COVID-19 ကို ကုသရာမှာ စတီးရွိုက် ပမာဏအနည်းငယ်ဖြင့် ကုထုံးက ကြီးမားတဲ့ အောင်မြင်မှုဖြစ်ခဲ့ပါတယ်။
Ko John

ဈေးသက်သာပြီး ပေါ‌‌ပေါများများ ရရှိနိုင်တဲ့ စတီးရွိုက် (Steroid) ဆေးတစ်မျိုးက အပြင်းအထန် နာမကျန်းဖြစ်နေတဲ့ COVID-19 လူနာတွေကို အသက်ကယ်ရန် ကူညီနိုင်ကြောင်း တွေ့ရှိရပါတယ်။

(Photo: Getty Images)

ဗြိတိန် ကျွမ်းကျင်သူတွေရဲ့ အဆိုအရ COVID-19 ကို ကုသရာမှာ စတီးရွိုက် ပမာဏအနည်းငယ်ဖြင့် ကုထုံးက ကြီးမားတဲ့ အောင်မြင်မှုဖြစ်ခဲ့တယ်လို့ သိရပါတယ်။ ဗြိတိန်ငွေ ၅ ပေါင် (မြန်မာကျပ်ငွေ ၉,၀၀၀ နီးပါး) မျှသာပေးရတဲ့ စတီးရွိုက်ဆေး Dexamethasone က ရောဂါပြင်းထန်ပြီး အသက်ရှူစက်တပ်ထားရတဲ့ COVID-19 လူနာတွေကို သေဆုံးနိုင်ခြေ သုံးပုံတစ်ပုံကို လျှော့ချနိုင်ခဲ့ပါတယ်။

ထို့အတူ အောက်စီဂျင်ပေးထားရတဲ့ အတန်အသင့် ရောဂါပြင်းထန်တဲ့ COVID-19 လူနာတွေမှာလည်း သေဆုံးနိုင်ခြေကို ငါးပုံတစ်ပုံ လျှော့ချနိုင်တယ်လို့ ဆိုပါတယ်။ စမ်းသပ်ကုသမှုအရ Dexamethasone က အသက်ရှူကိရိယာတပ်ထားရတဲ့ လူနာ ၈ ဦးမှာ ၁ ဦးကို အသက်ကယ်နိုင်ခဲ့ပြီး အောက်စီဂျင်ပေးထားရတဲ့ လူနာ ၂၅ ဦးမှာ ၁ ဦးကို အသက်ကယ်နိုင်ခဲ့ကြောင်း တွေ့ရပါတယ်။

ဗြိတိန်မှာ COVID-19 စတင်ဖြစ်ပွားချိန်မှစပြီး အဆိုပါဆေးဖြင့် ကုသခဲ့ပါက လူ ၅,၀၀၀ အထိကို အသက်ကယ်နိုင်ခဲ့မယ်လို့လည်း သုတေသီတွေက ခန့်မှန်းခဲ့ကြပါတယ်။ Dexamethasone ဆေးဟာ ဈေးသက်သာပြီး COVID-19 လူနာအရေအတွက် များပြားမှုကြောင့် ရုန်းကန်နေရတဲ့ ဆင်းရဲတဲ့နိုင်ငံတွေအတွက် ကြီးမားစွာ အကျိုးပြုနိုင်ပါတယ်။

Dexamethasone ကို ထိုးဆေးတစ်ကြိမ် သို့မဟုတ် တစ်နေ့တစ်ကြိမ် သောက်ဆေးအဖြစ် အသုံးပြုနိုင်ပြီး COVID-19 ကုသနိုင်တဲ့ ပထမဆုံးဆေးအဖြစ် ကျွမ်းကျင်သူတွေက တွေ့ရှိလာခဲ့ပါတယ်။ ပုံမှန်အားဖြင့် အဆိုပါဆေးကို ဓာတ်မတည့်မှုများ၊ အရေပြားရောဂါများ၊ အူမကြီးရောင်ရမ်းမှု၊ အဆစ်ရောင်ရောဂါ၊ ကိုယ်ခံအားစနစ်က အလွန်အကျွံ တုံ့ပြန်ပြီး ပုံမှန်ဆဲလ်တွေကိုပါ တိုက်ခိုက်တဲ့ lupus နာတာရှည်ရောဂါနဲ့ အရေပြားဆဲလ်များ ပုံမှန်ထက် ပိုမိုလျင်မြန်စွာ တိုးပွားလာတဲ့ psoriasis ရောဂါတို့အတွက် ဆရာဝန်ညွှန်ကြားချက်ဖြင့် လူနာတွေကို ပေးလေ့ရှိပါတယ်။

(Photo: Daily Mail)

ရောင်ရမ်းမှုသက်သာစေရန် အသုံးပြုနေတဲ့ Dexamethasone က COVID-19 ဖြစ်စေတဲ့ ကိုရိုနာဗိုင်းရပ်စ်ကို ကိုယ်ခံအားစနစ်က အလွန်အကျွံ တုံ့ပြန်ရာမှ ကိုယ်တွင်းအင်္ဂါများ ရောင်ရမ်းပျက်စီးမှုအချို့ကို ဟန့်တားပေးနိုင်ကြောင်း ကျွမ်းကျင်သူတွေက တွေ့ရှိခဲ့ကြပါတယ်။ ကိုယ်ခံအားစနစ်က ဗိုင်းရပ်စ်ကို အလွန်အကျွံ တုံ့ပြန်မှုကို cytokine storm လို့ ခေါ်ဝေါ်ပြီး ထိုအခြေအနေကြောင့် COVID-19 လူနာတွေ သေဆုံးစေနိုင်တာ ဖြစ်ပါတယ်။

အောက်စ်ဖို့တက္ကသိုလ်မှ အဖွဲ့တစ်ဖွဲ့က ဆေးရုံတက်နေရတဲ့ COVID-19 ၂,၀၀၀ ခန့်ကို Dexamethasone ဖြင့် စမ်းသပ်ကုသခဲ့ပြီး ထိုဆေးမပေးခဲ့တဲ့ လူနာ ၄,၀၀၀ နီးပါးနဲ့ နှိုင်းယှဥ်လေ့လာခဲ့ကြကြောင်း သိရပါတယ်။ လေ့လာမှုအရ အသက်ရှူစက်တပ်ထားရတဲ့ လူနာတွေမှာ သေဆုံးမှုအန္တရာယ်ကို ၄၀ ရာခိုင်နှုန်းမှ ၂၈ ရာခိုင်နှုန်းသို့ လျှော့ချနိုင်ခဲ့ကြောင်း BBC သတင်းက ဖော်ပြပါတယ်။

(Photo: Photo: Adrian Dennis/AFP via Getty Images)

ထို့အတူ အောက်စီဂျင်ပေးထားရတဲ့ COVID-19 လူနာတွေမှာလည်း သေဆုံးမှုအန္တရာယ်ကို ၂၅ ရာခိုင်နှုန်းကနေ ၂၀ ရာခိုင်နှုန်းသို့ လျှော့ချနိုင်ခဲ့တယ်လို့ ဆိုပါတယ်။ လက်ရှိအချိန်အထိ COVID-19 လူနာတွေကို ကုသရာမှာ Dexamethasone အပြင် နောက်ထပ် အလားအလာရှိတဲ့ ဆေးတစ်မျိုးကတော့ အမေရိကန် ဆေးဝါးနဲ့ ဇီဝနည်းပညာကုမ္ပဏီ Gilead Sciences က ထုတ်လုပ်ထားတဲ့ Remdesivir ဖြစ်ပါတယ်။ COVID-19 လူနာတွေကို Remdesivir ဆေးဖြင့် စမ်းသပ်ကုသရာမှာ ပြန်လည်သက်သာလာရန် ကြာမြင့်ချိန် လျှော့ချနိုင်ပြီး ထိရောက်မှုရှိကြောင်း သိရပါတယ်။


ဆက်စပ်အကြောင်းအရာများ


က္က