အနုပညာသက်တမ်း ဆယ်စုနှစ်ကျော်ကြာမြင့်ခဲ့ပြီဖြစ်တဲ့ သရုပ်ဆောင် မေသန်းနုက လူငယ်ပရိသတ်တွေရဲ့ အားပေးမှုတွေကြောင့် ဝမ်းသာပီတိဖြစ်မိတယ်လို့ ဆိုပါတယ်။

‘’မဆင့်တို့ အရွယ် ပရိသတ်တွေအားလုံးကတော့ ကြီးကုန်ပြီပေါ့နော်။ မဆင့်တို့ကို တွေ့တဲ့အခါကျရင် ဟာ..ရန်အောင်၊ မေသန်းနု ဆိုပြီးတော့ တွဲခေါ်ကြတယ်။ အခု Fan တွေကို ကြည့်လိုက်တော့ သြော် ... ငါလည်း နောက်လူငယ်တွေအတွက် ပရိသတ်ရှိနေပါ့လားလို့ပေါ့နော်။ သူတို့ကိုလည်း အများကြီး ကျေးဇူးတင်ပါတယ်။ သူတို့ အရွယ်မှာဆိုရင် မင်းသမီးငယ်ငယ်လေးတွေ အများကြီးကို အားပေးမှာပေါ့နော်။ ဒါပေမယ့် ကိုယ့်ကိုချစ်တဲ့စိတ် တစ်ခုတည်းနဲ့ မဆင့်ကို အားပေးကြတယ်လို့ သတ်မှတ်ပါတယ်’’ လို့ သူကဆိုပါတယ်။

မေသန်းနုဟာ တစ်ချိန်က အနုပညာလှုပ်ရှားမှုတွေ ဆောင်ရွက်ခဲ့တဲ့ ပုံတွေမြင်ရင် ကိုယ့်ကိုယ်ကိုယ် မလှဘူးလို့ ထင်တဲ့အကြောင်း ပြောပါတယ်။ ဒါပေမယ့် သူမကို ချစ်တဲ့ ပရိသတ်တွေကတော့ ချစ်မြဲ ချစ်နေကြတာကို တွေ့ရပါတယ်။

ဒီနေ့ ခေတ်အနေအထားနဲ့ ဖက်ရှင်ရေးရာ ကဏ္ဍမှာလည်း မေသန်းနု ဖက်ရှင်ဆိုပြီးတော့ တစ်ခေတ်ပြန် အောင်မြင်လာခဲ့တာကို တွေ့ရပါတယ်။ ဒီ အတွက် မေသန်းနုကလည်း ခေတ်ရေစီးကြောင်းအပေါ် သူမရဲ့ ယူဆချက် တစ်ခုကို အခုလိုပြောပြလာပါတယ်။

‘’ ဒီလိုပါပဲ။ ခေတ် တစ်ခေတ်ကတော့ လည်ပတ်နေတာပါပဲ။ မဆင့် တို့လည်း အရင်ခေတ်က မင်းသမီးတွေကို အားကျပြီး အတုယူခဲ့ရတာပေါ့နော်။ ဘယ်လောက်ပဲ ခေတ်မီနေပါစေ အဲဒီခေတ် တစ်ခေတ်ကိုတော့ ပြန်ရောက်လာတာပါပဲ။ အများကြီး ဆန်းသစ် တီထွင်လို့မှ မရတာ ဒီလိုပဲ လည်ပတ်ပြီးတော့ လုပ်နေကြတာပါပဲ။ သိပ်ပြီးတော့ မထူးဆန်းပါဘူး’’ လို့ ဆိုပါတယ်။

သရုပ်ဆောင် မေသန်းနု(May Than Nu) ဟာ အနုပညာလောကမှာ ဆယ်စုနှစ်များစွာ အောင်မြင်မှုများနဲ့ ရပ်တည်နိုင်ခဲ့ပြီး အခုချိန်ထိလည်း ပရီသတ်အားပေးမှုရနေတဲ့ သရုပ်ဆောင်တစ်ဦးပါ။ မေသန်းနုကို သင်္ကြန်မိုး ရုပ်ရှင်ဇာတ်ကားကနေ ပရိသတ်တွေ စတင်သိရှိခဲ့တာ ဖြစ်ပါတယ်။