မိခင်တစ်ယောက်အနေနဲ့ ဘယ်လိုနည်းလမ်းတွေနဲ့ ကိုယ့်ကိုယ်ကိုယ် ယုံကြည်မှုပြန်တည်ဆောက်ကြမလဲ ဆိုတဲ့အချက်ကလည်း အရေးကြီးတဲ့အချက်ပဲ ဖြစ်ပါတယ်။
May Thaw

အမျိုးသမီးတစ်ယောက်ရဲ့ဘဝဟာ ကလေးမီးဖွားပြီးချိန်နောက်ပိုင်းမှာ အပြောင်းအလဲတွေ အများကြီးရှိတတ်ပါတယ်။ ကိုယ့်ရင်သွေးလေးကြောင့် ကိုယ့်မှာပျော်ရွှင်ပီတိဖြစ်ရသလို တစ်ဖက်မှာလည်း စိတ်ပိုင်းဆိုင်ရာရော၊ ရုပ်ပိုင်းဆိုင်ရာတွေမှာပါ အပြောင်းအလဲစတင်ခံစားရတာကြောင့် ကိုယ့်ကိုယ်ကိုယ်ယုံကြည်မှု ပြန်လည်တည်ဆောက်ဖို့ ခက်ခဲတဲ့အချိန်တစ်ခုပဲဖြစ်ပါတယ်။

ဒီလိုအချိန်တွေမှာ ဘော်ဒီအလေးချိန်တွေတိုးလာသလို၊ အကြောပြတ်ရာတွေ၊ အသားအရေက တင်းတင်းရင်းရင်း မရှိတော့တာတွေ စတာတွေက အမျိုးသမီးတစ်ယောက်အတွက် ကိုယ့်ကိုယ်ကိုယ် ယုံကြည်မှုလျော့သွားစေတဲ့အပိုင်းတစ်ခုပေါ့။ ယုံကြည်မှုမရှိတော့တဲ့အခါ အပြင်လူတွေနဲ့ဆက်ဆံရေးမှာ အဆင်မပြေမှုတွေ ရှိလာသလို ကိုယ့်ရဲ့စိတ်အခြေအနေကပါ ဆိုးရွားလာနိုင်တာမျိုးတွေ ရှိလာပါတယ်။

အဲ့ဒီအကြောင်းကို မိခင်တစ်ယောက်လည်းဖြစ်သလို မိခင်တွေအနေနဲ့ ကိုယ့်ရဲ့သားသမီးကို ပြုစုစောင့်ရှောက်ရမှာ သိသင့်သိထိုက်တဲ့ ဗဟုသုတတွေကို မျှဝေပေးနေသူ ဘလော့ကာ မာမီပန်ကတော့

“ကလေးမမွေးခင်ကတည်း စိတ်အနိမ့်အမြင့် အတက်အကျများတတ်တာ အမျိုးသမီးတွေရဲ့သဘာဝပါ။ အပျိုကတည်းက ဓမ္မတာလာခါနီးဆို စိတ်ဆတ်၊စိတ်တို၊ဝမ်းနည်း၊စိတ်ပျက်တာတွေ ဖြစ်လေ့ဖြစ်ထရှိတဲ့ အမျိုးသမီးတစ်ယောက်ဟာ ကိုယ်ဝန်ဆောင်ချိန်နဲ့ ကလေးမီးဖွားပြီးချိန်တွေကျရင် ပိုဆိုးဆိုးဝါးဝါး ခံစားတတ်ကြပါတယ်။ ကလေးမီးဖွားပြီးချိန် ရုပ်ပိုင်းဆိုင်ရာအရ အားလုံးပြောင်းလဲသွားတာတွေကြောင့် ၀ိတ်အတက်အကျ၊ စိတ်ပိုင်းဆိုင်ရာအလိုမကျမှုတွေ၊ အားငယ်မှုတွေ တွဲပါလာတဲ့အခါ စိတ်ကျမှုပိုဖြစ်ပါတယ်။ ကျွန်မကိုယ်တိုင်လည်း ကြုံတွေ့ခဲ့ပါတယ်။ ကလေးအထာမနပ်တာတွေ၊ အကူမရှိတာတွေ၊ ဘာသာစကားအခက်အခဲစတာတွေကြောင့် ငိုပဲငိုနေခဲ့ရဖူးပါတယ်။ ကိုယ့်ကိုယ်ကိုယ် အသုံးမကျဘူးလို့ချည်း ရာခိုင်နှုန်းပြည့်ခံစားခဲ့ရတာပါ။ ဒါတွေကို ဘာနဲ့ကျော်ဖြတ်ခဲ့သလဲလို့မေးလာရင်တော့ စိတ်အသစ်တစ်ခုပြောင်းပြီး ကျော်ဖြတ်ခဲ့တယ်လို့ ပြောရပါလိမ့်မယ်” လို့ သူမရဲ့အကြောင်းကို ပြောပြသွားခဲ့ပါတယ်။

နောက်ထပ်မိခင်တစ်ဦးလည်းဖြစ်သလို Bare Babi product ရဲ့ Assistant GM တစ်ဦးလည်းဖြစ်တဲ့ မနန်းစံမွမ်းခေးကတော့ အမျိုးသမီးတစ်ယောက်၊ မိခင်တစ်ယောက်အနေနဲ့ ကိုယ့်ကိုယ်ကိုယ်ယုံကြည်မှုရှိဖို့ ဘယ်လောက်အရေးကြီးသလဲ ဆိုတဲ့အကြောင်းကို ခုလိုဆိုပါတယ်။

“အပျိုပဲဖြစ်ဖြစ်၊ မိခင်တယောက်ပဲဖြစ်ဖြစ် ကိုယ့်ကိုယ်ကိုယ်ယုံကြည်မှုရှိနေဖို့က အလွန်အရေးကြီးပါတယ်။ ကိုယ့်ကိုယ်ကိုယ်တောင် မယုံကြည်ရင် အခြားလူတွေကိုယ့်ကို ယုံကြည်စေနိုင်ဖို့ ခက်ခဲလွန်းပါတယ်။ ခြောက်လ၊ တစ်နှစ်က ခန္ဓာကိုယ်အပြောင်းအလဲနဲ့ ဟော်မုန်းအပြောင်းအလဲတွေကြောင့် စိတ်ဓာတ်ကျတာ၊ အားငယ်တာတွေဖြစ်တတ်မို့ ဒါတွေကို ကြိုတင်သိထားပြီး ကိုယ့်ကိုယ်ကိုယ် အမြဲ သတိထားနေဖို့လိုအပ်ပါတယ်” တဲ့။

မနန်းစံမွမ်းခေးရဲ့ စကားကို မာမီပန်ကလည်း အပြည့်အဝထောက်ခံထားပြီး မိခင်တစ်ယောက် ကိုယ့်ကိုယ်ကိုယ်ယုံကြည်မှုရှိခြင်းမရှိခြင်းနဲ့ ကိုယ့်ကလေးရဲ့အပြုအမူ၊ အနာဂတ် ဘယ်လိုဆက်နွယ်နေသလဲဆိုတာကိုတော့ “မိခင်တစ်ယောက်အနေနဲ့ ယုံကြည်မှုရှိခြင်း မရှိခြင်းဟာ သားသမီးရဲ့ အနာဂတ်နဲ့ တိုက်ရိုက်အချိုးကျပါတယ်။ အမေက ရဲရင့်တည်ကြည်ရင် ကလေးက အမေကို အတုယူပြီး ရဲရင့်တည်ကြည်မှာပါ။ အမေက ပျော်ပျော်နေတတ်ရင် ကလေးကလည်း ပျော်ရွှင်တတ်တဲ့ အကောင်းမြင်စိတ်ရှိတဲ့ ကလေးအနေနဲ့ ကြီးပြင်းလာမှာပါ။ အဲ့ဒီလို မဟုတ်ပါဘဲ အမေက အရာရာကို ယုံကြည်မှုမရှိဘူးဆိုရင် ကလေးကလည်း ကြောက်တတ်၊ ပြန်မပြောပြတတ်ဘဲ ကြီးပြင်းလာတတ်ပါတယ်။ ကလေးတွေရဲ့ အားအကျဆုံးလူ ဘယ်သူလဲ မေးရင် အမေဖြစ်နေတာ များပါတယ်။ သမီးလေးဆိုရင် အမေ့လိုဖြစ်ချင်တယ်၊ သားဆိုရင် အမေ့လို လက်တွဲဖော်လိုချင်တယ်။ ဒါကြောင့် အမေရဲ့ ယုံကြည်မှုက အရမ်းကို အရေးပါပါတယ်။ အမျိုးသမီးတစ်ယောက် (မိခင်မဟုတ်သည့်တိုင်) ဟာ ကိုယ့်ကိုယ်ကိုယ် ယုံကြည်မှုအပြည့်နဲ့ နေထိုင်ရှင်သန်နေချိန်ဟာ အလှပဆုံး အချိန်ပါ” လို့ မာမီပန်က ဖြည့်စွက်ပြောပေးသွားပါတယ်။

ကလေးမီးဖွားပြီးချိန် ယုံကြည်မှုပြန်တည်ဆောက်ချိန်ဟာ တစ်ယောက်နဲ့တစ်ယောက် မတူနိုင်သလို တချို့က ၆လလောက်နဲ့ပြန်အဆင်ပြေသွားတာမျိုး ရှိတတ်ပေမယ့် တချို့မိခင်တွေကတော့ သုံးနှစ်ဝန်းကျင်လောက်ထိ ကြာတတ်တယ်လို့ သိရပါတယ်။ ဒီတော့ မိခင်တစ်ယောက်အနေနဲ့ ဘယ်လိုနည်းလမ်းတွေနဲ့ ကိုယ့်ကိုယ်ကိုယ် ယုံကြည်မှုပြန်တည်ဆောက်ကြမလဲ ဆိုတဲ့အချက်ကလည်း အရေးကြီးတဲ့အချက်ပဲ ဖြစ်ပါတယ်။ နည်းလမ်းတွေ အနေနဲ့ ပြောရမယ်ဆိုရင်တော့

(၁) ကိုယ့်ကိုယ်ကိုယ်ဂရုစိုက်ပါ။

ကလေးကို နံပါတ်တစ်နေရာမှာထားပြီး ကိုယ့်ကိုယ်ကိုယ်ကျတော့ ဖြီးလိမ်းပြင်ဆင်ဖို့၊ အလှပြင်ဖို့၊ ရေကိုအချိန်ကြာကြာလေး ချိုးဖို့၊ အဝတ်အစားဝယ်ဖို့၊ ဆံပင်သွားညှပ်ဖို့အချိန်တောင် မပေးတာမျိုးမလုပ်ပဲ ကိုယ့်အတွက်ကိုယ်လည်း အချိန်ပေးပါ။ ဒီအချက်ကလည်း ကိုယ့်ကိုယ်ကိုယ်ယုံကြည်မှုပြန်တည်ဆောက်တဲ့အခါ အရေးအကြီးဆုံးအချက်ပါပဲ။

(၂) ကိုယ်ရည်ကိုယ်သွေးနဲ့ပတ်သက်ပြီး ကိုယ့်ရဲ့အားသာချက်တွေကို အမြဲတွေးပါ။

ကလေးမီးဖွားပြီးတဲ့နောက်မှာ ငါဟာ ဘာမှအသုံးမကျတဲ့သူတစ်ယောက်ပါလားဆိုတဲ့ အတွေးမျိုးတွေ ဝင်လာတတ်ပါတယ်။ ဒါပေမယ့် ဖြစ်နိုင်ရင် နေ့တိုင်း ကိုယ့်ကိုယ်ကိုယ် ကောင်းတာရော၊ ဆိုးတာပါ ပြန်သုံးသပ်ကြည့်ပါ။ အဆိုးချည်းပဲမရှိပါဘူး။ ကိုယ့်မှာ ကောင်းတဲ့အချက်တွေ အများကြီးရှိနေပါလားဆိုတာ သိလာပါလိမ့်မယ်။ အရင်ကလိုပဲ ကိုယ်ဟာ အသုံးဝင်ဆဲ ကလေးလေးရဲ့ မေမေဆိုတာ သိအောင်ကြိုးစားပါ။ ကိုယ့်စိတ်ကနေ တစ်ခါတလေ ဒါမှမဟုတ်အမြဲလိုလို မကောင်းတဲ့အတွေးမျိုးတွေ ရှိနေရင် ဒါတွေကို ဖယ်ထုတ်ပစ်ဖို့ ကြိုးစားရင် အကောင်းမြင်စိတ်လေးနဲ့ အရာရာကိုကြည့်ကြည့်ပါ။

(၃) တခြားလူတွေနဲ့ ကိုယ့်ကိုယ်ကိုယ်မနှိုင်းယှဉ်ပါနဲ့။

ကိုယ့်လိုပဲ သူကျတော့ ကလေးလေးမွေးထားပေမယ့် လှလိုက်တာ၊ အပြင်တွေထွက်ပြီး အချိန်ဖြုန်းနိုင်တယ်၊ ကိုယ့်မှာတော့ တစ်ရက်တစ်ရက် ကလေးနဲ့နှစ်ပါးသွားနေရတာ အိမ်သာတောင် မနည်းပြေးတက်ရတယ်ဆိုတာမျိုး တခြားလူနဲ့ကိုယ့်ကိုယ်ကိုယ် မနှိုင်းယှဉ်ပါနဲ့။ တခြားမိခင်တွေမှာလည်း သူ့အခက်အခဲနဲ့သူ ရှိကြပါတယ်။ ဒါကိုကိုယ်ကသေချာမသိနိုင်တာပဲ ရှိတာပါ။ သူများနဲ့နှိုင်းယှဉ်မိလေလေ ကိုယ်တိုင်ပဲပင်ပန်းပြီး စိတ်ဓာတ်ကျလေလေဖြစ်တတ်ပါတယ်။

(၅) အိပ်မက်တွေကိုဆက်မက်ပါ။

ရင်သွေးလေးမရခင်က ကိုယ်စိတ်ကူးအိပ်မက်ခဲ့တဲ့ပန်းတိုင်ကို ရောက်အောင် ဆက်သွားဖို့ ကိုယ့်ကိုယ်ကိုယ်တွန်းအားပေးပါ။ အခက်အခဲတွေကတော့ ပိုများလာမှာ အမှန်ဖြစ်ပေမယ့် အရင်ကလောက် ခြေလှမ်းမသွက်ရင်တောင် တစ်နေ့တစ်လှမ်း လျှောက်လှမ်းပြီး အိပ်မက်တွေကို အကောင်အထည်ဖော်ကြည့်ပါ။ သေးသေးလေးကနေ စရစရ၊ စဖြစ်အောင်ပဲ ကြိုးစားကြည့်လိုက်ပါ။

(၆) ကိုယ်လက်လေ့ကျင့်ခန်းလုပ်ပါ။

ဘော်ဒီအချိုးအစားပိုလှလာအောင်၊ နေလို့ထိုင်လို့ပိုကောင်းလာအောင်၊ စိတ်ပိုတည်ငြိမ်လာအောင် ကိုယ်လက်လေ့ကျင့်ခန်းကို တတ်နိုင်သလောက်ပြန်လုပ်ပြီး ယုံကြည်မှုကိုပြန်တည်ဆောက်ပါ။

(၇) ၀ါသနာပါတဲ့အရာတစ်ခုခုကို သင်ယူပါ။

အိမ်မှာပဲနေရလို့ စိတ်ညစ်နေတဲ့ မိခင်တွေအတွက် အိမ်ကနေပဲ သင်လို့ရတဲ့အရာတွေ သင်ယူကြည့်ပါ။ လက်မှုပညာရပ်ပဲဖြစ်ဖြစ်၊ တခြားဝါသနာပါတဲ့အရာတစ်ခုခုကို စတင်သင်ယူပြီး ကိုယ့်စိတ်ကို ပျော်ရွှင်လန်းဆန်းလာအောင် လုပ်ဆောင်ကြည့်ပါ။

(၈) ကိုယ့်ဘာသာကိုယ်သဘောမကျတဲ့ အကျင့်တွေကိုပြင်ပါ။

လူတစ်ယောက်အတွက် အမူအကျင့်တွေကို ပြုပြင်ရတာလောက် ခက်ခဲတာမရှိပါဘူး။ ဒါပေမယ့် ကိုယ်ကသာ တကယ်ပြောင်းလဲပြင်ဆင်နိုင်ရင်လည်း အဲ့ဒီလူဟာ ပျော်ရွှင်မှု၊ပီတိကိုခံစားရရုံသာမက ကိုယ့်ကိုယ်ကိုယ်ယုံကြည်မှုလည်း တိုးပွားလာပါတယ်။ ဒါ့ကြောင့် အစားလျှော့စားဖို့ တွေးထားရင် ရအောင်ကြိုးစားပါ။ ကလေးနဲ့နှစ်ယောက်တည်းဆို တီဗီပဲကြည့်ချိန်များနေတာမို့ လျှော့မယ်ဆိုရင်လည်း ဒါကို အကောင်အထည်ရအောင်ဖော်ပါ။ တစ်ခုခုကိုလုပ်ဖို့ အချိန်ဆွဲတတ်ရင်လည်း ဒီအမူအကျင့်ကို ပြင်လိုက်ပါ။

(၉) ကိုယ့်ရဲ့အိမ်၊ အိပ်ခန်းစတာတွေကို သန့်ရှင်းအောင်ထားပါ။

ကလေးနဲ့မို့ အိပ်ခန်း၊ ဧည့်ခန်းစတာတွေက အမြဲရှုပ်ပွနေတတ်တာ သဘာဝပါ။ ဒါပေမယ့် အဲ့ဒီလိုရှုပ်နေတဲ့အခန်းကို ကြည့်ပြီး စိတ်ထဲမသက်မသာဖြစ်တာမျိုး၊ ကိုယ့်ကိုယ်ကိုယ် အပြစ်ရှိသလိုမျိုး ခံစားတတ်တဲ့ မေမေတွေအနေနဲ့ တတ်နိုင်သလောက် ကိုယ့်အိပ်ခန်းနဲ့ဧည့်ခန်းစတာတွေကို သန့်သန့်ရှင်းရှင်း ထားလိုက်တာကလည်း ကိုယ့်အတွက်စိတ်ချမ်းသာပြီး ယုံကြည်မှုရစေတဲ့အချက်ပါပဲ။

(၁၀) ကိုယ်ချစ်ရတဲ့သူ၊ ကိုယ့်ကိုချစ်တဲ့သူတွေကိုသာ အချိန်ပေးပါ။

ကလေးလေးရလာပြီမို့ ကိုယ့်မှာ စိတ်ပင်ပန်းရတဲ့အပိုင်းတွေ အများကြီးပါ။ အဲ့ဒါကိုမှ ကိုယ့်ကိုထပ်ပြီး စိတ်ရှုပ်အောင် လုပ်မယ့်သူတွေနဲ့ တွေ့တာမျိုး၊ သူတစ်ပါးကို ဝေဖန်အပြစ်တင်တာမျိုး၊ ကိုယ့်ကိုစိတ်ဓာတ်ကျအောင် ပြောနေတာကို ထိုင်နားထောင်နေရတာမျိုး စတာတွေကို ရှောင်လိုက်ပြီး ကိုယ့်ကိုချစ်တဲ့သူ၊ ကိုယ့်ကောင်းကျိုးလိုလားပြီး၊ ကိုယ့်အတွက်ကြည့်ပေးတဲ့သူတွေနဲ့သာ အချိန်ကုန်လိုက်ပါ။

ဒီအချက် (၁၀)ချက်ကတော့ မိခင်တွေအတွက် ခြုံငုံပြီးပြောပြပေးထားတဲ့ အချက်တွေပဲ ဖြစ်ပါတယ်။ နည်းလမ်းတွေနဲ့ပတ်သက်ပြီး ကိုယ့်ကိုကိုယ် ယုံကြည်မှုပြန်တည်ဆောက်ဖို့ မာမီပန်နဲ့ မနန်းစံမွမ်းခေး သုံးတဲ့နည်းလမ်းလေးတွေကိုလည်း ခုလိုဝေမျှပေးလိုက်ပါတယ်။

“ကိုယ်တိုင်ကျင့်သုံးခဲ့တဲ့ နည်းလမ်းတွေအနေနဲ့ ပြောရမယ်ဆိုရင်တော့ ကိုယ့်ကိုယ်ကိုယ် ပိုဂရုစိုက်ဖြစ်ပါတယ်။ အဓိကကတော့ ခန္ဓာကိုယ်အချိုးအစား အစားတွေ ဂရုစိုက်စားတယ်။ အဆီများတာ လျှော့စားတယ်၊ ကလေးနို့တိုက်နေတော့ အာဟာရပြည့်အောင်တော့စားတယ်။ ပြီးတော့ ကိုယ်ချစ်တဲ့ ကလေးအကြောင်းကိုပဲ အတွေးထဲ ထည့်ထားတယ်။ ပညာရပ်တစ်ခုကို စတင်လေ့လာဖြစ်တယ်ပေါ့နော်။ နောက် ကိုယ့်ကို နားလည်ပေးနိုင်တဲ့ ပတ်ဝန်းကျင်မှာပဲနေပါတယ်” လို့ မနန်းစံမွမ်းခေးက ပြောပါတယ်။

စိတ်အသစ်တစ်ခုပြောင်းပြီး ကိုယ့်ကိုယ်ကိုယ်ယုံကြည်မှုပြန်ရအောင် တည်ဆောက်ခဲ့တဲ့ မာမီပန်ကတော့

“အမြင်ဆိုးတွေပြောတဲ့သူရှိတဲ့အခါ အတတ်နိုင်ဆုံး သူတစ်ပါးကို မပြောဘဲနေနိုင်အောင် ကြိုးစားနေလိုက်တယ်။ ငါ့ကိုဘာပြောနေကြပြီ၊ ဘာထင်ကုန်ကြပြီ ဆိုတာထက် သူတစ်ပါးအတွေးအမြင်က ငါ့အတွက်အရေးမပါဘူး ဆိုတာကို ခံယူလိုက်တယ်။ စကားတော့များများပြောဖြစ်အောင် ကြိုးစားတယ်၊ စကားများများပြောတဲ့အခါ များများတွေးရတဲ့အတွက် မကောင်းတဲ့စိတ်ကျမှုမျိုး ဝင်ဖို့အချိန်မရတော့ဘူး။ ငိုချင်ရင် ငိုချလိုက်တယ်။ ဝအောင်ငိုပြီးရင် စိတ်ကိုဖြည်ချလိုက်တယ်။ ပေါ့ပေါးသွားအောင်လို့။ နောက် ကိုယ့်အပျော်ကို ကိုယ်တိုင်ပဲ ဖန်တီးယူတယ်။ အမျိုးသား၊ သူငယ်ချင်းမိတ်ဆွေတွေအပေါ် မျှော်လင့်မနေဘဲ ကိုယ်ဘာလုပ်ရင် စိတ်ချမ်းသာမလဲ ဆိုတာရှာဖွေလိုက်တယ်။ ကျွန်မဆို အရင်ကတည်းက စာရေးရတာဝါသနာပါပေမယ့် လူတွေရဲ့အမြင်နဲ့ ဝေဖန်မှုကို မခံစားနိုင်လို့မရေးရဲခဲ့ဘူး။ အခုကလေးမွေးပြီး စိတ်ကုစားမှုအနေနဲ့ ပျော်ရာတစ်ခု အဖြစ်ဖန်တီးတယ်၊ Blog လုပ်တယ်။ အဲ့ဒီကနေပဲ မထင်မှတ်ထားတဲ့ ခွန်အား အထူးသဖြင့် ငါလုပ်နိုင်ပါလားဆိုတဲ့ အားတစ်ခုကို ရခဲ့တယ်။ ကိုယ့်ကိုယ်ကိုယ်ချစ်ပြီး ကိုယ်ကချစ်တဲ့သူတွေကိုပဲ အလေးထား ဆက်ဆံတယ်၊ အဆိပ်ရှိတဲ့ ဆက်ဆံရေး၊ ကိုယ်ကကြိုးစားရဲ့သားနဲ့ တုံ့ပြန်မလာတဲ့ ဆက်ဆံရေး၊ အဆိုးအမြဲအမြင်ခံရတဲ့ ဆက်ဆံရေးတွေအကုန်လုံးကို သတ္တိရှိရှိ ရပ်ပစ်ခဲ့တယ်။ ဒီနည်းလမ်းတွေကြောင့် အခုချိန်ထိ အဆင်ပြေပျော်ရွှင်နေထိုင်လျှက်ရှိတာ လက်တွေ့ပါပဲ” လို့ သူမမီးဖွားပြီးနောက်ပိုင်း ကိုယ့်ကိုယ်ကိုယ်ယုံကြည်မှုတည်ဆောက်ခဲ့တဲ့ နည်းလမ်းတွေကို ပြည့်ပြည့်စုံစုံပြောပြပေးသွားခဲ့ပါတယ်။

ဒါ့ကြောင့်မေမေတို့အနေနဲ့ ကိုယ့်ကိုယ်ကိုယ်ယုံကြည်မှုပြန်ရအောင် ဒီနည်းလမ်းလေးတွေနဲ့ တည်ဆောက်ကြည့်ရင်း ကိုယ်တိုင်ပျော်ရွှင်သာယာတဲ့ဘဝလေးကိုဖန်တီးကြည့်လိုက်ပါ။ ကိုယ့်အတွက်ကိုမကြည့်ဘဲ အခြားသူတွေကို နံပါတ်(၁) နေရာမှာထားမယ်ဆိုရင် ကိုယ့်ကိုယ်ကိုယ်ယုံကြည်မှုရဖို့ မလွယ်ကူဘူးဆိုတာလည်း မမေ့ပါနဲ့။


က္က