Facebook က အိန္ဒိယနဲ့ပါကစ္စတန်မှ အကောင့်ပေါင်းများစွာ ပါဝင်တဲ့ page နဲ့group တွေကို ဖယ်ရှာခဲ့ကြောင်း ကြေညာလိုက်ပါတယ်။
ဧပြီ ၄ ရက်နေ့က Facebook ရဲ့ Newsroom ကနေ မူဝါဒနဲ့မကိုက်ညီတဲ့ မရိုးဖြောင့်တဲ့ လုပ်ရပ်တွေ လုပ်ဆောင်နေတဲ့ အကောင့်တွေ ၊ pages နဲ့groups တွေကို ဖြုတ်ချခဲ့တာ ဖြစ်တယ်လို့ထုတ်ပြန်ခဲ့တာပါ။ အိန္ဒိယအထွေထွေရွေးကောက်ပွဲမတိုင်ခင်မှာ Facebook ဟာ စုစုပေါင်း page ၊ groups နဲ့အကောင့်ပေါင်း ၁၁၂၆ ခု ဖယ်ရှားခဲ့တာ ဖြစ်ပါတယ်။
Photo: CNN
ဒီလိုဖယ်ရှားတဲ့ အထဲမှာ အိန္ဒိယကွန်ဂရက်ပါတီ INC ရဲ့ IT Cell နဲ့ဆက်စပ်နေတဲ့ အကောင့်နဲ့ pages ပေါင်း ၆၈၇ နဲ့အိန္ဒိယအိုင်တီလုပ်ငန်း Silver Touch တို့နဲ့ဆက်စပ်နေတဲ့ pages ၊ groups နဲ့အကောင့်ပေါင်း ၁၅ ခု ၊ စုစုပေါင်းအကောင့် ၊ group နဲ့page ပေါင်း ၇၀၂ ခုကို ဖယ်ရှားခဲ့တာပါ။ မရိုးဖြောင့်တဲ့ လုပ်ရပ်မှာ ပူးပေါင်း ပါဝင်မှုနဲ့Facebook နဲ့Instagram တို့ကနေ ဖယ်ရှားခဲ့တဲ့အထဲမှာ ပါကစ္စတန်မှ page နဲ့group ပေါင်း ၁၀၃ ခုပါဝင်ခဲ့ပါတယ်။
Facebook ဟာ အရေးယူမှုကို ၄ ပိုင်းခွဲပြီး ဖယ်ရှားခဲ့တာ ဖြစ်ပြီး ပထမ ၊ ဒုတိယနဲ့တတိယပိုင်းမှာ ပါကစ္စတန်နဲ့ဆက်စပ်တဲ့ အကောင့်များ အရေးယူခြင်းနဲ့နောက်ဆုံးပိုင်းမှာ မူဝါဒချိုးဖောက်တဲ့ spam လုပ်တဲ့ အကောင့်နဲ့pages ပေါင်း ၃၂၁ ခု အရေးယူမှုတို့ပါဝင်ခဲ့ပါတယ်။ Facebook အနေနဲ့မူဝါဒနဲ့မကိုက်တဲ့ အကောင့် ၊ groups နဲ့pages တွေကို အလိုအလျောက် စနစ်တွေကနေ ထောက်လှမ်းသိရှိပြီး အရေးယူခဲ့တာလို့လည်း ဒီထုတ်ပြန်ချက်မှာ ဖော်ပြထားပါတယ်။
Photo: Facebook newsroom
မတ်လဆန်းပိုင်းကလည်း Facebook ဟာ နိုင်ငံရေး တင်းမာအောင် လှုံ့ဆော်ဖို့ကြိုးစားတဲ့ ယူကေမှ အကောင့်ပေါင်း ၁၃၇ ခု ဖယ်ရှားခဲ့သလို အီရန်နဲ့အင်ဒိုနီးရှားတို့မှ pages ပေါင်း ၉၀၀ ကျော်ကိုလည်း အရေးယူခဲ့တယ်လို့ဆိုပါတယ်။ Facebook ဟာ ၂၀၁၈ ခုနှစ်ကလည်း အမေရိကန်ကြားဖြတ်ရွေးကောက်ပွဲအကြို အကောင့်တုပေါင်း ၁၁၅ ခု ပိတ်ပင်မှု လုပ်ဆောင်ခဲ့ပါတယ်။