ကျင့်စဉ် ၁

အရင်ဆုံး လေးဘက်ထောက် ပုံစံကနေ စတင်ရမှာဖြစ်ပါတယ်။ လက်ကို ကြမ်းပြင်ပေါ် သာသာယာယာချထားပါ။ တံတောင်ဆစ်နဲ့ ကြမ်းပြင်လည်း ထိထားရပါမယ်။ ဒူးခေါင်းနဲ့ ကြမ်းပြင်ကို ထိထားရပါမယ်။ ပြီးရင်တော့ ဖြေးဖြေးချင်း တံတောင်ဆစ်ကနေစကြွပြီး အပေါ်ကို မြောက်တက်ရမှာပါ။ တပြိုင်နက်ထဲမှာပဲ ခြေချောင်းတွေကနေ ဒူးခေါင်းထိ ကြွလာရပါမယ်။ တင်ပါးကို လေပေါ်မှာ မြှောက်ထားပြီး လက်နဲ့ ပုခုံးကို တတန်းတည်းထားရပါမယ် ။ ခြေထောက်တွေကို ဆန့်တန်းထားပါ။ လက်တွေကိုလည်း ဆန့်တန်းထားပြီး မျက်နှာက ကြမ်းပြင်ကို မူထားရပါမယ်။ ခေါင်းက လက်မောင်းနှစ်ခုကြားမှာ ရှိရမှာ ဖြစ်ပြီးတော့ ဒူးခေါင်းတွေနဲ့ ကိုယ့်မျက်နှာက တသားတည်း ဖြစ်နေရပါမယ်။ ကျောပြင်ကလည်း တဖြောင့်တည်း ရှိနေရမှာပါ။ ပုခုံးကနေစပြီး တင်ပါးထိဟာလည်း တဖြောင့်တည်း ဖြစ်နေရပါမယ်။ အဲဒီအနေအထားကို ငြိမ်သက်ပြီး စိတ်မှန်းနဲ့ ၅ကြိမ် ဒါမှမဟုတ် ၁၀ကြိမ် ရှူသွင်းရှူထုတ်လုပ်ရပါမယ်။ ဒီကျင့်စဉ်ဟာ လက်မောင်းနဲ့ ပခုံးတွေကို သန်မာစေတယ်။

ခြေထောက်တွေကို ကြမ်းပြင်ပေါ် တသားတည်း ချထားပါ။ မတ်တပ်ရပ်အနေအထားကနေ စပါမယ်။ ခြေထောက်ကို အနည်းငယ် ခြားထားရပါမယ် ။ ခြေချောင်းတွေကို ကျဲနေအောင် ချဲလိုက်ပါ။ ရင်ကို ဖွင့်ပြီး တင်ကို စွင့်ထားပါ။ ခန္ဓာကိုယ်ကို ဖြေလျော့ချလိုက်ပါ။ ခြေဖဝါးကို မြေပြင်ပေါ်မှာ ထားပြီး ခြေချောင်းလေးတွေကို မြှောက်လိုက်ပါ။ ပြီးရင် ပြန်ချလိုက်ပါ။ လက်ကို ဆုတောင်းတဲ့ ပုံစံမျိုး ရင်ဘတ်ရှေ့ကို ယူပါ။ ရင်ဘတ်ရှေ့မဟုတ်ဘဲ ကျောနောက်ပြင်မှာ ထားလည်းရပါတယ်။ ဒါမှမဟုတ် လက်အုပ်ချီအနေအထားနဲ့ ဦးခေါင်းအထက်မှာ ဆန့်တန်းထားလို့လည်း ရပါတယ် ။ကိုယ်နှစ်သက်ရာ အနေအထားအတိုင်းနေပါ။ ပုံစံတကျ ငြိမ်နေပါ၊ စိတ်လျှော့ထားပါ။ အသက်ကို ပြင်းပြင်းရှူပါ။ ဒီပုံစံအတိုင်းအငြိမ် ၃ကြိမ်သို့ ငါးကြိမ် အသက်ရှူသွင်း ရှူထုတ်လုပ်ပါ။

 ကျင့်စဉ် ၃

ပထမဆုံးအနေနဲ့ ခြေလှမ်းကျယ်ကျယ် စလှမ်းရပါမယ်။ ဘယ်လောက်ကျယ်ကျယ်လှမ်းရမလဲဆိုရင်တော့ ခြေထောက် တဖြောင့်စာ အရှည်အတိုင်း လှမ်းရမှာပါ။ ရှေ့ဒူးခေါင်း ကို ကွေးထားပြီးတော့ နောက်ဒူးခေါင်းကိုတော့ ဆန့်ထားရမှာဖြစ်ပြီး နောက်ဘက်က ခြေဖနောင့်ကို မြှောက်ထားရမှာပါ။ လက်တွေကို ပထမဆုံး ရှေ့ခြေထောက်မှာ ထားထားပြီးတော့မှ ဖြည်းဖြည်းချင်း ဦးခေါင်းအထက်ဆီကို လက်အုပ်ချီပုံစံအတိုင်း အထက်ကို မြှောက်တင်ပါမယ်။ ဒီပုံစံအတိုင်း ငြိမ်သက်ပြီးတော့ ငါးကြိမ် အသက်ပြင်းပြင်းရှူပါမယ်။ ခန္ဓာကိုယ်ကို တဖြောင့်တည်းပါ။ စိတ်ကို လျှော့ထားပါ။ ဘယ်ဘက်ခြေထောက်ပြီးရင် ညာဘက်ခြေထောက်ကို ရှေ့က နည်းတွေအတိုင်း ပုံစံပြောင်းပြီး လုပ်ပေးရပါမယ်။

ကျင့်စဉ် ၄

ခြေထောက်တွေကို ခြားနိုင်သလောက် ခြားပြီး ရပ်ပါ။ ပထမဆုံး ဘယ်ဘက်ကို ခြေထောက်ဦးကို လှည့်ရပါမယ်။ ညာဘက်ခြေကိုလည်း ဘယ်ဘက်ကိုပဲ ဦးလှည့်ထားရပါမယ်။ လက်တွေကို ဆန်တန့်ထားပါ။ ပထမဆုံး ဘယ်ဘက်ကို မျက်နှာမူပါမယ်။ ဘယ်ဘက် ဒူးခေါင်းကို ၉၀ဒီဂရီလောက် ကွေးလိုက်ပါ။ ညာဘက်ကိုတော့ ဆန့်တန်းထားပါမယ်။ ဒီလို ပုံစံအငြိမ်ကို အသက်ပြင်းပြင်း ၁ကြိမ်ကနေ ၅ကြိမ် ရှူထုတ်ရှူသွင်း လုပ်ပါမယ်။ စိတ်ကိုလျှော့ထားပါ။ ရင်ကို ဖွင့်ထားပါ။ စိတ်မှန်းနဲ့ အသက်ရှူသွင်း ရှူထုတ်လုပ်တာ ၅ကြိမ်ပြည့်ပြီဆိုရင်တော့ ညာဘက်ကို ပြောင်းပြီး အထက်က ပုံစံအတိုင်းပဲ ပြန်လုပ်ပါမယ်။

ဒီပို့စ်က အထက်က ယောဂကျင့်စဉ်နဲ့ အနည်းငယ်ဆင်တူပါတယ်။ ပထမဆုံး လက်နှစ်ဘက်ကို တဖြောင့်တည်း ဆန့်တန်းပါ။ ခြေထောက်တွေကိုလည်း ကားနိုင်သမျှ ကားထားပေးပါ။ ခြေချောင်းကို ပထမဆုံး ဘယ်ဘက်ကို ဦးလှည့်ထားပါမယ်။ ညာခြေချောင်းကိုလည်း ဘယ်ဘက်ကိုပဲ ဦးလှည့်ထားပါမယ်။ ပြီးရင် လက်တွေကို ဘယ်ဘက်အခြမ်းမှာ တဖြောင့်တည်း ၆နာရီ နဲ့ ၁၂ နာရီပုံစံ တန်းလိုက်ပါမယ်။ ဒီပုံစံအတိုင်း အငြိမ် ၅ကြိမ်ကနေ ၁၀ကြိမ်ထိ အသက်ပြင်းပြင်းရှူပါမယ်။ ပြီးရင်တော့ ညာဘက်ကို ပြောင်းပြီး အထက်ပုံစံအတိုင်း လုပ်ပါမယ်။

ယောဂကျင့်စဉ်ဟာ ခန္ဓာကိုယ်ကိုပျော့ပြောင်းစေပါတယ်။ ကြွက်သားတွေကိုသန်မာစေပါတယ် ။ ကိုယ်ဟန်အနေအထားကို မှန်ကန်စေပါတယ်။ အရိုးနဲ့အရိုးနုတွေကိုကာကွယ်ပေးပါတယ်။ ခါးကို ပိုမိုသန်မာပျော့ပြောင်းစေပြီး သွေးတိုးတာ၊ လေဖြတ်တာ၊ အဆုတ်နဲ့ နှလုံးသွေးကြောတွေနဲ့ ဆိုင်တဲ့ ရောဂါ တော်တော်များများကို ကာကွယ်ပြီးသားဖြစ်ပါတယ်။ စိတ်ဓါတ်ကျတာ၊ ကိုယ်အလေးချိန်တက်လာတာ၊ အရိုးပွတာ၊ သွေးပေါင်တက်တာ ၊ အင်ဆူလင်ဟော်မုန်း ယဉ်ပါးပြီး ဆီးချိုဖြစ်တာတွေ၊ ဗိုက်အဆီတက်တွေကို ကာကွယ်ပေးပါတယ်။ အာရုံစူးစိုက်မှုအားကောင်းစေတယ်။ အာရုံကြောအားကောင်းပြီးအိပ်ပျော်စေတယ်။

စိတ်ကျန်းမာဖို့ ဒေါသတွေလျော့ဖို့ အကြောတွေပျော့ပျောင်းဖို့ စိတ်ဖိစီးမှုတွေနည်းဖို့ စိတ်တည်ငြိမ်ဖို့ တွေအတွက်ကောင်းတဲ့ ယောဂ ကစားကြဖို့ တိုက်တွန်းချင်ပါတယ်။