ပေါင်ခြံဒဏ်ရာကြောင့် ပြီးခဲ့တဲ့ လီဗန်တေးနဲ့ပွဲမှသာ လူစားဝင်ကစားသမားအဖြစ် ပါဝင်ကစားပေးထားနိုင်ပေ မယ့် လာမယ့် ချန်ပီယံလိဂ် အဖွင့်ပွဲကိုတော့ ပွဲထွက်ပါဝင်လာမယ်လို့ ဇီဒန်းက အတည်ပြုလိုက်တာာပါ။

ဟာဇက်အနေနဲ့ ပြီးခဲ့တဲ့ဇွန်လကမှ ရီးရဲကို ရောက်ရှိလာခဲ့တာ ဖြစ်ပေမယ့် ပေါင်ခြံ ဒဏ်ရာကြောင့် ရီးရဲနဲ့ ပထမဆုံး လာလီဂါပွဲစဉ်ကို ပြီးခဲ့တဲ့ လီဗန်တေးကို အနိုင်ရတဲ့ပွဲမှာ လူစားဝင်အဖြစ် စကစားနိုင်သူလည်း ဖြစ်ပါတယ်။

“ မနက်ဖြန် ဘယ်လိုကစားမလဲ သိနိုင်မှာပါ၊ ဒါပေမယ့် ဟာဇက်ကတော့ အဆင်သင့်ဖြစ်နေပါပြီ။ အခုဆို ကျွန်တော်တို့ လေ့ကျင့်ရေးကောင်းကောင်းမွန်မွန်လုပ်ဆောင်နေပါပြီ။” လို့ ဇီဒန်းက သတင်းစာရှင်းလင်း ပွဲမှာ ပြောသွားတာပါ။

ပီအက်စ်ဂျီနဲ့ရီးရဲ့ အသင်းတို့ကတော့ ချန်ပီယံလိဂ် အုပ်စု (က)မှာ နောက်တစ်ဆင့်တက်ဖို့ ရေပန်းစားနေတဲ့ အသင်းတွေ ဖြစ်ပေမယ့်လည်း နည်းပြဇီဒန်းကတော့ ပီအက်စ်ဂျီအသင်းက ပိုမို ရေပန်းစားကြောင်း ပြောခဲ့ ပါသေးတယ်။

“ ပီအက်စ်ဂျီက ပိုရေပန်းစားပါတယ်၊ သူတို့က တကယ့်အသင်းကြီးပါ၊ သူတို့က အရမ်းကို အန္တရာယ်များတဲ့အသင်းပါ တစ်ခါတရံ မထင်မှတ်တဲ့ ရလဒ်တွေလည်း ပုံဖော်တတ်ပါတယ်။” လို့ ဇီဒန်းက ဆက်လက် ပြောခဲ့ပါတယ်။

ရီးရဲအသင်းကတော့ မနှစ်က ချန်ပီယံလိဂ် ၁၆ သင်းအဆင့်မှာ အေဂျက်ကို အရေးနိမ့်ပြီး ထွက်ခဲ့ရသလို ပီအက်စ်ဂျီကလည်း မန်ယူကို ၁၆ သင်းအဆင့်မှာပင် အရေးနိမ့်ပြီး ထွက်ခဲ့ရတာပါ။