COVID-19 ကပ်ရောဂါဗိုင်းရပ်စ် ကူးစက်ဖြစ်ပွားမှုအတွင်း mask တပ်ခြင်းနဲ့ ပတ်သက်ပြီး ကမ္ဘာ့ကျန်းမာရေးအဖွဲ့အစည်း (World Health Organization - WHO) က လမ်းညွှန်မှု ပြင်ဆင်ပြောင်းလဲလိုက်ပါတယ်။
ဆေးဘက်ဆိုင်ရာသုံး surgical mask တွေဟာ ကျန်းမာရေးဝန်ထမ်းတွေအတွက် ဦးစားပေးဖြစ်သင့်ကြောင်း၊ သို့သော် ဗိုင်းရပ်စ်ကူးစက်မှုလျှော့ချရန် နည်းလမ်းတစ်ခုအဖြစ် အများပြည်သူအနေနဲ့ ပိတ်စ mask များ သို့မဟုတ် အိမ်မှာပင် ဖန်တီးထားတဲ့ မျက်နှာကို ဖုံးအုပ်စရာများ အသုံးပြုသင့်ကြောင်း WHO က ဧပြီ ၃ ရက်နေ့မှာ ပြောကြားလိုက်ပါတယ်။
WHO ရဲ့ ယခု ပြောကြားမှုဟာ COVID-19 ကပ်ရောဂါ ကာလအတွင်း ယခင် အကြံပြုချက်ကို အဓိကကျတဲ့ ပြင်ဆင်ပြောင်းလဲမှု ဖြစ်လာပါတယ်။ COVID-19 ဗိုင်းရပ်စ်ဟာ လေထဲကနေ ကူးစက်ပျံ့နှံ့တဲ့ ဖြစ်နိုင်ခြေအချို့ရှိခဲ့ကြောင်းလည်း WHO အကြီးတန်း တာဝန်ရှိသူတစ်ဦးက သတင်းထောက်တွေကို ပြောပါတယ်။
သို့သော် ကူးစက်ပျံ့နှံ့မှုဟာ အဓိက အကြောင်းရင်းဟာ ရောဂါလက္ခဏာများရှိနေသူတွေက ချောင်းဆိုးခြင်းနဲ့ နှာချေခြင်း၊ ဗိုင်းရပ်စ်ရှိနေတဲ့ အရာဝတ္တုပစ္စည်း မျက်နှာပြင်များဖြစ်တယ်လို့ ဆိုပါတယ်။ သိပ္ပံပညာရှင်တွေက mask တပ်ခြင်းဟာ ဗိုင်းရပ်စ်ကူးစက်မှု ဟန့်တားရာမှာ ကောင်းကျိုးသက်ရောက်မှုရှိကြောင်း ထောက်ပြလာခဲ့ကြပြီး ဥရောပနိုင်ငံတွေမှာလည်း လူအများကြားသွားလာပါက နှာခေါင်းနဲ့ပါးစပ်ကို ဖုံးအုပ်ထားရန်လိုကြောင်း ပြောထားပါတယ်။
COVID-19 ဗိုင်းရပ်စ်ဟာ ချောင်းဆိုး၊ နှာချေခြင်းဖြင့်သာမကဘဲ စကားပြောခြင်း သို့မဟုတ် အသက်ရှူခြင်းဖြင့်ပင် ကူးစက်ပျံ့နှံ့နိုင်ကြောင်း သုတေသနရလဒ်က ဖော်ပြတယ်လို့ National Academy of Sciences (NAS) သိပ္ပံပညာရှင်အဖွဲ့က အမေရိကန်သမ္မတအိမ်ဖြူတော်ကို ဗုဒ္ဓဟူးနေ့ (ဧပြီ ၁ ရက်) ညမှာ ပြောကြားခဲ့ပြီး အများပြည်သူအနေနဲ့ mask တပ်သင့်ကြောင်း အကြံပြုခဲ့ပါတယ်။
(Photo: Reuters)
အမေရိကန်သမ္မတအိမ်ဖြူတော်ရဲ့ COVID-19 တိုက်ဖျက်ရေးလုပ်ငန်းအဖွဲ့မှ အဓိက အဖွဲ့ဝင်တစ်ဦးဖြစ်သူ ဒေါက်တာ Anthony Fauci ကလည်း အမေရိကန်တွေအနေနဲ့ လူအများကြား သွားလာခဲ့ပါက မျက်နှာကို ဖုံးအုပ်ထားသင့်ကြောင်း ဧပြီ ၃ ရက်နေ့မှာ ပြောခဲ့ပါတယ်။ သို့သော် တတ်နိုင်သမျှ နေအိမ်မှာပင် နေကြရန် ၎င်းက တိုက်တွန်းခဲ့ပါတယ်။
နယူးယော့ခ်မြို့တော်ဝန် Bill de Blasio ကတော့ မြို့ခံများအားလုံး နေအိမ်ပြင်ပသွားလာချိန်မှာ ၎င်းတို့ရဲ့ မျက်နှာတွေကို ဖုံးအုပ်ထားကြရန် ဧပြီ ၂ ရက်နေ့မှာ တိုက်တွန်းထားခဲ့ပါတယ်။ "ရှင်းအောင်ပြောရရင် ဒါက မျက်နှာကို ဖုံးအုပ်ထားတာပါ၊ လည်စည်းပဝါတစ်ခုလည်း ဖြစ်နိုင်ပါတယ်၊ ကိုယ့်ဘာသာ အိမ်မှာ ဖန်တီးထားတဲ့ တစ်ခုခုလည်း ဖြစ်နိုင်တာပဲ၊ လက်ကိုင်ပဝါအကြီးတစ်ခုနဲ့လည်း မျက်နှာကိုဖုံးထားနိုင်တာပါပဲ" လို့ မြို့တော်ဝန်က သတင်းထောက်တွေကို ပြောပါတယ်။
Source: Reuters, SCMP, Washington Post