်းဆုံးတော့ "Huawei - ခေါင်းဆောင်မှု ၊ အစဉ်အလာနှင့် ဆက်သွယ်နိုင်စွမ်းရှိမှု"စာအုပ်သည် ကျွန်တော်တို့ ခေါင်းကို အလုပ်ပေးပြီး ကျွန်တော်တို့ အတွေးကို အခြားတစ်ဖက်မှ ရှုကြည့်တတ်အောင် မီးမောင်းထိုးပေးနိုင်ပါလိမ့်မည်။ 

"ငါတို့စာပေ"တည်ထောင်သူ ကိုမြေမှုန်လွင်ရဲ့ စကားအရ ဒီစာအုပ်တစ်အုပ်လုံး ဖတ်ပြီးသွားရင် အနှစ်အကျဆုံးအချက်တစ်ခုကို တွေ့မည်ဟု ဆိုသည်။ ယင်းမှာ "မကြောက်ဖို့ အဓိက။ အပြောင်းအလဲကာလကို မကြောက်ဖို့။ ရဲဝံ့ရင်ဆိုင်ဖို့ ။ မြှပ်နှံဖို့ ။ ဒါပေမဲ့ စနစ်တကျလည်း ရှိနေဖို့ ။" ဖြစ်သည်ဟု ဆိုသည်။

ဒီမြန်မာဘာသာပြန် "Huawei - ခေါင်းဆောင်မှု ၊ အစဉ်အလာနှင့် ဆက်သွယ်နိုင်စွမ်းရှိမှု" စာအုပ်ကို စာအုပ်ဆိုင်တိုင်းမှာ ဝယ်ယူရရှိနိုင်သလို WE Distribution ကနေတစ်ဆင့် တစ်နိုင်ငံလုံး နေရာအနှံ့မှ မှာယူနိုင်မှာ ဖြစ်ပါတယ်။ 



ဆက်စပ်အကြောင်းအရာများ


Author


က္က