ဘောလိဝုဒ်စတား မင်းသားကြီး အမီတာဘချန်းဟာ COVID-19 ကုသမှုခံယူခဲ့ပြီးနောက် ပြန်လည်သက်သာလာခဲ့ကာ ဆေးရုံမှဆင်းခဲ့ပြီလို့ သိရပါတယ်။

၎င်းအတွက် ဆုတောင်းပေးကြတဲ့ ပရိသတ်များနဲ့ တက်ရောက်ကုသမှုခံယူခဲ့တဲ့ မွမ်ဘိုင်းမြို့ရှိ Nanavati ဆေးရုံမှ ဝန်ထမ်းများရဲ့ အကောင်းဆုံး ပြုစုစောင့်ရှောက်မှုအတွက် မင်းသားကြီးက ကျေးဇူးတင်ခဲ့ပါတယ်။ ဘချန်းရဲ့သားဖြစ်သူ အသက် ၄၄ နှစ်အရွယ် မင်းသား အဘီရှက်ကတော့ COVID-19 စစ်ဆေးတွေ့ရှိရဆဲဖြစ်ပြီး ဆေးရုံမှာ ဆက်လက်ကုသမှုခံယူနေပါတယ်။

(သားဖြစ်သူ အဘီရှက်၊ မြေးမလေး Aaradhyaနဲ့ ဘချန်း) (Photo: Times of India)

မင်းသားကြီးဘချန်းရဲ့ ချွေးမနဲ့ မြေးမဖြစ်သူ (အဘီရှက်ရဲ့ ဇနီးနဲ့သမီး) တို့လည်း COVID-19 ကူးစက်ခံခဲ့ရပြီး ဆေးရုံတက်ကုသမှု ခံယူခဲ့ရပါတယ်။ မင်းသားအဘီရှက်ရဲ့ ဇနီးဖြစ်သူ ကမ္ဘာ့အလှမယ်ဟောင်းနဲ့ ဘောလိဝုဒ်စတား မင်းသမီး အသက် ၄၆ နှစ်အရွယ် အက်ရှ်ဝါရာရိုင်းဘချန်းနဲ့ သမီး Aaradhya တို့ကတော့ ဇူလိုင်လကုန်ပိုင်းမှာ COVID-19 မတွေ့ရတော့ဘဲ ဆေးရုံမှဆင်းကာ နေအိမ်မှာ အသွားအလာကန့်သတ် နေထိုင်လျက်ရှိတယ်လို့ ဆိုပါတယ်။

(အက်ရှ်ဝါရာရိုင်း မိသားစု) (Photo: Hindustan Times)

မင်းသားကြီးဘချန်းဟာ ၁၉၇၀ ပြည့်လွန်နှစ်များမှာ အောင်မြင်ကျော်ကြားလာခဲ့ပြီး ရုပ်ရှင်နဲ့ပတ်သက်တဲ့ ထူးချွန်ဆု ၁၉ ခုထက်မနည်း ရရှိခဲ့ပါတယ်။ ဒါ့အပြင် ပြင်သစ်နိုင်ငံကလည်း ဘချန်းကို ရုပ်ရှင်လုပ်ငန်းမှာ ၎င်းရဲ့ပါဝင်ဆောင်ရွက်မှုအတွက် အရပ်သားများကို ရွေးချယ်ပေးအပ်တဲ့ အမြင့်ဆုံး ဂုဏ်ထူးဆောင်ဆု ' Legion of Honour' ဆု ချီးမြှင့်ခဲ့ကြောင်း သိရပါတယ်။ အိန္ဒိယမှာ လတ်တလော COVID-19 ကူးစက်မှုတွေ မြင့်တက်နေပြီး ကမ္ဘာတစ်ဝန်း တတိယမြောက် ကူးစက်မှုအများဆုံး နိုင်ငံဖြစ်ပါတယ်။

(COVID-19 ကူးစက်ခံရသည့် ပြည်ထဲရေးဝန်ကြီး Amit Shah) (Photo: Reuters)

လက်ရှိအချိန်အထိ အိန္ဒိယမှာ ကူးစက်ခံရသူ ၁.၇ သန်းကျော်နဲ့ သေဆုံးသူ ၃၇,၀၀၀ ကျော်ရှိခဲ့ပါတယ်။ အိန္ဒိယရဲ့ စီးပွားရေးမြို့တော် မွမ်ဘိုင်းမြို့ဟာ ကူးစက်မှုဖြစ်ပွားမှု အဆိုးဆုံးနေရာ ဖြစ်ပါတယ်။ သို့သော် အင်ဒရာပရာဒက်ရှ်၊ တီလန်ဂါနာနဲ့ အာဆမ်တို့မှာလည်း ကူးစက်မှုတွေ လျင်မြန်စွာ မြင့်တက်နေတယ်လို့ ဆိုပါတယ်။ ထိုအတောအတွင်း အိန္ဒိယပြည်ထဲရေးဝန်ကြီး Amit Shah ဟာ COVID-19 ကူးစက်ခံခဲ့ရပြီး ဆရာဝန်တွေရဲ့ အကြုံပေးမှုအရ ဆေးရုံတက်ကုသမှုခံယူနေကြောင်း သိရပါတယ်။