ခေါင်းပေါ်မှာ ဒါမှမဟုတ် အရေပြားပေါ်မှာဖြစ်တတ်တဲ့ အလှအပရေးရာပြဿနာလေးတွေကို လက်ဖက်စိမ်းရေနွေးကြမ်းသုံးပြီး ဖြေရှင်းနိုင်တယ်ဆိုတာကိုကော သင်သိပါသလား။
Su Yee Moe
သင်ဟာ လက်ဖက်စိမ်းရေနွေးကြမ်း (Green Tea) ကိုပုံမှန်သောက်သုံးသူတစ်ယောက်ဖြစ်ပါသလား။ ခေါင်းပေါ်မှာ ဒါမှမဟုတ် အရေပြားပေါ်မှာဖြစ်တတ်တဲ့ အလှအပရေးရာပြဿနာလေးတွေကို လက်ဖက်စိမ်းရေနွေးကြမ်းသုံးပြီး ဖြေရှင်းနိုင်တယ်ဆိုတာကိုကော သင်သိပါသလား။ လက်ဖက်စိမ်းရေနွေးကြမ်းဟာ ဆံသားသန်စွမ်းမှုနဲ့အရေပြားသန့်ရှင်းကျန်းမာမှုတို့အတွက် မရှိမဖြစ်လိုအပ်တဲ့ antioxidant တွေကြွယ်ဝစွာပါဝင်မှုကြောင့် လူသိများထင်ရှားပါတယ်။ လက်ဖက်စိမ်းရေနွေးကြမ်းထဲမှာ amino acid, enzymes, vitamin (B,C & E), magnesium, potassium, folate, polyphenols နဲ့ manganese တို့လည်းပါဝင်ပါသေးတယ်။



လက်ဖက်စိမ်းရေနွေးကြမ်းကိုနေ့စဉ်သောက်သုံးပေးခြင်းဖြင့် ကျန်းမာရေးအရအကျိုးကျေးဇူးတွေအများကြီးကို ရရှိနိုင်သလို အရေပြားပေါ်မှာ ဒါမှမဟုတ် ဦးရေပြားပေါ်မှာ သုတ်လိမ်းပေးခြင်းဖြင့်လည်း အလှအပဆိုင်ရာ အကျိုးကျေးဇူးတွေအများကြီးကို ရရှိနိုင်ပါတယ်။ အခု ကျန်းမာသန်စွမ်းတဲ့ဆံကေသာကို ပိုင်ဆိုင်နိုင်ဖို့ လက်ဖက်စိမ်းရေနွေးကြမ်းနဲ့ပြုလုပ်ထားတဲ့ သဘာဝဆေးမြီးတိုတွေကို ကိုယ်တိုင်ဘယ်လိုပြုလုပ်ရမလဲဆိုတာ လေ့လာကြည့်လိုက်ကြရအောင်။

၁။ လက်ဖက်စိမ်းရေနွေးကြမ်းနဲ့ ခေါင်းလျှော်နည်း

ဗောက်ထခြင်းကိုကာကွယ်ဖို့၊ ဆံပင်ကျွတ်နှုန်းကိုလျှော့ချဖို့နဲ့ အခြားဦးရေပြားဆိုင်ရာပြဿနာတွေအတွက် ဆံသားကာကွယ်ထိန်းသိမ်းပေးတဲ့နည်းလမ်းလေးပဲဖြစ်ပါတယ်။ ဒီနည်းလမ်းလေးကိုအသုံးပြုခြင်းဖြင့် ရေမသန့်ခြင်းနဲ့ဓာတုပစ္စည်းတွေကြောင့် ဆံသားပျက်ဆီးခြင်းမှကာကွယ်ပေးပြီး သင့်ရဲ့ဆံကေသာကို ကျန်းမာသန်စွမ်းစေပါတယ်။ ပြုလုပ်နည်းလေးကတော့ ရေနွေး (၂) ခွက် သို့မဟုတ် (၃) ခွက်စာလောက်မှာ လက်ဖက်စိမ်း လက်ဖက်ခြောက်ထုပ် (၂)ထုပ်ကိုထည့်ပါ။ မိနစ်အနည်းငယ်ကြာအောင်ထားပြီးရင် လက်ဖက်ခြောက်ထုပ်တွေကို ထုတ်ယူလိုက်ပါ။ ပြီးရင် ရေနွေးကို အအေးခံလိုက်ပါ။ သင့်ရဲ့ဆံပင်ကို သင်သုံးနေကျခေါင်းလျှော်ရည်၊ ပျော့ဆေးတို့ကို သုံးပြီးခေါင်းလျှော်ပြီးရင် အအေးခံထားတဲ့လက်ဖက်စိမ်းရည်နဲ့ ဆေးချလိုက်ပါ။ ပြီးရင်ဦးရေပြားကို မိနစ်အနည်းငယ်ကြာ နှိပ်နယ်ပေးပါ။ ပြီးမှ ရေနဲ့ပြန်ဆေးချပေးပါ။ ဆံကေသာကျန်းမာသန်စွမ်းနေစေဖို့ အထက်ပါလုပ်ဆောင်ချက်တွေအတိုင်း တစ်ပတ် (၄) ကြိမ်လောက်လုပ်ပေးပါ။

 

၂။ လက်ဖက်စိမ်းရေနွေးကြမ်းကို Hair Spray အဖြစ်သုံးစွဲနည်း

လက်ဖက်စိမ်းရေနွေးကြမ်းကို hair spray အဖြစ်သုံးစွဲခြင်းက ဆံပင်ကျွတ်ခြင်း၊ ဆံပင် (၂) ခွဖြစ်ခြင်း၊ ဆံသားခြောက်ကပ်ခြင်း နဲ့ဦးရေပြားယားယံခြင်းတို့လို ဆံကေသာဆိုင်ရာပြဿနာတွေအတွက် ဖြေရှင်းနည်းတစ်မျိုးပဲဖြစ်ပါတယ်။ လက်ဖက်စိမ်းရေနွေးကြမ်းထဲမှာ panthenol လို ကောင်းမွန်တဲ့ အက်ဆစ်ဓာတ်တွေအပြင် ဆံသားကောင်းမွန်ခြင်းကိုအထောက်အကူပြုတဲ့ အာဟာရဓာတ်တွေလည်း ပါဝင်တော့ ဆံသားတွေကိုပိုမိုခိုင်မာစေပြီး ဆံပင် (၂)ခွဖြစ်ခြင်းကိုလည်း တားဆီးနိုင်ပြီပေါ့။ ပြုလုပ်နည်းလေးကတော့ လက်ဖက်စိမ်းရေနွေးကြမ်း (၂) ခွက်စာလောက်ကြိုချက်ပါ။ ပြီးရင် Spray ဘူးအလွတ်တစ်လုံးထဲကို လောင်းထည့်ပါ။ ပြီးတာနဲ့ လက်ဖက်စိမ်းရေနွေးကြမ်းကို သင့်ဆံသားပေါ်မှာအမြစ်ကနေ ဆံပင်ထိပ်ဖျားထိ စိမ့်ဝင်အောင်ပက်ဖြန်းပေးပါ။ ပြီးရင် ဆံပင်ကို ညင်ညင်သာသာ နှိပ်နယ်ပေးပါ။ မိနစ် (၂၀) (၃၀) လောက် ကြာအောင် ခဏထားပြီးမှ ပုံမှန်ခေါင်းလျှော်ရည်ကိုသုံးပြီး လျှော်ချလိုက်ပါ။ လက်ဖက်စိမ်းရနံ့လေးကိုမှ ကြိုက်တယ်ဆိုရင်တော့ လက်ဖက်စိမ်းရနံ့ပါတဲ့ခေါင်းလျှော်ရည်ကိုသုံးစွဲနိုင်ပါသေးတယ်။



၃။ လက်ဖက်စိမ်းရေနွေးကြမ်းကို ဗောက်ပျောက်ဆေးအဖြစ်သုံးစွဲနည်း

ဒီအိမ်သုံးပစ္စည်းလေးတွေနဲ့အလွယ်တကူလုပ်လို့ရတဲ့ဆေးမြီးတိုလေးကတော့ ခေါင်းပေါ်ကဗောက်တွေကို ဖယ်ရှားပေးနိုင်ပြီး ခြောက်သွေ့ယားယံတဲ့ဦးရေပြားကို သက်သာပျောက်ကင်းစေပါတယ်။ နောက်ပြီး သင့်ရဲ့ဆံပင်ကိုနက်မှောင်သန်စွမ်းစေပါသေးတယ်။ ပြုလုပ်နည်းကတော့ ဒယ်အိုးတစ်အိုးထဲကို ရေ (၁)ခွက်စာလောက်ထည့်ပြီးအပူပေးလိုက်ပါ။ ပြီးရင်လက်ဖက်စိမ်းအရွက် စားပွဲတင်ဇွန်း (၂)ဇွန်းစာလောက်ကို သဘာဝအုန်းဆီ စားပွဲတင်ဇွန်း (၃) (၄) ဇွန်းရယ်၊ သံပုရာသီးတစ်ခြမ်းရယ်နဲ့ ရောမွှေပြီး ပွက်ပွက်ဆူနေတဲ့ရေနွေးထဲကို လောင်းချပေးလိုက်ပါ။ (၄) မိနစ်ခန့်အပူပေးပြီး မီးဖိုကိုပိတ်လိုက်ပါ။ ပြီးရင် ရောမွှေထားတဲ့အရည်ကို အအေးခံလိုက်ပါ။ ပြီးရင် ဂွမ်းလုံးလေးနဲ့ ပေါင်းခံရည်ကိုတို့ပြီး ဦးရေပြားတစ်ခုလုံးနှံ့စပ်အောင်သုတ်လိမ်းပေးလိုက်ပါ။ ဦးရေပြားကို မိနစ်အနည်းငယ်ကြာနှိပ်နယ်ပေးပြီး တစ်နာရီခန့်ကြာအောင် ထားပေးပါ။ ပြီးရင်သင်သုံးနေကျ ပုံမှန်ခေါင်းလျှော်ရည်၊ ပျော့ဆေးတွေနဲ့ခေါင်းလျှော်နိုင်ပါပြီ။ အထက်ပါအတိုင်း တစ်လ (၃) (၄) ကြိမ်ပြုလုပ်ပေးမယ်ဆိုရင် သင့်ခေါင်းပေါ်မှာ သောင်းကျန်းနေတဲ့ဗောက်တွေ ကင်းစင်သွားမှာပါ။



၄။ လက်ဖက်စိမ်းရေနွေးကြမ်းကို ဆံပင်ပျော့ဆေးအဖြစ်သုံးနည်း

လက်ဖက်စိမ်းနဲ့ပြုလုပ်တဲ့ပျော့ဆေးဟာ သင့်ရဲ့ဦးရေပြားကိုစိုပြေစေပြီး သင့်ရဲ့ဆံကေသာကို တောက်ပြောင်သန်စွမ်းစေပါတယ်။ ပုံမှန်သာ သုံးစွဲပေးမယ်ဆိုရင် ဆံပင်ကျွတ်ခြင်းကိုလျော့နည်းစေပြီး ဆံကေသာကျန်းမာသန်စွမ်းမှုကိုလည်းထိန်းညှိပေးပါတယ်။ ပြုလုပ်နည်းကတော့ ရေနွေးပူပူတစ်ခွက်ထဲမှာ လက်ဖက်စိမ်း လက်ဖက်ခြောက်ထုပ် (၂)ထုပ်ကို ထည့်စိမ်ထားပေးပါ။ (ဒါမှမဟုတ် လက်ဖက်စိမ်း အရွက် စားပွဲတင်ဇွန်း (၃)၊ (၄) ဇွန်းစာလောက်ကို ရေ (၁) ခွက်နဲ့ရောပြီးကြိုချက်ပါ။) ပြီးရင် ပျားရည်တစ်ဇွန်းနဲ့ အုန်းဆီတစ်ဇွန်းစီကို ရေနွေးခွက်ထဲကိုရောမွှေလိုက်ပါ။ ပါဝင်ပစ္စည်းတွေကို သမသွားအောင်ရောမွှေပြီး ဦးရေပြားပေါ်နဲ့ဆံပင်ပေါ်မှာနှံ့စပ်အောင်လိမ်းပေးပါ။ ပြီးရင်လည်း ဦးရေပြားနဲ့ဆံသားကိုမိနစ်အနည်းငယ်ကြာအောင် နှိပ်နယ်ပေးလိုက်ပါဦး။ နှိပ်နယ်ပြီးရင် (၄၅) မိနစ်လောက် ဒီတိုင်းထားပေးလိုက်ပါ။ နောက်ဆုံးမှာတော့ သင့်ရဲ့ဆံပင်ကိုရေနွေးနွေးလေးနဲ့ သင်သုံးနေကျ ခေါင်းလျှော်ရည်ကိုသုံးပြီး ဆေးချလို့ ရပါပြီနော်။ ဒီအိမ်လုပ်ပျော့ဆေးလေးကိုပုံမှန်သာသုံးပေးမယ်ဆိုရင် ဦးရေပြားခြောက်သွေ့ခြင်း၊ ဦးရေပြားယားယံခြင်းနဲ့ ဆံပင်ကျွတ်ခြင်းတွေကို ပျောက်ကင်းစေနိုင်မှာပါနော်။

လက်ဖက်စိမ်းရဲ့ကောင်းကျိုးတွေကတော့ အများကြီးပါပဲ။ ပျိုမေတို့ရဲ့ဆံကေသာလေးတွေနက်မှောင်သန်စွမ်းနေစေဖို့ လက်ဖက်စိမ်းနဲ့ ပြုလုပ်တဲ့ အိမ်သုံးဆေးနည်းလေးတွေကို မျှဝေပေးလိုက်ပါတယ်နော်။ အဆင်ပြေကြမယ်လို့လည်း မျှော်လင့်ပါတယ်။

Source: diyremedies


Author


က္က