အင်ဒိုနီးရှားနိုင်ငံ လွမ်ဘော့ကျွန်းမှာ လှုပ်ခတ်ခဲ့တဲ့ ရစ်(ခ်)တာစကေး ၆.၉ အဆင့်ရှိ အင်အားပြင်းထန်တဲ့ ငလျင်ကြီးကြောင့် သေဆုံးသူအရေအတွက် ၁၆၄ ဦးကို ကျော်လွန်မြင့်တက်လာကြောင်း အာဏာပိုင်တွေက ယနေ့ (သြဂုတ် ၈ ရက်) ပြောခဲ့ပါတယ်။
လွမ်ဘော့ကျွန်းမှာ ရှာဖွေကယ်ဆယ်ရေး လုပ်ဆောင်နေစဉ် (Photo: AFP)
အဆိုပါ ငလျင်ကြီးလှုပ်ခတ်မှုကြောင့် လူဦးရေ ၁၅၆,၀၀၀ နေအိမ်များမှ ရွှေ့ပြောင်းခဲ့ရကြောင်းလည်း သိရပါတယ်။ တနင်္ဂနွေနေ့ (သြဂုတ် ၅ ရက်) ဒေသစံတော်ချိန် ညပိုင်းမှာ အင်အားပြင်းထန်တဲ့ ငလျင်ကြီးလှုပ်ခတ်မှုကြောင့် လွမ်ဘော့ကျွန်းပေါ်ရှိ ဒေသခံတွေနဲ့ ကမ္ဘာလှည့်ခရီးသည်များ အထိတ်တလန့် ဖြစ်ခဲ့ကြပါတယ်။လူဦးရေ ၃.၁ သန်းခန့်ရှိတဲ့ လွမ်ဘော့ကျွန်းမှာ ယခု ငလျင်ကြီးမတိုင်မီ ဇူလိုင် ၂၉ ရက် အစောပိုင်းကလည်း ရစ်(ခ်)တာစကေး ၆.၄ ရှိ ငလျင်တစ်ခု လှုပ်ခတ်ခဲ့မှုကြောင့် လူ ၁၇ ဦး သေဆုံးခဲ့ပါတယ်။
သြဂုတ် ၅ ရက် ညပိုင်းမှာ ထပ်မံ လှုပ်ခတ်ခဲ့တဲ့ ငလျင်ကြီးကြောင့် လူဦးရေ ၁,၄၇၇ ဦး ဒဏ်ရာများရခဲ့ကြပြီး အဆောက်အအုံ ထောင်နဲ့ချီ ပျက်စီးခဲ့ကြောင်း သိရပါတယ်။
ငလျင်ကြောင့် ပြိုကျသွားသည့် နေအိမ်တစ်လုံး (Photo: CGTN)
ငလျင်ကြီးလှုပ်ခတ်ပြီးနောက် ကယ်ဆယ်ရေးလုပ်ငန်းတွေအတွက် ဆေးဘက်ဆိုင်ရာဝန်ထမ်းတွေနဲ့ အခြေခံ အစားအသောက်၊ အသုံးအဆောင်များ ပိုမိုလိုအပ်နေကြောင်း အင်ဒိုနီးရှား အာဏာပိုင်တွေက ပြောပါတယ်။"လူတွေကိုရွှေ့ပြောင်းဖို့အတွက် အပြင်းအထန် အားစိုက်လုပ်ဆောင်နေပါတယ်၊ ဒါပေမဲ့ မြေပြင်မှာ လုပ်ငန်းဆောင်ရွက်တဲ့အခါ ပြဿနာတွေ အများကြီးရှိနေဆဲ ဖြစ်ပါတယ်" လို့ ဘေးအန္တရာယ်ဆိုင်ရာ စီမံခန့်ခွဲမှုဌာနမှ ပြောခွင့်ရပုဂ္ဂိုလ် ဆူတိုပိုပွာဝို နူဂရိုဟိုက ယနေ့ ပြောပါတယ်။
ယာယီရွက်ဖျင်တဲတွေမှာ ခိုလှုံနေရသည့် ဒေသခံများ (Photo: Adek Berry/AFP)
ဆက်လက်ပြီး "ငလျင်ကြောင့် သေဆုံးသူအရေအတွက်က မြင့်တက်လာနေပါတယ်၊ လူဦးရေ ၇၀,၀၀၀ ကျော်ကို ရွှေ့ပြောင်းပေးခဲ့ရပြီး နေအိမ်အလုံးရေ ထောင်သောင်းချီ ပျက်စီးခဲ့ပါတယ်" လို့လည်း နူဂရိုဟိုက ယနေ့ ပြောပါတယ်။လွမ်ဘော့ကျွန်းမှာ ငလျင်ကြီးလှုပ်ခတ်ပြီးနောက် ကမ္ဘာလှည့်ခရီးသည် ၂,၀၀၀ ကျော်ကိုလည်း ဂီလီကျွန်း (Gili) နဲ့ အခြားနေရာတွေကနေ ရွှေ့ပြောင်းပေးခဲ့ရပါတယ်။
သြဂုတ် ၅ ရက်က လွမ်ဘော့ကျွန်းမှာ ငလျင်လှုပ်မှုကို ဘာလီကျွန်းမှာလည်း စက္ကန့်အနည်းငယ်မျှ ခံစားသိရှိခဲ့ရပြီး လူအများအပြား အဆောက်အအုံများ အပြင်ဘက်ကို ပြေးထွက်ခဲ့ကြပါတယ်။
ဂီလီကျွန်းမှ ကမ္ဘာလှည့်ခရီးသည်တစ်ဦးကို ရွှေ့ပြောင်းလာစဉ် (Photo: AFP)
လွမ်ဘော့ကျွန်းဟာ ကမ္ဘာလှည့်ခရီးသည် လာရောက်မှု များပြားတဲ့နေရာတစ်ခုဖြစ်ပြီး ဘာလီကျွန်းအရှေ့ဘက် ၆၂ မိုင်ခန့်အကွာမှာ တည်ရှိပါတယ်။ ငလျင်ကြောင့် ဘာလီကျွန်းမှာလည်း အဆောက်အအုံ ပျက်စီးမှုတွေ ဖြစ်ခဲ့ပါတယ်။ထောင်နဲ့ချီ အရေအတွက်ရှိတဲ့ ကျွန်းများဖြင့် ဖွဲ့စည်းတည်ရှိနေတဲ့ အင်ဒိုနီးရှားဟာ ပစိဖိတ်မီးကွင်းဒေသမှာ တည်ရှိနေပြီး ငလျင်လှုပ်ခတ်မှု အန္တရာယ်အရှိဆုံး နိုင်ငံတစ်နိုင်ငံဖြစ်ပါတယ်။
ငလျင်ကြောင့် ပြိုကျပျက်စီးခဲ့သည့် ဗလီတစ်ခု (Photo: AFP/SONNY TUMBELAKA)
၂၀ဝ၄ ခုနှစ်က အိန္ဒိယသမုဒ္ဒရာ ရေအောက်ကြမ်းပြင်မှာ ရစ်(ခ်)တာစကေး ၉.၃ ရှိ အင်အား အလွန်ပြင်းထန်တဲ့ ငလျင်ကြီးတစ်ခု လှုပ်ခတ်မှုကို အာချေးပြည်နယ်နဲ့ ဆူမတြာကျွန်းတို့မှာ အကြီးအကျယ် ခံစားခဲ့ရပါတယ်။အဆိုပါ ငလျင်ကြောင့် ဆူနာမီရေလှိုင်းကြီးများ ဖြစ်ပေါ်ခဲ့ပြီး အင်ဒိုနီးရှားမှာ လူပေါင်း ၁၇၀,၀၀၀ သေဆုံးခဲ့ပါတယ်။ ဒါ့အပြင် ပစိဖိတ်သမုဒ္ဒရာနဲ့ ဆက်စပ်နေတဲ့ နိုင်ငံတွေမှာလည်း လူပေါင်းထောင်နဲ့ချီ သေဆုံးခဲ့ပါတယ်။