ရုရှားနိုင်ငံမှာ COVID-19 ရောဂါ ကာကွယ်ဆေးထုတ်လုပ်နေမှု အခြေအနေ တိုးတက်လျက်ရှိကြောင်း မတ်လ ၂၃ ရက်နေ့က သတင်းထွက်ပေါ်လာပါတယ်။
Russian Federal Biological Medical Agency (FMBA) ရဲ့ အကြီးအကဲ Veronika Skvortsova က COVID-19 ကာကွယ်ဆေးကို ရုရှားနိုင်ငံရဲ့ လာမယ့် ဆောင်းရာသီကုန် (ဖေဖေါ်ဝါရီလ) မှာ ရရှိနိုင်ကောင်းတယ်လို့ ကြေညာခဲ့ပါတယ်။ FMBA ရဲ့ အဖွဲ့နှစ်ဖွဲ့က မော်စကိုမြို့နဲ့ စိန့်ပီတာစဘတ်မြို့တို့မှာ ကာကွယ်ဆေးစီမံကိန်းကို တစ်ပြိုင်နက် လုပ်ဆောင်နေကြပါတယ်။
"ကာကွယ်ဆေးထုတ်လုပ်မှု အခြေအနေကို ပြောချင်ပါတယ်၊ ကာကွယ်ဆေးထုတ်လုပ်မှုဟာ ပထမအဆင့် အောင်မြင်သွားပါပြီ" လို့ Veronika Skvortsova က TASS သတင်းဌာနကို ပြောခဲ့ပါတယ်။ ကာကွယ်ဆေးစမ်းသပ်မှုနဲ့ တီထွင်ထုတ်လုပ်မှု အဆင့်အားလုံးဟာ ဇွန်လအတွင်း ပြီးမြောက်မှာဖြစ်ပြီး ကာကွယ်ဆေးအသုံးပြုရန် ပြင်ဆင်မှုကတော့ လာမယ့် ဆောင်းရာသီကုန်ခါနီးဝန်းကျင်မှာ အပြီးသတ်မယ်လို့ မျှော်လင့်ထားကြောင်း သူမက ဆိုပါတယ်။
FMBA ဟာ ရုရှားမှာ အများပြည်သူကျန်းမာရေးနဲ့ ဘေးကင်းလုံခြုံမှုကို ကာကွယ်ရန်ဆောင်ရွက်နေပြီ အထူးသဖြင့် ရောဂါထိန်းချုပ်ရေးနဲ့ ကာကွယ်တားဆီးရေးကို တာဝန်ယူထားပါတယ်။ Veronika Skvortsova ဟာ ရုရှားကျန်းမာရေးဝန်ကြီးအဖြစ် ရှစ်နှစ်ကြာ တာဝန်ယူခဲ့ပြီး ယခုနှစ် ဇန်နဝါရီလမှာ ရာထူးမှ နုတ်ထွက်ခဲ့ပါတယ်။
သူမဟာ ၂၀၁၇ ခုနှစ်မှာ ကမ္ဘာ့ကျန်းမာရေးအဖွဲ့ (World Heald Organization - WHO) ရဲ့ ၇၀ ဦးမြောက် ဥက္ကဌအဖြစ် ရွေးချယ်ခံခဲ့ရပါတယ်။ ရုရှားနိုင်ငံမှာ မတ်လ ၂၄ ရက် ညနေပိုင်းအထိ COVID-19 ဗိုင်းရပ်စ်ကူးစက်ခံရသူ ၄၃၈ ဦးရှိပြီး ၁ ဦး သေဆုံးခဲ့ကြောင်းနဲ့ ပြန်လည်သက်သာလာသူ အရေတွက် ၂၀ ဦးဖြစ်ကြောင်း သိရပါတယ်။
ကမ္ဘာတစ်ဝှမ်းမှာတော့ မတ်လ ၂၃ ရက် ညပိုင်းအထိ COVID-19 ဗိုင်းရပ်စ် ကူးစက်ခံရသူ ၃၆၉,၁၆၈ ဦးနဲ့ သေဆုံးသူ ၁၆,၂၈၄ ဦးရှိပြီး ပြန်လည်သက်သာလာသူ အရေအတွက်မှာ ၁၀၀,၉၅၈ ဦးဖြစ်ကြောင်း သိရပါတယ်။ COVID-19 ဆက်စပ်သတင်းတွေအရ ပြီးခဲ့တဲ့ ရက်ပိုင်းအတွင်း အမေရိကန်နဲ့ တရုတ်က ကာကွယ်ဆေးကို လူတွေမှာ ထိုးနှံစမ်းသပ်မှုတွေ စတင်ခဲ့တယ်လို့လည်း သိရပါတယ်။ ကမ္ဘာတစ်ဝှမ်းမှာ COVID-19 ကာကွယ်ဆေး ၂၀ ထက်မနည်း တီထွင်ထုတ်လုပ်ရန် လုပ်ဆောင်နေကြကြောင်း WHO အကြီးအကဲက ပြောထားပါတယ်။