ပြီးခဲ့တဲ့ ဒုတိယသုံးလပတ်မှာလည်း ဝင်ငွေ ၄ ဆတိုးခဲ့ပါတယ်
Nyein Min Wai

လူသုံးအများဆုံး Videoconferencing app တစ်ခုဖြစ်တဲ့ Zoom ရဲ့ တတိယသုံးလပတ်ဝင်ငွေဟာ ပြီးခဲ့တဲ့နှစ်ကာလတူထက် လေးဆခန့် ရှိလာတယ်လို့ ဆိုပါတယ်။

Zoom ဟာ တတိယသုံးလပတ်အတွင်းမှာ ဝင်ငွေဒေါ်လာ ၇၇၇.၂ သန်း ရခဲ့တယ်လို့ The Verge သတင်းက ဖော်ပြထားပါတယ်။ ဒါဟာ ပြီးခဲ့တဲ့နှစ်ကာလတူထက် ၄ ဆခန့် ဝင်ငွေပိုရရှိတာလည်း ဖြစ်ပါတယ်။ ဒီနှစ်ထဲမှာ နှစ်အလိုက်ဝင်ငွေ ၄ ဆတိုးတာ သုံးလပတ်နှစ်ခုဆက်တိုက် ကြုံတာလည်း ဖြစ်ပါတယ်။



Photo: Express Computer


ပြီးခဲ့တဲ့ ဒုတိယသုံးလပတ်ကာလမှာ ဝင်ငွေအနေနဲ့ Zoom ဟာ ဒေါ်လာ ၆၆၃.၅ သန်း ရရှိခဲ့ပါတယ်။ ၂၀၁၉ ဒုတိယသုံးလပတ်ဝင်ငွေ ဒေါ်လာ ၁၄၅.၈ သန်း ရှိခဲ့တာ ဖြစ်လို့ နှစ်အလိုက်ဝင်ငွေအနေနဲ့ ၄၅၈%အထိ မြင့်တက်လာတာလည်း ဖြစ်ပါတယ်။ အောက်တိုဘာ ၃၁ ရက်နေ့မှာ ကုန်ဆုံးတဲ့ တတိယသုံးလပတ်ဘဏ္ဍာရေးကာလမှာတော့ နှစ်အလိုက် ၃၆၇% ကျော် ပိုရလာခဲ့တာ ဖြစ်ပါတယ်။

Zoom အနေနဲ့ စတုတ္ထသုံးလပတ်မှာလည်း နှစ်အလိုက်ဝင်ငွေ ၄ ဆခန့် ရဖို့ မျှော်လင့်ထားပါတယ်။ ဝန်ထမ်း ၁၀ ဦးကျော်ပဲ ရှိထားတဲ့ ဒီကုမ္ပဏီကို subscribe လုပ်ထားတဲ့ ဖောက်သည်ပေါင်း ၄၃၃၇၀၀ ခန့် ရှိလာပြီ ဖြစ်ပါတယ်။ ဒါဟာ ပြီးခဲ့တဲ့ သုံးလပတ်က ဖောက်သည်ဦးရေ ၃၇၀၂၀၀ ကနေ မြင့်တက်လာတာ ဖြစ်ပါတယ်။

ဝင်ငွေအနေနဲ့ ကုမ္ပဏီကို ဒေါ်လာ ၁ သိန်းနဲ့အထက် ရှာပေးနိုင်မယ့် ဖောက်သည်အရေအတွက်ဟာ အရင်နှစ်ကထက် ၁၃၆% မြင့်တက်ပြီး ၁၂၈၉ ဦးအထိ ရှိလာတယ်လို့ဆိုပါတယ်။ စုစုပေါင်း ဝင်ငွေအနေနဲ့ လာမယ့် ၂၀၂၁ ဘဏ္ဍာရေးနှစ်မှာ ဒေါ်လာ ၂.၅၇၅ ဘီလျံကနေ ဒေါ်လာ ၂.၅၈၀ အထိ တိုးလာဖို့လည်း Zoom က ခန့်မှန်းထားပါတယ်။

Zoom CEO (Photo: Business Insider)


"ကျွန်တော်တို့ ဖောက်သည်တွေနဲ့ လူမှုအသိုင်းအဝိုင်းတွေရဲ့ ဆက်သွယ်ရေးလိုအပ်ချက်တွေကိုပဲ ဆက်လက်အာရုံစိုက်သွားမှာပါ။ Zoom ကို သုံးပြီး ဘယ်နေရာကမဆို အလုပ်လုပ်လို့ရတဲ့ ပုံစံသစ်တွေ ပြောင်းလာတဲ့လူတွေအတွက် ဖြစ်ပါတယ်။" လို့ Zoom တည်ထောင်သူနဲ့ CEO အဲရစ်ယွမ်က ဆိုပါတယ်။

ပြိုင်ဘက်အွန်လိုင်းရုပ်သံအစည်းအဝေးပလက်ဖောင်းတွေ ဖြစ်တဲ့ Microsoft Teams ၊ Google Meet နဲ့ Slack တို့ရဲ့ ပြင်းထန်တဲ့ ပြိုင်ဆိုင်မှုတွေနဲ့ ကြုံနေပေမယ့် Video Conferencing ပလက်ဖောင်းတွေထဲမှာ Zoom ကို လူကြိုက်များနေဆဲ ဖြစ်ပါတယ်။ လာမယ့် သုံးလပတ်အတွက် ဝင်ငွေကိုလည်း ဒေါ်လာ ၈၀၆ သန်းကနေ ၈၁၁ သန်းအကြား ဝင်ဖို့လည်း ကုမ္ပဏီက ခန့်မှန်းထားပါတယ်။



ဆက်စပ်အကြောင်းအရာများ


Author

  • Nyein Min Wai

    Content Writer (Duwun Tech)


က္က