ဆက်ဆူအိုလိုအသင်းနဲ့ ကစားခဲ့တဲ့ ပွဲစဉ်မှာ အနိုင်ဂိုး (၂)ဂိုး သွင်းယူပေးခဲ့တဲ့ ဂျူဗင်တပ်စ်တိုက်စစ်မှူး ရော်နယ်ဒိုဟာ ကလပ်အသင်း ကစားသမားဘဝအတွက် စံချိန်သစ်တစ်ခုကိုပါ ပိုင်ဆိုင်ခဲ့ပြီ ဖြစ်ပါတယ်။ စပို့တင်း၊ မန်ယူ၊ ရီးရဲလ်နဲ့ ဂျူဗီကစားသမား ဘဝတွေမှာ ရော်နယ်ဒိုရဲ့ လိဂ်သွင်းဂိုးဟာ (၄၀၀) ပြည့်မြောက်သွားခဲ့ပြီ ဖြစ်ပါတယ်။
Photo : AS
ဘလွန်းဒီအောဆု (၅)ကြိမ် ပိုင်ဆိုင်ထားခဲ့တဲ့ ရော်နယ်ဒိုအတွက်တော့ နောက်ထပ် သမိုင်းမှတ်တမ်းတစ်ခုကို စိုက်ထူနိုင်ခဲ့တာ ဖြစ်ပါတယ်။ ရော်နယ်ဒိုဟာ ရီးရဲလ်မက်ဒရစ်အတွက် ၃၁၁ ဂိုး၊ မန်ချက်စတာယူနိုက်တက်အတွက် ၈၄ ဂိုး၊ စပို့တင်းအတွက် ၃ဂိုး၊ ဂျူဗင်တပ်စ်အတွက် ၂ဂိုးစီ အမှတ်ပေးလိဂ်မှာ ဂိုးတွေသွင်းခဲ့ပြီး ဂိုး (၄၀၀) ပြည့်မြောက်ခဲ့တာ ဖြစ်ပါတယ်။
ရော်နယ်ဒိုလိုပဲ ဟီဂူအင်လည်း အသင်းသစ်မှာ ဂိုးပေါက်တွေ့ခဲ့ပြီ
Photo : AS
ဒါဟာ ဥရောပရဲ့ ထိပ်တန်းလိဂ်တွေမှာ (၅)ဦးမြောက် လိဂ်ဂိုးအများဆုံး သွင်းယူနိုင်တဲ့ ကစားသမားအဖြစ်လည်း ရပ်တည်နိုင်ခဲ့တာ ဖြစ်ပါတယ်။ ဂျိုးဆက်ဘီကန်က (၅၁၈)ဂိုး၊ ပွတ်စ်ကတ်စ်က (၅၁၄)ဂိုး၊ ဂျင်မီမက်ခ်ဂရော်ရီက (၄၁၀)ဂိုး၊ ဆီလာက (၄၀၆) ဂိုးစီ သွင်းယူခဲ့ပြီးနောက်မှာ ရော်နယ်ဒိုက ဂိုးပေါင်း (၄၀၀) နဲ့ နံပါတ် (၅)မှာ ရှိနေခဲ့တာ ဖြစ်ပါတယ်။
Photo : ESPN.in
ဆက်ဆူအိုလိုနဲ့ပွဲမှာ ရော်နယ်ဒိုဟာ ဟက်ထရစ်သွင်းဂိုး ရရှိဖို့အထိ နီးစပ်ခဲ့ပေမယ့်လည်း ရရှိခဲ့တဲ့ အခွင့်အရေးတွေကို အသုံးမချနိုင်ခဲ့တာကြောင့် သွင်းဂိုး (၂)ဂိုးတည်းနဲ့သာ ကျေနပ်ခဲ့ရပါတယ်။ စီးရီးအေမှာ (၃)ပွဲဆက်တိုက် ဂိုးပေါက်ပျောက်နေလို့ ဝေဖန်ခံနေရတဲ့ ရော်နယ်ဒိုအတွက်တော့ အကောင်းဆုံးခြေစွမ်းပြပြီး ဝေဖန်မှုတွေကို တုံ့ပြန်နိုင်ခဲ့ပါတယ်။
Photo : Ottumwa Courier
ပေါ်တူဂီတိုက်စစ်မှူးဟာ စီးရီးအေသွင်းဂိုးတွေ ရရှိဖို့အတွက် အပိုလေ့ကျင့်ခန်းတွေ ပြုလုပ်ခဲ့ပြီး အားထုတ်ခဲ့ရတာ ဖြစ်ပါတယ်။ ရော်နယ်ဒိုရဲ့ ကြိုးစားမှုအပေါ် အသင်းဖော်တွေက အံ့အားသင့်ခဲ့ရပြီး ကမ္ဘာ့ထိပ်တန်းအဆင့်မှာ ရပ်တည်နေခဲ့ရတဲ့ အပေါ်မှာ ကောင်းကောင်းနားလည် ခဲ့ပြီလို့ ဖွင့်ဟပြောကြားခဲ့ရတဲ့အထိ ရော်နယ်ဒိုရဲ့ အားထုတ်မှုတွေက ပြင်းထန်ခဲ့ပြီး နောက်ဆုံးမှာတော့ စီးရီးအေသွင်းဂိုး ပိုင်ဆိုင်ခဲ့ရပြီ ဖြစ်ပါတယ်။