မဒီတိုင်းမှာ ကိုယ့်ကို တသက်လုံးချစ်မြတ်နိုးတဲ့ အမျိုးသားတစ်ယောက်ကို ပိုင်ဆိုင်ထားကြပါတယ်။
Thin Nu Swe

မဒီတို့ရေ…ကိုယ်တို့ အမျိုးသမီးတွေတိုင်းမှာ ကိုယ်ချစ်တာထက် ကိုယ့်ကို ပိုချစ် ၊ ပိုယုယ ၊ ပိုမြတ်နိုးပြီး ကိုယ်တွေရဲ့ အသည်းနှလုံးကို ဘယ်တော့မှ ခွဲမသွားမယ့် အမျိုးသားတစ်ယောက်ရှိပါတယ်

မိန်းကလေးတစ်ယောက် ဘဝတစ်ခု စတင်ဖြစ်တည်ချိန်ကစ သေဆုံးသွားသည့်ထိ အမြဲ မပြတ်ချစ်နိူင်သူ ၊ ထာဝရ မြတ်နိုးနိုင်သူတစ်ဦးပဲရှိပါတယ်။ အဲဒီသူက ကျွန်မတို့တွေရဲ့ ပါးပြင်ကို မျက်ရည်ဖြတ်သန်းခွင့်မပေးဘဲ အမြဲ မျက်ရည်သုတ်ပေးမယ့်သူပါ။

 အဲဒီလိုမျိုး မိန်းကလေးတိုင်းအတွက် နွေးထွေးလုံခြုံအပြည့်အဝပေးနိုင်သူက တခြားသူမဟုတ်ပါဘူး.. ဖေဖေပါပဲ။

ဖေဖေ့ရဲ့ ကျွေးမွေးပြုစုစောင့်ရှောက်မှုတွေနဲ့ လူလားမြောက်လာတဲ့ ကျွန်မတို့တွေဟာ ငယ်ဘဝတစ်လျှောက်လုံးမှာ ဖေဖေ့ကို ဒီလောကကြီးထဲ အားအကိုးရဆုံး ၊ ယုံကြည်ရဆုံး ၊ စမတ်အကျဆုံး အမျိုးသားတစ်ယောက်အဖြစ် ယုံကြည်ရင်း ကြီးပြင်းလာခဲ့ကြတာပါ။ 

မျက်နှာတည်တဲ့ ဖေဖေပိုင်ဆိုင်ထားသူတွေက ကြောက်ရွံ့ရိုသေမှုတွေနဲ့ ချစ်ခင်အားကိုးရသလို ပျော်ပျော်နေတတ်တဲ့ ဖေဖေကို ပိုင်ဆိုင်ထားသူတွေကလည်း သူငယ်ချင်းလို ယုံကြည်အားကိုးမှုတွေနဲ့ ချစ်ခင်ပျော်ရွှင်ခဲ့ရတာပါပဲ။ ဘယ်လို အဖေမျိုး ဖြစ်ပါစေ။ ကိုယ့်သားသမီးအပေါ်ကိုတော့ စိုးရိမ်မှုအပြည့်နဲ့ စောင့်ရှောက်တတ်သူ၊ ရင်အုပ်မကွာ ထိန်းသိမ်းလိုသူ၊ ချစ်ခြင်းမေတ္တာ အပြည့်အဝ ထားရှိတတ်သူတွေချည်းပါပဲ။

 

များသောအားဖြင့် ဖေဖေတွေဟာ အလုပ်လုပ်ရင်း မိသားစုရဲ့ တာဝန်ဝတ္တရားတွေကို ထမ်းရွက်ရသူမို့ မိသားစုကို အချိန်ပေးနိုင်သူက ရှားပါတယ်။ ဒီလို အချိန်ပေးနိုင်မှုရှားပါးတဲ့အတွက် နေရာတိုင်းမှာ မေမေသာလျှင် ပိုထင်ပေါ်ပြီး ဖေဖေ့ရဲ့ ကဏ္ဍတွေဟာ ပျောက်ကွယ်နေတတ်ပါတယ်။ ဒါပေမယ့် ဒီလို အချိန်မပေးနိုင်တာတွေကလည်း မိသားစုအတွက် ရှာဖွေနေရလို့ အချိန်မပေးနိုင်ခြင်းသာဖြစ်ပါတယ်။ ဖေဖေတို့ရဲ့ အသွေးအသားနဲ့ လူဖြစ်လာရပြီး ဖေဖေတို့ရဲ့ ချွေးစက်တွေနဲ့ ကြီးပြင်းရှင်သန်ခွင့်ရတဲ့ ဒီဘဝကြီးမှာ ဖေဖေတို့ရဲ့ ချစ်ခြင်းမေတ္တာ နဲ့ ကျေးဇူးတရားကို ဘယ်လိုမှ လျစ်လျူရှူထားလို့မရနိုင်ပါဘူး။ 

 ဒီနေ့ ဇွန်လ ၁၆ရက်နေ့ တနင်္ဂနွေနေ့ဟာဆိုရင် အဖေများနေ့ုဖြစ်ပါတယ်။ အဖေနဲ့ အတူနေတဲ့ မိန်းကလေးတွေအတွက် ဒီလိုနေ့မျိုးမှာ ဖေဖေနဲ့ အတူ အပြင်ထွက်မုန့်စားတာ ၊ လျှောက်လည်တာ ၊ ဒိတ်တာတွေ ၊ လက်ဆောင်ပစ္စည်းဝယ်ပေးတာတွေ လုပ်ပြီး ဂုဏ်ပြုပေးလို့ရပါတယ်။ ဒါပေမယ့် အဖေနဲ့ အတူမနေတဲ့ သူတွေ ၊ ရပ်ဝေးရောက်နေတဲ့ သူတွေကတော့ ဒီလိုမျိုး လုပ်လို့မရနိုင်ဘူးဆိုရင်လည်း ဒီလိုရက်လေးမှာ ဖုန်းကလေးဆက်ပြီး သာကြောင်းမာကြောင်းပြောတာမျိုး ၊ တစ်ခါမှ ချစ်တယ်လို့ မပြောဖူးရင်လည်း အရဲစွန့်ပြီး ပြောကြည့်စေချင်တယ်။ 

တကယ်တော့ အဖေတွေအများစုက အရွယ်ရောက်ပြီးတဲ့ သားသမီးကို ချစ်တယ်လို့ ပြောဖို့ စိုးရွံ့တတ်ပါတယ်။ သားသမီးတွေကလည်း အမေကို ချစ်တယ်လို့သာ ပြောကြတာ အဖေကိုတော့ ပြောဖို့ မဝံ့မရဲဖြစ်တတ်ကြပါတယ်။ ဒါ့ကြောင့် ဒီလိုနေ့လေးမှာဖြစ်ဖြစ် အဖေ့ကို ချစ်ကြောင်း ထုတ်ဖော်ပြောကြဖို့ ဒီဆောင်းပါးလေးနဲ့ တိုက်တွန်းလိုက်ပါရစေ။


က္က