Su Yee Moe

အသက် ၉၁ နှစ်အရွယ် ဘွားဘွားတစ်ယောက်ဟာ ကလေးတွေကို ဝက်ဝံရုပ်လေးတွေ လက်ဆောင်ပေးနေပါတယ်။ ကိုယ်တိုင် လက်နဲ့ထိုးထားတဲ့ သိုးမွေးရုပ်လေးတွေကို ဖြစ်ရပ်ဆိုးနဲ့ကြုံခဲ့ရတဲ့ ကလေးတွေအတွက် ပေးခဲ့တာ အရုပ်ပေါင်း ၈၀၀၀ ကျော်ပါပြီ။

pri_66817643.jpg 

သူမနာမည်က Phyllis Reeve လို့ ခေါ်ပါတယ်။ ဆယ်စုနှစ် ၃ ခု ကြာ ပရဟိတအလုပ်တွေကို လုပ်နေခဲ့တဲ့အတွက် ဘက်ကင်ဟမ်နန်းတော်ကတောင် သူမကို ဖိတ်ကြားခဲ့ပါသေးတယ်။ လစဉ်လတိုင်းမှာ Phyllis နဲ့ သူမရဲ့သမီး Janet Young တို့ဟာ ဝက်ဝံရုပ်တွေထည့်ထားတဲ့ အိတ်ကြီးတစ်လုံးကို Teddies for Tragedies ပရဟိတလုပ်ငန်းကို သွားရောက်လှူဒါန်းကြပါတယ်။ အဲ့ဒီအဖွဲ့ကနေတစ်ဆင့် ကမ္ဘာတစ်ဝန်းက ကလေးတွေကို ပြန်လှူပေးပါတယ်။

bear-necessitie-94334-1024x681.jpg 

တရုတ်၊ ဘယ်လ်ဂျီယံ၊ အိုင်ယာလန် စတဲ့ နိုင်ငံအသီးအသီးကို ရောက်ရှိသွားတဲ့ အရုပ်လေးတွေဟာ သဘာဝဘေးဒုက္ခကပ်ဆိုးနဲ့ အကြမ်းဖက်တိုက်ခိုက်ခံရမှုတွေ ကြုံခဲ့ရတဲ့ ကလေးတွေရဲ့လက်ထဲကို ရောက်သွားတယ်။ " ကျွန်မက သူရဲကောင်းတစ်ယောက်တော့ မဟုတ်ပါဘူး။ သာမာန် အလုပ်လုပ်တဲ့ မိန်းမတစ်ယောက်ပါ။ အသက် ၆၀ ပြည့်တော့ ပင်စင်ယူလိုက်တယ်၊ ပြီးတော့ ပရဟိတအတွက် စေတနာ့လုပ်အားရှင် လုပ်နေတာပါပဲ" လို့ ကိုယ့်ကိုယ်ကိုယ်နှိမ့်ချပြောတယ်။

ဝက်ဝံရုပ်တိုင်းမှာ အရောင် ၃ ရောင်စီ ပါပါတယ်။ Pattern ကိုတော့ ပရဟိတအဖွဲ့က ပေးပါတယ်။ ဝက်ဝံရုပ်တိုင်းက ပြုံးနေဖို့လိုပြီး မျက်လုံးလိုမျိုး အစိတ်အပိုင်းတွေဟာ အန္တရာယ်မရှိရဘူး။ ကလေးတွေအတွက် လုံခြုံစိတ်ချရဖို့ လိုပါတယ်။ Phyllis က လူတွေလှူထားတဲ့ ငှက်မွေးဂွမ်းကပ်တွေကို အိမ်ကိုယူသွားပြီး လျှော်ဖွပ်ကာ အရုပ်လေးတွေဖြစ်အောင် ပြန်လုပ်လိုက်တာ ဖြစ်ပါတယ်။

5a69a4232d00004900942c0e.jpeg 

ကြင်နာတတ်တဲ့ နှလုံးသားပိုင်ရှင် Phyllis ကို ဗြိတိန်နန်းတော်က BEM ဆုလည်း ပေးအပ်ခဲ့ပါသေးတယ်။ လွန်ခဲ့တဲ့ ၂၂ နှစ်ကစပြီး ခုချိန်ထိအောင် ဝက်ဝံရုပ်လေးတွေ ထိုးနေတုန်းပါပဲ။ သူမကြောင့် ကလေးတွေရဲ့နေ့ရက်တွေကို တောက်ပစေတဲ့အတွက် ကြည်နူးပျော်ရွှင်ရပါတယ်လို့လည်း Phyllis က ဆိုပါတယ်။

Source : Huff Post


Duwun ဒီဂျစ်တယ် နေ့စဉ်သတင်းစာ

သင့် အီးလ်မေး ကနေ နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ ဒီနေရာမှာ စာရင်းသွင်းလိုက်ပါ။


Copyright © 2019 Duwun.

Privacy Policy | About Us | Jobs

က္က