ဖလော်ရီဒါပြည်နယ် ဂျက်ဆန်ဗီးလ်မှာ ရှိတဲ့ ဆေးပညာစင်တာတစ်ခုဟာ COVID-19 စစ်ဆေးရလဒ်တွေကို ပို့ဆောင်ဖို့အတွက် မောင်းသူမဲ့ကားတွေ သုံးနေတယ်လို့ ဆိုပါတယ်။
အမေရိကန်မှာ ပထမဆုံးအကြိမ်အဖြစ် မောင်းသူမဲ့ကားတွေနဲ့ ဆေးပစ္စည်းများ ၊ ကိုရိုနာဗိုင်းရပ်စ် စမ်းသပ်ချက်များ ပို့ဆောင်တာ ဖြစ်တယ်လို့ Mayo Clinic အဖွဲ့အစည်းက ကြေညာပါတယ်။ စင်တာဝင်းအတွင်း မောင်းသူမဲ့ကားပြေးဆွဲမယ့်အစီအစဉ်ကို ဂျက်ဆန်ဗီးလ် သယ်ယူပို့ဆောင်ရေးအာဏာပိုင်အဖွဲ့ JTA နဲ့ မောင်းသူမဲ့ startups ကားကုမ္ပဏီနှစ်ခု ဖြစ်တဲ့ Beep ၊ Navya တို့ ပူးပေါင်းပြီး လုပ်ဆောင်ခဲ့တာ ဖြစ်တယ်လို့ Engadget သတင်းက ဖော်ပြထားပါတယ်။
Mayo Clinic စင်တာဝင်းထဲ မောင်းသူမဲ့ကားသုံးတဲ့ အစီအစဉ်ဟာ ဗိုင်းရပ်စ် ထိတွေ့မှု လျှော့ချဖို့နဲ့ လူနာများအား ကျန်းမာရေးဝန်ထမ်းတွေ ပိုအချိန်ပေး ဂရုစိုက်နိုင်စေဖို့ ရည်ရွယ်ပါတယ်။ မတ်လ ၃၀ ရက်နေ့က စပြီး ကနဦးလမ်းကြောင်းအတိုင်း မောင်းသူမဲ့ဘတ်စ်ငယ် ၄ စင်းနဲ့ နေ့တိုင်း ပြေးဆွဲပေးနေတာပါ။
"ဂျက်ဆန်ဗီးလ် သယ်ယူပို့ဆောင်ရေးအဖွဲ့အတွက် သမိုင်းဝင်အခိုက်အတန့်ပါပဲ" လို့ JTA ရဲ့ CEO နသန်နီယယ်ဖို့ဒ်က ဆိုပါတယ်။" ကျွန်တော်တို့ မိတ်ဖက်တွေ ဖြစ်တဲ့ Beep ၊ NAVYA နဲ့ Mayo Clinic တို့နဲ့အတူ Ultimate Urban Circulator ပရိုဂရမ်ကနေ သုံးနှစ်ကြာ မောင်းသူမဲ့ကားစမ်းသပ်မှုကနေ လေ့လာချက်တွေကို သုံးပြီး အရှေ့မြောက်ဖလော်ရီဒါက အကြပ်အတည်းကို တုန့်ပြန်ဖို့ နည်းပညာကို သုံးခွင့်ရခဲ့ပါတယ်။ COVID-19 စမ်းသပ်မှုကို ပိုပြီး ဘေးကင်းစေခဲ့ပါတယ်။"
Mayo Clinic ဝင်းအတွင်း သုံးတဲ့ မောင်းသူမဲ့ ကားတွေဟာ လမ်းကြောင်းအတိုင်း အလိုအလျောက် မောင်းနှင်နိုင်ပေမယ့် နောက်မှာတော့ လူယာဉ်မောင်းပါ SUV ကားတစ်စင်းက လိုက်ပါ စောင့်ကြပ်ပေးနေရပါတယ်။ Beep ရဲ့ CEO ဂျိုးမိုယဲကတော့ ယာဉ်ကြောပိတ်ဆို့မှုနဲ့ လမ်းကူးသူတွေကြောင့် COVID-19 နမူနာစမ်းသပ်ချက်နဲ့ ဆေးပစ္စည်းတွေ ပို့ဆောင်မှု မထိခိုက်စေဖို့ လူပါ ကားတစ်စင်းနဲ့ နောက်က လိုက်စေတာ ဖြစ်တယ်လို့ The Verge ကို ပြောပါတယ်။
မောင်းသူမဲ့ယာဉ်တွေနဲ့ COVID 19 samples တွေကို ဘေးကင်းအောင် ပို့ဆောင်ခြင်းဟာ ဒီယာဉ်တွေကို လိုအပ်ချိန်မှာ လိုအပ်သလို အသုံးပြုနိုင်ကြောင်း နမူနာကောင်း ဖြစ်လာနိုင်ပါတယ်။