၂ နှစ်မှ ၁၈ နှစ်အရွယ် အုပ်စုအတွက် စမ်းသပ်မှုအပေါ် သုံးသပ်ပြီးနောက် ထောက်ခံခွင့်ပြုချက်ပေးခဲ့တာ ဖြစ်ပါတယ်

အိန္ဒိယနိုင်ငံက ပြည်တွင်းကုမ္ပဏီ Bharat Biotech က ထုတ်လုပ်ထားတဲ့ COVID-19 ကာကွယ်ဆေးကို အသက် ၁၂ နှစ်အောက် ကလေးတွေမှာ အရေးပေါ်အသုံးအဖြစ် ခွင့်ပြုထောက်ခံချက်ပေးလိုက်ပြီ ဖြစ်ပါတယ်။

အစိုးရထံမှ အရေးပေါ်သုံးအဖြစ် ယနေ့ (အောက်တိုဘာ ၁၁ ရက်) ခွင့်ပြုချက်ရတဲ့ Bharat Bikotech ရဲ့ ဆေးဟာ အိန္ဒိယမှာ ကလေးတွေကိုထိုးပေးရန် ပထမဆုံး ခွင့်ပြုချက်ရ COVID-19 ကာကွယ်ဆေးဖြစ်လာပါတယ်။ ထိုကာကွယ်ဆေးကို အသက် ၂ နှစ်မှ ၁၈ နှစ်အရွယ် အုပ်စုအတွက် စမ်းသပ်မှုအချက်အလက်တွေအပေါ် သုံးသပ်ပြီးနောက် ထောက်ခံခွင့်ပြုချက်ပေးခဲ့ကြောင်း သိရပါတယ်။



(Photo: Reuters)

အိန္ဒိယက နိုင်ငံလူဦးရေ ၁.၄ ဘီလီယံနီးပါးအနက် အရွယ်ရောက်ပြီးသူ သန်း ၉၅၀ ကျော်ကို ကာကွယ်ဆေးထိုးပေးပြီး ဖြစ်ပါတယ်။ Bharat Biotech က ထုတ်လုပ်တဲ့ Covaxin ဆေးဟာ အိန္ဒိယအစိုးရက အရွယ်ရောက်ပြီးသူတွေကို ထိုးပေးနေတဲ့ COVID-19 ကာကွယ်ဆေး သုံးမျိုးထဲမှာလည်း ပါဝင်ပါတယ်။

အိန္ဒိယမှာ Covaxin ကာကွယ်ဆေး သန်း ၁၁၀ ကျော် ထိုးပေးခဲ့ပြီးဖြစ်ကာ Bharat Biotech က ကမ္ဘာ့ကျန်းမာရေးအဖွဲ့အစည်း (World Health Organization - WHO) ထံမှ အရေးပေါ်သုံးအဖြစ် ထောက်ခံချက်ရရှိရန် ဆောင်ရွက်ထားပြီး ယခုလနှောင်းပိုင်းမှာ ဆုံးဖြတ်သွားမယ်လို့ မျှော်လင့်ထားပါတယ်။ Bharat Biotech က ပြီးခဲ့တဲ့ ဇွန်လအတွင်း Covaxin ကာကွယ်ဆေးကို ကလေးတွေမှာစမ်းသပ်မှု စတင်ခဲ့တာဖြစ်ပါတယ်။

(Photo: Reuters)

အသက် ၂ နှစ်မှ ၁၈ နှစ်အရွယ် အုပ်စုမှာ စမ်းသပ်မှုအချက်အလက်တွေကို Central Drugs Standard Control Organisation နဲ့ Subject Expert Committee တို့က သုံးသပ်ခဲ့ကြပြီး ၎င်းတို့က ထောက်ခံချက်များပေးခဲ့ကြတယ်လို့ Bharat Biotech က Reuters သတင်းဌာနကို ပြောပါတယ်။

Bharat Biotech က ၎င်းတို့ရဲ့ ကာကွယ်ဆေးကို ကလေးတွေမှာ အသုံးပြုမှုနဲ့ပတ်သက်ပြီး ထိရောက်မှုနဲ့ ဘေးကင်းမှုဆိုင်ရာ အချက်အလက်တွေကို လူသိရှင်ကြား ထုတ်ပြန်ထားခြင်း မရှိသေးပါဘူး။ နောက်ထပ် အိန္ဒိယ ဆေးဝါးထုတ်လုပ်ရေးကုမ္ပဏီတစ်ခုဖြစ်တဲ့ Zydus Cadila ရဲ့ DNA အခြေခံ ကာကွယ်ဆေးတစ်မျိုးကိုတော့ အနည်းဆုံး အသက် ၁၂ နှစ်အရွယ် ကလေးတွေအတွက် အရေးပေါ်သုံးအဖြစ် အိန္ဒိယက ခွင့်ပြုထားကြောင်းလည်း သိရပါတယ်။

Share

က္က