တောင်ကိုရီးယားသမ္မတဟောင်း လီမြောင်ဘတ်ကို အဂတိလိုက်စားမှုအတွက် ဆိုးလ်မြို့တရားရုံးက ထောင်ဒဏ် ၁၅ နှစ် ယနေ့ (အောက်တိုဘာ ၅ ရက်) ချမှတ်လိုက်ကြောင်း သိရပါတယ်။

ထောင်ဒဏ် ၁၅ နှစ် ချမှတ်ခံရသည့် သမ္မတဟောင်းလီမြောင်ဘတ် (Photo: SCMP)

လီမြောင်ဘတ်ဟာ ၂၀၀၈ ခုနှစ်မှ ၂၀၁၃ ခုနှစ်အထိ သမ္မတအဖြစ် တာဝန်ယူခဲ့သူဖြစ်ပြီး ထောင်ဒဏ်ချမှတ်ခံရတဲ့ စတုတ္တမြောက် တောင်ကိုရီးယားသမ္မတဟောင်းလည်း ဖြစ်လာခဲ့ပါတယ်။

ပတ်ဂွမ်ဟေးဟာ သူငယ်ချင်းဖြစ်သူနဲ့ ပူးပေါင်းပြီး အဂတိလိုက်စားမှုမှာ ပါဝင်ပတ်သက်ခဲ့မှုကြောင့် ၂၀၁၇ ခုနှစ် အစောပိုင်းမှာ ရာထူးကနေ ဖယ်ရှားခံခဲ့ရပါတယ်။

ထောင်ဒဏ် ၃၃ နှစ် ချမှတ်ခံရသည့် သမ္မတဟောင်း ပတ်ဂွမ်ဟေး (Photo: AP)

ယနေ့ ထောင်ဒဏ် ၁၅ နှစ် ချမှတ်ခံရတဲ့ သမ္မတဟောင်း လီမြောင်ဘတ်ဟာ ဆမ်ဆောင်းကုမ္ပဏီကဲ့သို့ စီးပွားရေးလုပ်ငန်းများနဲ့ နိုင်ငံရဲ့ထောက်လှမ်းရေးဌာနထံမှ အမေရိကန်ဒေါ်လာ ၁၀ ဘီလီယံကို တရားမဝင် လက်ခံရယူခဲ့မှုဖြင့် စွဲချက်တင်ခံခဲ့ရပါတယ်။

ဆိုးလ်မြို့ ဗဟိုတရားရုံးက လီမြောင်ဘတ်ဟာ ၎င်းနဲ့ညီအစ်ကိုတော်စပ်သူ ဦးဆောင်လုပ်ကိုင်နေတဲ့ ပုဂ္ဂလိက မော်တော်ယာဉ်ပစ္စည်း ထုတ်လုပ်ရေးလုပ်ငန်းမှ အမေရိကန်ဒေါ်လာ ၂၁.၇၇ သန်းကို အလွဲသုံးစားပြုမှု၊ ဆမ်ဆောင်းနဲ့ အခြား စီးပွားရေးလုပ်ငန်းများထံမှ လာဘ်ငွေများရယူမှုတို့နဲ့ ပတ်သက်ပြီး ပြစ်မှုထင်ရှားကြောင်း ဆုံးဖြတ်ခဲ့ပါတယ်။

တောင်ကိုရီးယား လက်ရှိသမ္မတ မွန်ဂျေအင်း (Photo: Yonhap)

တရားရုံးက သမ္မတဟောင်းလီမြောင်ဘတ်ကို ထောင်ဒဏ်အပြင် ငွေဒဏ်အဖြစ်လည်း ကိုရီးယားဝမ်ငွေ ၁၃ ဘီလီယံ ပေးဆောင်ရန် အမိန့်ချမှတ်ခဲ့ကြောင်း သိရပါတယ်။ အသက် ၇၆ နှစ်အရွယ် သမ္မတဟောင်းလီမြောင်ဘတ်ကတော့ စွဲချက်များကို ငြင်းဆိုထားပြီး မည်သည့်အမှားမျှ ကျူးလွန်ထားခြင်းမရှိကြောင်း ပြောခဲ့ပါတယ်။

၎င်းကို အဂတိလိုက်စားမှုဖြင့် စုံစမ်းစစ်ဆေးပြီး တရားစွဲဆိုခဲ့ခြင်းဟာ လက်ရှိသမ္မတ မွန်ဂျေအင်းက နိုင်ငံရေးအရ လက်စားချေခြင်းသာ ဖြစ်တယ်လို့ လီမြောင်ဘတ်က ဆိုပါတယ်။

အမိန့်ချမှတ်တဲ့ ယနေ့ တရားခွင်ကို သမ္မတဟောင်းလီမြောင်ဘတ် လာရောက်ခဲ့ခြင်းမရှိကြောင်းလည်း သိရပါတယ်။ အစိုးရရှေ့နေတွေက သမ္မတဟောင်းလီမြောင်ဘတ်ကို ထောင်ဒဏ် နှစ် ၂၀ ချမှတ်ရန် တရားရုံးတော်သို့ တင်ပြခဲ့ကြတယ်လို့ ဆိုပါတယ်။

ထောင်ချခံခဲ့ရတဲ့ တောင်ကိုရီးယားသမ္မတဟောင်းများ

- သမ္မတဟောင်း ပတ်ဂွမ်ဟေးဟာလည်း လာဘ်ပေးလာဘ်ယူမှု အပါအဝင် စွဲချက်အများအပြားဖြင့် စွဲချက်တင်ခံရပြီးနောက် စုစုပေါင်း ထောင်ဒဏ် ၃၂ နှစ် ချမှတ်ခံခဲ့ရပါတယ်။

ထောင်ဒဏ်ချမှတ်ခံရသည့် ရိုတေဝူးနှင့် ချန်ဒူးဝမ် (Photo: AP)

-  တောင်ကိုရီးယားမှာ ၁၉၈၀ ပြည့်လွန်မှ ၁၉၉၀ ပြည့်လွန်နှစ်များအထိ သမ္မတတာဝန်ယူခဲ့ကြသူ စစ်တပ် ဗိုလ်ချုပ်ကြီးဟောင်းနှစ်ဦးဖြစ်တဲ့ ချန်ဒူးဝမ်နဲ့ ရိုတေဝူးတို့ဟာလည်း သမ္မတရာထူးမှ အနားယူခဲ့ရပြီးနောက် ၁၉၉၀ ပြည့်လွန် နှစ်များအတွင်း အဂတိလိုက်စားမှုနဲ့ နိုင်ငံတော်သစ္စာဖောက်မှုတို့ဖြင့် ထောင်ဒဏ်များ ချမှတ်ခံခဲ့ရပါတယ်။ ၎င်းတို့နှစ်ဦးဟာ ၂ နှစ်ကြာ ထောင်ဒဏ်ကျခံရပြီးနောက် သမ္မတလွတ်ငြိမ်းချမ်းသာခွင့်ဖြင့် ထောင်မှလွတ်မြောက်ခဲ့ပါတယ်။