အီရန်တပ်ဖွဲ့တွေရဲ့ ဆက်လက်ရှိနေဆဲ ခြိမ်းခြောက်မှုကို တုံ့ပြန်ရန်အတွက် အမေရိကန်က အရှေ့အလယ်ပိုင်းသို့ နောက်ထပ် တပ်ဖွဲ့ဝင် ၁,၅၀၀ စေလွှတ်သွားမယ်လို့ ခေတ္တ ကာကွယ်ရေးဝန်ကြီးက သောကြာနေ့ (မေ ၂၄ ရက်) မှာ ကြေညာပြောကြားလိုက်ပါတယ်။

(ပင်လယ်ကွေ့ရှိ အမေရိကန် လေယာဉ်တင်စစ်သင်္ဘော USS Abraham Lincoln) (Photo: AFP)

အမေရိကန်သမ္မတ ဒေါ်နယ်ထရန့်ကလည်း အရှေ့အလယ်ပိုင်းသို့ တပ်ဖွဲ့ဝင်များစေလွှတ်မယ်လို့ မေ ၂၄ ရက် အစောပိုင်းမှာ ကြေညာထားခဲ့ကြောင်း သိရပါတယ်။ ယခု တပ်ဖွဲ့ဝင်များ စေလွှတ်မှုဟာ အခြား နေရာတွေနဲ့ နှိုင်းယှဉ်ကြည့်ပါက အရေအတွက်နည်းကြောင်းလည်း ထရန့်က ပြောခဲ့ပါတယ်။

(၂၀၁၈ ခုနှစ် ဒီဇင်ဘာ ၂၆ ရက်နေ့က အီရတ်မှာ အမေရိကန်တပ်ဖွဲ့ဝင်များနှင့် တွေ့ဆုံခဲ့သည့် ထရန့်) (Photo: Reuters)

အမေရိကန်နဲ့ အီရန်နိုင်ငံတို့ကြား ယခုလအတွင်း တင်းမာမှုများ မြင့်တက်နေခဲ့ပြီးနောက် အမေရိကန်က ပင်လယ်ကွေ့ဒေသသို့ USS Abraham Lincoln လေယာဉ်တင်စစ်သင်္ဘော တိုက်ခိုက်ရေးအုပ်စု၊ B-52 ဗုံးကြဲလေယာဉ်တွေ ပါဝင်တဲ့ ဗုံးကြဲတပ်ဖွဲ့၊ ကုန်း ရေနှစ်သွယ် စစ်ဆင်တိုက်ခိုက်နိုင်တဲ့ USS Arlington စစ်သင်္ဘောတို့ကို စေလွှတ်ထားပြီး ပက်ထရီရော့ ဒုံးကျည်ကာကွယ်ရေးစနစ်ကိုလည်း ပို့ဆောင်ထားပြီးဖြစ်ပါတယ်။

(လေယာဉ်တင်စစ်သင်္ဘောပေါ်မှ ပျံတက်သွားသည့် F/A-18F Super Hornet တိုက်လေယာဉ်) (Photo: Reuters)

အီရန် တော်လှန်ရေးအစောင့်တပ်ဖွဲ့ (IRGC) ရဲ့ ခြိမ်းခြောက်မှုတွေရှိနေဆဲဖြစ်ရာ အမေရိကန်တပ်ဖွဲ့ဝင်တွေကို ကာကွယ်ပေးရန်အတွက် လိုအပ်တဲ့ တပ်ဖွဲ့ဝင်များ ထပ်မံ စေလွှတ်ခြင်းဖြစ်တယ်လို့လည်း ၎င်းကဆိုပါတယ်။ IRGC တပ်ဖွဲ့ဟာ အီရန်မှာ အထူးတပ်ဖွဲ့ဖြစ်ပြီး ပြီးခဲ့တဲ့လအတွင်း အမေရိကန်က IRGC ကို ပြည်ပအကြမ်းဖက်အဖွဲ့အစည်းအဖြစ် သတ်မှတ်ခဲ့ကြောင်း BBC သတင်းက ဖော်ပြပါတယ်။