ဖိလစ်ပိုင်ဟာ အရှေ့တောင်အာရှမှာ ဒုတိယမြောက် ကူးစက်မှုနဲ့ သေဆုံးမှု အများဆုံးနိုင်ငံလည်း ဖြစ်ပါတယ်။
Ko John

ဖိလစ်ပိုင်နိုင်ငံမှာ ဇွန်လအတွင်း lockdown ဖြေလျှော့ပေးခဲ့ပြီးနောက် COVID-19 ကူးစက်မှုနဲ့ သေဆုံးမှုတွေ သိသာစွာ မြင့်တက်ခဲ့ရာ စစ်ဆေးမှုများ တိုးမြှင့်လုပ်ဆောင်သွားမယ်လို့ အစိုးရက ယနေ့ (ဇူလိုင် ၂၁ ရက်) ပြောကြားလိုက်ပြီး သမ္မတဒူတာတေးက mask မတပ်တဲ့ မည်သူကိုမဆို ဖမ်းဆီးမယ်လို့ ခြိမ်းခြောက်ခဲ့ပါတယ်။

(Photo: Reuters)

ဖိလစ်ပိုင်အစိုးရက တစ်ရက်လျှင် လူဦးရေ ၃၂,၀၀၀ ကနေ ၄၀,၀၀၀ ကို COVID-19 စစ်ဆေးသွားရန် ရည်ရွယ်ထားပြီး လက်ရှိမှာတော့ တစ်ရက်လျှင် လူ ၂၀,၀၀၀ ကနေ ၂၃,၀၀၀ ကို စစ်ဆေးနေကြောင် ကျန်းမာရေးဝန်ကြီး ဖရန်စစ္စကိုဒူကေးက သမ္မတဒူတာတေးနဲ့ အွန်လိုင်းအစည်းအဝေးမှာ ပြောခဲ့ပါတယ်။



ဖိလစ်ပိုင်မှာ လက်ရှိအချိန်အထိ လူဦးရေ ၁.၁ သန်းနီးပါးကို COVID-19 စစ်ဆေးထားပြီးဖြစ်ကာ ဒူတာတေးက လာမယ့်နှစ် ဒုတိယ သုးလပတ်မှာ နိုင်ငံလူဦးရေရဲ့ ဆယ်ပုံတစ်ပုံဖြစ်တဲ့ လူဦးရေ ၁၀ သန်းကို စစ်ဆေးပြီးဖြစ်ရန် ရည်မှန်းထားပါတယ်။ "ကျွန်တော်တို့ နိုင်ငံသားတိုင်းကို မစစ်နိုင်ပါဘူး၊ ဒီလိုစစ်နိုင်တဲ့ နိုင်ငံ မရှိပါဘူး၊ အချမ်းသာဆုံး အမေရိကန်တောင် ဒီလို မလုပ်နိုင်ပါဘူး" လို့ ဖိလစ်ပိုင်ကျန်းမာရေးဝန်ကြီးက ပြောပါတယ်။

(Photo: AFP)

ဖိလစ်ပိုင်ဟာ အရှေ့တောင်အာရှမှာ အင်ဒိုနီးရှားပြီးပါက ဒုတိယမြောက် ကူးစက်မှုနဲ့ သေဆုံးမှု အများဆုံးနိုင်ငံလည်း ဖြစ်ပါတယ်။ ဖိလစ်ပိုင်ကျန်းမာရေးဝန်ကြီးဌာက ယနေ့ ထုတ်ပြန်မှုအရ COVID-19 ကူးစက်ခံရသူ နောက်ထပ် ၁,၉၅၁ ဦးနဲ့ သေဆုံးသူနှစ်ဦး တိုးလာခဲ့ကြောင်း သိရပါတယ်။ ဖိလစ်ပိုင်မှာ လက်ရှိအချိန်အထိ ကူးစက်ခံရသူ ၇၀,၇၆၄ ဦးနဲ့ သေဆုံးသူ ၁,၈၃၇ ဦးရှိခဲ့ပါတယ်။

ယခုအခါ ဖိလစ်ပိုင်အစိုးရက ကူးစက်ဖြစ်ပွားမှု အဆိုးဆုံး နယ်မြေတွေမှာ lockdown အစီအမံများ ပြန်လည်သတ်မှတ်ထားပါတယ်။ ကမ္ဘာတစ်ဝန်း COVID-19 ကူးစက်ဖြစ်ပွားမှု အဆိုးဆုံး သက်ရောက်မှုကြုံရတဲ့ နိုင်ငံ ၃၀ အနက် ဖိလစ်ပိုင်က စစ်ဆေးမှုနှုန်းအရ နံပါတ် ၂၄ နေရာမှာရှိနေကြောင်း အချက်အလက် ကိန်ဂဏန်းဆိုင်ရာ ဝက်ဘ်ဆိုက် Statista က ဖော်ပြထားပါတယ်။

(Photo: Reuters)

ထိုအတောအတွင်း mask တပ်ရန် သို့မဟုတ် ခပ်ခွာခွာနေရန် စည်းမျဥ်းစည်းကမ်းတွေကို မလိုက်နာသူ မည်သူ့ကိုမဆို ဖမ်းဆီးမယ်လို့ ဖိလစ်ပိုင်သမ္မတ ဒူတာတေးက ခြိမ်းခြောက်ခဲ့ပါတယ်။ ပြီးခဲ့တဲ့ ဧပြီလအတွင်းမှာလည်း lockdown စည်းမျဥ်းတွေကို ချိုးဖောက်သူတွေဟာ ပြဿနာဖြစ်စေမှုအတွက် ပစ်ခတ်ခံရနိုင်တယ်လို့ စကားပြောကြမ်းတဲ့ သမ္မတဒူတာတေးက ပြောဆိုခဲ့ဖူးပါတယ်။

"လူတွေကို ဖမ်းဖို့အတွက် နှောင့်နှေးနေမှာ မဟုတ်ပါဘူး၊ COVID-19 ကူးစက်ပျံ့နှံ့စေမှုက ကြီးလေးတဲ့ ရာဇဝတ်ပြစ်မှုတစ်ခု ဖြစ်တယ်၊ ရဲစခန်းကို ဖမ်းဆီးခေါ်ဆောင်ခံရပြီဆိုရင် တစ်သက်လုံး သင်ခန်းစာရသွားလိမ့်မယ်" လို့ ဒူတာတေးက mask မတပ်သူတွေကို ဖမ်းဆီမယ့်အကြောင်း ခြိမ်းခြောက်ခဲ့ပါတယ်။

(Photo: Reuters)

ပြီးခဲ့တဲ့ သီတင်းပတ်အတွင်း ဖိလစ်ပိုင်မှာ ကျန်းမာရေးဝန်ထမ်းတွေနဲ့ ရဲတပ်ဖွဲ့က ရောဂါလက္ခဏာ မပြင်းထန်သူတွေ သို့မဟုတ် ရောဂါလက္ခဏာ မပြသူတွေကို တစ်အိမ်တစ်ဆင်း လိုက်လံရှာဖွေပြီး သီးခြားခွဲထားမယ့် နေရာတွေမှာ ထားရှိသွားမယ်လို့ အစိုးရတာဝန်ရှိသူတွေက ပြောထားခဲ့ပါတယ်။ ဖိလစ်ပိုင်အစိုးရဲ့ ထိုလုပ်ရပ်အပေါ် လူ့အခွင့်အရေးချိုးဖောက်မှု ဖြစ်နိုင်ကြောင်း စိုးရိမ်ပူပန်မှုတွေလည်း မြင့်တက်ခဲ့ကြောင်း Reuters သတင်းက ဖော်ပြပါတယ်။


ဆက်စပ်အကြောင်းအရာများ


Author

  • Ko John

    Editorial Advisor at Duwun


က္က