Google Assistant စနစ်သုံးထားတဲ့ ထုတ်ကုန်တိုင်းမှာ အသုံးပြုနိုင်မယ့် AI နည်းပညာသုံး ဘာသာပြန် feature တစ်မျိုး ထွက်လာပြီ ဖြစ်ပါတယ်။
Google က မိတ်ဆက်လိုက်တဲ့ Interpreter mode ဟာ ကိုယ်ပြောတဲ့ စကားတွေကို ချက်ချင်းဘာသာပြန်ပေးမယ့် စနစ် ဖြစ်ပြီး ဖုန်းတွေအတွက် ဒီဇင်ဘာ ၁၂ ရက်နေ့မှာ စတင်ဖြန့်ချိလိုက်တာပါ။ ဘာသာစကား ၄၄ မျိုးအတွက် တိုက်ရိုက်စကားပြန်အဖြစ် လုပ်ဆောင်ပေးမှာ ဖြစ်ပြီး Hey Google အသံအမိန့်ပေးမှုနဲ့ စတင်ပြီး ကိုယ်ဘာသာပြန်စေလိုတဲ့ စကားသံကို ဘာသာပြန်ခိုင်းလို့ရမှာ ဖြစ်တယ်လို့ The Verge က ဆိုပါတယ်။
Photo: wired
ဥပမာ- ကိုယ်နားမလည်တဲ့ ဂျာမန်စကားကို ဘာသာပြန်ပေးစေချင်တယ်ဆိုရင် Hey Google, Be My German Translator / help me translate German စသည်ဖြင့် အလားတူ အသံအမိန့်ပေးမှုတွေ လုပ်ဆောင်ပြီး ပြောလိုက်ရမှာပါ။ ဒါဆိုရင်တော့ အသံနဲ့အတူ ပြောစကားကိုပါ စာနဲ့ တိုက်ရိုက်ဘာသာပြန်ပြီး ထုတ်ပေးသွားမှာ ဖြစ်ပါတယ်။
Interpreter mode ဟာ သုံးစွဲသူ ပြောပြတဲ့ ဘာသာစကားကို ဘာသာပြန်တဲ့အပြင် တစ်ဘက်က ပြောတဲ့ ဘာသာစကားကိုပါ နှစ်ဘက်ကြားအောင် two-way conversation ပုံစံနဲ့ ဘာသာပြန်ပါတယ်။ဖုန်း screen ပေါ်မှာဆို Assistant ဟာ ကိုယ့်ဘက်က စကားပြန်ပြောစရာမလိုဘဲ တုန့်ပြန်လို့ရစေမယ့် Smart Replies နဲ့ပါ ချိတ်ဆက်ပေးပါတယ်။
ဒီစကားပြန် feature ဟာ ဘင်္ဂလီ ၊ မြန်မာ ၊ ကမ္ဘောဒီးယား(ခမာ) ၊ အင်္ဂလိပ် ၊ ပြင်သစ် ၊ ဟင်ဒီ ၊ ဂျပန် ၊ ထိုင်း ၊ အာရေဗျ ၊ ချက် ၊ ဒိန်းမတ် ၊ ဒတ်ချ် ၊ ဖိလစ်ပိုင် ၊ ဖင်လန် ၊ ဂျာမန် ၊ ဂရိ ၊ ဟန်ဂေရီ ၊ အင်ဒိုနီးရှား ၊ အီတလီ ၊ ကိုရီးယား ၊ မန်ဒရင်း(တရုတ်) ၊ နော်ဝေ ၊ ပိုလန် ၊ ပေါ်တူဂီ ၊ ရိုမေးနီးယား ၊ ရုရှား ၊ ဆလိုဗက်ကီးယား ၊ စပိန် ၊ ဆွီဒင် ၊ တူရကီ ၊ အက်စတိုးနီးယား ၊ ဂူဂျာရတ် ၊ ဂျာဗား ၊ ကန်နာဒါ ၊ မလေယာလန် ၊ မာရတ်တီ ၊ နီပါလီ ၊ အူရဒူ ၊ ဆင်ဟာလား ၊ ဆူဒန် ၊ တမီးလ် ၊ တယ်လူဂူ ၊ယူကရိန်းနဲ့ ဗီယက်နမ် ဆိုပြီး ဘာသာစကား ၄၄ မျိုးကို ပံ့ပိုးပေးထားပါတယ်။
Interpreter mode ဟာ အရင်က Google Home စမတ်စပီကာတွေနဲ့ display တွေမှာပဲ ရနိုင်တဲ့ featureပါ။ အခုချိန်မှာတော့ iOS နဲ့ Android စမတ်ဖုန်း app တွေအဖြစ် ထွက်လာတာ ဖြစ်ပါတယ်။