ဖိလစ်ပိုင်ဈေးကွက်ထဲ ရောင်းချသွားမယ့် Huawei ဖုန်းနဲ့တက်ဘလက်တွေမှာ Google နဲ့Facebook apps တွေ သုံးမရတာမျိုး ဖြစ်လာခဲ့မယ်ဆိုရင် ကျသင့်တန်ဖိုးအတိုင်း ငွေပြန်အမ်းသွားမယ်လို့Huawei ဘက်မှ ထုတ်ပြန်ထားပါတယ်။
ငွေအပြည့်ပြန်ပေးသွားမယ့် ဒီအစီအစဉ်ဟာ ဖိလစ်ပိုင်နိုင်ငံမှ နှစ်နှစ်အတွင်း Google နဲ့Facebook app တွေ သုံးမရတဲ့ Huawei ဖုန်းဝယ်သူတွေအတွက် ဖြစ်တယ်လို့ဖိလစ်ပိုင် သတင်းဌာန Revu က ဖော်ပြထားပါတယ်။ ဒီအစီအစဉ်မှာ လက်လီနဲ့လက်ကားအရောင်းကုမ္ပဏီပေါင်း ၃၀ ကျော်နဲ့လည်း ချိတ်ဆက်ထားတယ်လို့ဆိုပါတယ်။
Photo: SCMP
သတင်းမှာတော့ ဖိလစ်ပိုင် ဈေးကွက်ထဲ ရောက်နေတဲ့ Huawei ထုတ် ဖုန်းတွေမှာ Google ရဲ့ Gmail ၊ YouTube ၊ Facebook ၊ Instagram နဲ့WhatsApp တို့သုံးမရတော့ပါက Refund ပြန်ပေးသွားမယ်လို့ဖော်ပြထားပါတယ်။ Huawei အနေနဲ့ဒီ Refund အစီအစဉ်ကို တစ်ခြား ဈေးကွက်တွေမှာ လုပ်ဆောင်မယ် မလုပ်ဆောင်ဘူးဆိုတဲ့ အချက်ကို ပြောမသွားပါဘူး။
ဇွန်လ ၇ ရက်နေ့က Reuters သတင်းမှာ Facebook ကုမ္ပဏီမှ သူ့ရဲ့ ဝန်ဆောင်မှုတွေကို အသစ်ထွက်လာမယ့် Huawei ဖုန်းတွေမှာ pre-install သွင်းမှု ရပ်တော့မယ်လို့ဖော်ပြခဲ့ပါတယ်။ Facebook ရဲ့ ဝန်ဆောင်မှုတွေလည်း လက်ရှိ Huawei ဖုန်းတွေမှာ သုံးနိုင်တယ်ဆိုပေမယ့် နောက်အသစ်ထွက်လာမယ့် Huawei ဖုန်းတွေမှာ Facebook ၊ WhatsApp နဲ့Instagram apps တွေ သွင်းပြီးသား ပါလာမှာ မဟုတ်ဘူးလို့ဆိုပါတယ်။
Photo: NY Times
Huawei ဟာ အမေရိကန်အစိုးရရဲ့ ကုန်သွယ်ရေး ပိတ်ပင်မှုခံရပြီး အမေရိကန်ကုန်သွယ်ဌာနရဲ့ ခွင့်ပြုချက်မရှိဘဲ အမေရိကန်ကုမ္ပဏီများဆီမှ ဝန်ဆောင်မှုနဲ့ပစ္စည်း အစိတ်အပိုင်းများ ဝယ်ယူခွင့် ကန့်သတ်ခံထားရပါတယ်။ Huawei ဟာ Google နဲ့Microsoft တို့ရဲ့ OS စနစ်ကို စမတ်ဖုန်း ၊ တက်ဘလက်နဲ့လက်ပ်တော့တွေမှာ သုံးနေတာ ဖြစ်ပါတယ်။
ကမ္ဘာ့ဒုတိယအကြီး စမတ်ဖုန်းကုမ္ပဏီ Huawei အနေနဲ့အမေရိကန်အစိုးရရဲ့ ကန့်သတ်မှုနဲ့ကြုံပြီးနောက် နိုင်ငံတကာဈေးကွက်မှာ စမတ်ဖုန်းရောင်းချမှု ၄၀% ခန့်လျှော့ချသွားရဖို့ရှိတယ်လို့လည်း သိရပါတယ်။