မန်ချက်စတာစီးတီးနောက်ခံကစားသမား ကိုင်လီဝေါ်ကာဟာ ပြီးခဲ့တဲ့ဗုဒ္ဓဟူးနေ့က လီဗာပူးအသင်းနဲ့ လက်စတာစီးတီးအသင်းတို့ပွဲစဉ်မှာ သရေရလဒ်ထွက်ပေါ်ခဲ့ပြီးနောက် လီဗာပူးအသင်းကို တွစ်တာပေါ်မှာ လှောင်ပြောင်တဲ့ပို့စ်တစ်ခုကို တင်ခဲ့ပါတယ်။

ဒါပေမယ့် မာနေးရဲ့ အစောပိုင်းသွင်းဂိုးကို ဟယ်ရီမက်ဂွိုင်းယားက ပြန်လည်ချေပနိုင်ခဲ့ပြီး လီဗာပူးအသင်းဟာ အိမ်ကွင်းအန်းဖီးလ်မှာ သရေရလဒ်နဲ့သာ ကျေနပ်ခဲ့ရတာဖြစ်ပါတယ်။ သရေကျခဲ့ပေမယ့် လီဗာပူးအသင်းဟာ မန်စီးတီးအသင်းကို ၅ မှတ်ဖြတ်ထားနိုင်ဆဲဖြစ်ပေမယ့် မန်စီးတီးနောက်ခံကစားသမား ကိုင်လီဝေါ်ကာက ဖလားလုဘက်ဖြစ်တဲ့ လီဗာပူးအသင်းကို ရည်ရွယ်ပြီး လှောင်ပြောင်ခဲ့ပါတယ်။

ကိုင်လီဝေါ်ကာဟာ တွစ်တာမှာ လီဗာပူးအသင်းကို လှောင်ပြောင်သရော်ထားတဲ့ ပို့စ်တင်ပြီး မကြာမီမှာပဲ လျင်လျင်မြန်မြန် ပြန်ဖျက်သွားခဲ့ပေမယ့် တွစ်တာအသုံးပြုသူတော်တော်များများက မြင်တွေ့ခဲ့ပါတယ်။ ဝေါ်ကာက ကမ္ဘာ့ဖလားပြိုင်ပွဲတုန်းက ဟယ်ရီမက်ဂွိုင်းယားနဲ့ ၎င်းရဲ့ချစ်သူတို့ စကားပြောနေတဲ့ပုံကို အသုံးပြုပြီး ‘ပုံမှန်အားဖြင့် သူတို့တွေ ၇ မှတ်အသာနဲ့ ဦးဆောင်နိုင်တော့မယ်လို့ တွေးခဲ့မိမှာပဲ’ဆိုတဲ့ စာသားနဲ့ တွဲတင်ခဲ့တာဖြစ်ပါတယ်။