အမျိုးသမီးတစ်ယောက်အနေနဲ့ နေ့စဉ်ဘဝမှာ ကြုံတွေ့နေရတဲ့ အဆင်မပြေမှုတွေထဲက ပြင်ဆင်စေချင်တာ ဘာဖြစ်မလဲ
Su Yee Moe

ဖေ့စ်ဘုတ်ပေါ်မှာ #ItsNotOK လို့ ရေးထားတဲ့ စာရွက်လေးကိုကိုင်ပြီး ဓာတ်ပုံရိုက်ကာ တင်ထားတဲ့ပုံတွေကို သတိထားမိကြလား မဒီလေးတို့ရေ။ ဒီလှုပ်ရှားမှုဟာ မြန်မာမိန်းကလေးတွေအတွက် ရည်ရွယ်ပါတယ်။ မြန်မာအမျိုးသမီးတွေရဲ့ နေ့စဉ်လူမှုဘဝမှာ ခွဲခြားဆက်ဆံမှုတွေ၊ ကိုယ်ထိလက်ရောက်စော်ကားမှုတွေ၊ လှောင်ပြောင်မှုတွေနဲ့ အနိုင်ကျင့်မှုတွေကို ကြုံနေရပါတယ်။ အဲ့ဒီအတွက် ဒီလှုပ်ရှားမှုကို စတင်လိုက်တာပါ။

27913117_10213916141811399_7256847420655672441_o.jpg 

ဖေဖော်ဝါရီ ၁၅ ရက်နေ့က "Respect Her - သူမကိုလေးစားပါ" အမည်နဲ့ ဖေ့စ်ဘုတ်စာမျက်နှာတစ်ခု စတင်လိုက်ပါတယ်။ ဒီစာမျက်နှာကို Myanmar Art Social Project က စတင်လိုက်တာဖြစ်ပြီး UNFPA က ကူညီပံ့ပိုးပေးတယ်လို့ သိရပါတယ်။ " နေ့စဉ်ဘဝမှာ တွေ့နေရတဲ့ အမျိုးသမီးတွေရဲ့ အဆင်မပြေမှုတွေကို express လုပ်တဲ့အနေနဲ့ ဒီ #ItsNotOK ကမ်ပိန်းလေးကို လုပ်ဖြစ်တာ ဖြစ်ပါတယ်။ အခုလာမယ့် နိုင်ငံတကာအမျိုးသမီးများနေ့ကို ဆင်နွှဲတဲ့အနေနဲ့ ဒီကမ်ပိန်းလေးကို လုပ်ဖြစ်တာပါ။ အွန်လိုင်းမှာရော offline အနေနဲ့ပါ လုပ်နေပါတယ်။ နေ့စဉ်ဘဝမှာ ကြုံတွေ့နေရတဲ့ အမျိုးသမီးတွေနဲ့ပတ်သက်တဲ့ နှောင့်ယှက်ခံနေရမှုကို လူတွေသတိထားမိလာအောင် public performence တွေ လုပ်နေပါတယ်" လို့ Respect Her ကမ်ပိန်းကို ဦးဆောင်နေသူ မစန္ဒီက ပြောပါတယ်။

27993249_1619014068193552_6912469861826327405_o.jpg 

Offline လှုပ်ရှားမှုအနေနဲ့ ဖေဖော်ဝါရီ ၁၁ ရက်နေ့ ညနေ ၅ နာရီက ပြည်လမ်းကန်ဘောင်၊ အင်းယားပန်းခြံအတွင်းမှာ အမျိုးသမီးတွေ လိင်ပိုင်းဆိုင်ရာစော်ကားခံရမှုကို ဖော်ပြတဲ့ သရုပ်ပြမှုတစ်ခုကိုလည်း ပြုလုပ်သွားခဲ့ပါတယ်။ ဘက်စ်ကားစီးရင် မြန်မာအမျိုးသမီးတွေအနေနဲ့ လိင်ပိုင်းဆိုင်ရာ ထိပါးမှုတွေကို ကြုံတွေ့နေရလေ့ရှိပြီး ဒီလို အဖြစ်အပျက်တွေ လျော့ပါးလာအောင် ရည်ရွယ်ချက်နဲ့ ပြုလုပ်ခြင်းဖြစ်တယ်လို့ သိရပါတယ်။ ပွဲကိုလာရောက်သူတွေနဲ့ အမေးအဖြေများပြုလုပ်ခဲ့ပြီး တက်ကြွလှုပ်ရှားသူတွေနဲ့အတူ performance art ပြုလုပ်ခဲ့တယ်လို့ သူမကိုလေးစားပါ ဖေ့စ်ဘုတ်စာမျက်နှာမှာ ဖော်ပြထားပါတယ်။

28056466_196097181143029_6301071047696328194_n.jpg 

Its Not OK လှုပ်ရှားမှုကို အမျိုးသမီးတွေကလည်း ပါဝင်နေကြပါတယ်။ သူတို့ရဲ့ ဖေ့စ်ဘုတ်ပေါ်မှာ #Its Not OK ဆိုတဲ့ စာတမ်းကို ကိုင်ဆောင်ကာ နေ့စဉ်ဘဝမှာ အဆင်မပြေတဲ့ အကြောင်းအရာတွေကို ရေးသားဖော်ပြနေကြတာ တွေ့ရပါတယ်။ အမျိုးသမီးတွေနဲ့အတူ အမျိုးသားတွေကလည်း ဒီလှုပ်ရှားမှုကို ထောက်ခံပါဝင်ကြတာတွေလည်း ရှိပါတယ်။ မဒီတို့ အမျိုးသမီးလေးတွေအနေနဲ့လည်း Its Not OK မှာ ပါဝင်နိုင်ပါတယ်။

28061555_1617175168377442_7443610068457235822_o.jpg 

#ItsNotOK စာသားကိုရေးပြီး စာရွက်ကိုကိုင်တာ ဓာတ်ပုံရိုက်ရပါမယ်။ ပြီးရင် အဲ့ဒီပုံကို ဖေ့စ်ဘုတ်ပေါ်မှာ #ItsNotOK #အဆင်မပြေဘူး hashtag နှစ်ခုနဲ့အတူ အမျိုးသမီးတစ်ဦးအနေနဲ့ လက်ရှိလူမှုအဖွဲ့အစည်းမှာ အဆင်မပြေတဲ့အရာတွေထဲကမှ ကိုယ်ပြင်စေချင်တဲ့အရာကို တင်ရုံပါပဲ။

Photos : Respect Her Facebook Page


က္က