Ei Ei Myat

"ထာဝရအမေ" ရုပ်ရှင်ဇာတ်ကားကြီးနဲ့ အကယ်ဒမီဆုကို  ပိုင်ဆိုင်ခဲ့တဲ့ ဒါရိုက်တာ စင်ရော်မောင်မောင်က ဖခင်မေတ္တာကို ဖော်ကျူးမယ့် ဇာတ်ကားတစ်ကားကို မကြာခင် ပုံဖော်တော့မှာပါ။ဖခင်တွေရဲ့ အနှိုင်းမဲ့ မေတ္တာကို ဖော်ကျူးမယ့် "ထာဝရအဖေ" ရုပ်ရှင်ကို အသည်းဆရာကြီး ပါမောက္ခဒေါက်တာ ခင်မောင်ဝင်းနဲ့ တိုင်ပင်ပြီး အကောင်းဆုံးဖြစ်အောင် လုပ်သွားမယ်လို့ ဆိုပါ တယ်။

36967592_10214908203612273_2002479431758643200_n.jpg

Photo : စင်ရော်မောင်မောင် FB

 

"ထာဝရအမေ" ရုပ်ရှင်ဇာတ်ကားကြီးကို ပုံဖော်ရိုက်ကူးခဲ့တဲ့ ဒါရိုက်တာ စင်ရော်မောင်မောင်ဟာ ဖခင်မေတ္တာကို ထပ်မံဖော်ကျူးဦးမယ်လို့ သိရပါတယ်။ ဖခင်တွေရဲ့ အနှိုင်းမဲ့ မေတ္တာကို ဖော်ကျူးထားတဲ့ "အဖေ" ဆိုတဲ့ ရုပ်ရှင်ဇာတ်ကားကြီးကို စင်ရော်ရုပ်ရှင်ထုတ်လုပ်ရေးက ရိုက်ကူးထုတ်လုပ်သွားဦးမယ်လို့ စင်ရော်မောင်မောင်က ဆိုပါတယ်။

"သားသမီးတွေအတွက် တန်ဖိုးမဖြတ်နိုင်တဲ့ မြင့်မိုရ်ရွှေတောင်နှင့်တူသော အဖေသားသမီးတွေအတွက် စင်္ကြာဝဠာကြီးနှင့်တူသော အဖေ သားသမီးတွေ အတွက် မဟာသူရဲကောင်း အဖေ၊သားသမီးတွေရဲ့ စံပြအဖေ သားသမီးတွေ ထာဝရ ဂုဏ်ယူနေရတဲ့ အဖေ၊ သားသမီးတွေ အတွက် ပေးဆပ်မှုသက်သက်သာရှိသော အဖေ၊ သားသမီးတွေအတွက် ထာဝရ လုံခြုံမှုကိုပေးသော အဖေ ဖခင်တစ်ဦး၏ အနှိုင်းမဲ့ မေတ္တာကို ဖော်ကျူးသော ရုပ်ရှင် ဇာတ်ကားကြီးတစ်ကားကို မကြာမီ ရိုက်ကူးတော့မှာ ဖြစ်ပါသည်။" ဆိုပြီး ဇူလိုင်(၁၃) ရက်နေ့က စင်ရော်မောင်မောင်ရဲ့ ဖေ့စ်ဘွတ်မှာ ပြောထားပါတယ်။

26167358_10213274051279486_5661220698356546392_n.jpg

Photo : စင်ရော်မောင်မောင် FB

သားအတွက် မွေးနေ့အလှူလုပ်ပေးနေတဲ့ စင်ရော်မောင်မောင်နဲ့ မေသန်းနု 

ထာဝရအဖေ ရုပ်ရှင်ဇာတ်ကားကို စင်ရော်ရုပ်ရှင်ထုတ်လုပ်ရေး အသည်းဆရာဝန်ကြီး ပါမောက္ခဒေါက်တာ ခင်မောင်ဝင်းနဲ့ ပူးပေါင်းပြီး အကောင်းဆုံး ရိုက်ကူးထုတ်လုပ်နိုင်ဖို့ စတင်ဆောင်ရွက်နေပြီလို့ သူက ဆိုပါတယ်။ အဖေ ရုပ်ရှင်ဇာတ်ကားကြီးအတွက် ဇာတ်ညွှန်းရေး ဆရာ နဲ့ အကောင်းဆုံး ဖြစ်အောင် ဇာတ်လမ်းရေးသားနေပြီဖြစ်တယ်လို့လည်း စင်ရော်မောင်မောင်က ဆက်လက်ရေးသားထားပါတယ်။

ထာဝရအမေဇာတ်ကားကြီးဟာ ဆရာကြီး ဒေါက်တာ ခင်မောင်ဝင်းရဲ့ ဖြစ်ရပ်မှန်ကို ပြန်လည်ရိုက်ကူးထားတာပါ။ အဲဒီဇာတ်ကားမှာ နေတိုး၊ ဝတ်မှုံရွှေရည်နဲ့ မေသန်းနုတို့က အဓိက ပါဝင်သရုပ်ဆောင်ထားကြပြီး မိခင်ရဲ့မေတ္တာကို ဖော်ကျူးနိုင်တဲ့ ဇာတ်ကားကောင်းတစ်ကားအဖြစ် ပရိသတ်က အသိအမှတ်ပြုထားပါတယ်။

24774821_10213055348092043_1032555373913173857_n.jpg

Photo : စင်ရော်မောင်မောင် FB

 

ပရိသတ်တွေ အသိအမှတ်ပြုခဲ့ကြသလို ဒါရိုက်တာ စင်ရော်မောင်မောင်ဟာ ၂၀၁၇ခုနှစ်မှာ "ထာဝရအမေ" ရုပ်ရှင်ဇာတ်ကားနဲ့ ဒါရိုက်တာဆု ကို ရရှိခဲ့ပါတယ်။ဒါရိုက်တာ စင်ရောက်မောင်မောင်က ၁၉၉၄ ခုနှစ်မှာ "တပြည်သူမရွှေထား" ရုပ်ရှင်ဇာတ်ကားကြီးနဲ့ အကောင်းဆုံး ဒါရိုက်တာဆုကို ရရှိခဲ့ပြီး ၂၀၀၄ ခုနှစ်မှာ "လျှို့ဝှက်သောနှင်း" ရုပ်ရှင်ဇာတ်ကားနဲ့ အကောင်းဆုံး ဒါရိုက်တာဆုကို ရရှိခဲ့ပါတယ်။

ဒါ့အပြင် စင်ရော်မောင်မောင် ပိုင်ဆိုင် တဲ့ စင်ရော်ထုတ်လုပ်ရေးကလည်း ၁၉၉၄ မှာ တပြည်သူမရွှေထား၊ ၂၀၀၄ မှာ လျှို့ဝှက်သောနှင်းနဲ့ ၂၀၀၉ ခုနှစ်မှာ ကြိုးကြားတောင် ပံခတ်သံတို့ဖြင့် ဇာတ်ကားဆု ၃ ဆု ရရှိခဲ့ပါတယ်။ ဒါကြောင့် အခု ဒါရိုက်တာဆုနဲ့ဆိုရင် စင်ရော်မောင်မောင် ဟာ ဒါရိုက်တာဆု ၃ ဆု၊ ဇာတ်ကားဆု ၃ ဆု၊ စုစုပေါင်း အကယ်ဒမီဆု ၆ ဆု ပိုင်ဆိုင်ထားပါပြီ။


Duwun ဒီဂျစ်တယ် နေ့စဉ်သတင်းစာ

သင့် အီးလ်မေး ကနေ နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ ဒီနေရာမှာ စာရင်းသွင်းလိုက်ပါ။


Copyright © 2019 Duwun.

Privacy Policy | About Us | Jobs

က္က