ဥရောပသမဂ္ဂအဖွဲ့ဝင် ၂၇ နိုင်ငံမှာ အသုံးပြုရန် ပထမဆုံး COVID-19 ကာကွယ်ဆေးတစ်မျိုးကို ဥရောပဆေးပညာဌာန (European Medicine Agency - EMA) က ခွင့်ပြုချက်ပေးလိုက်ကြောင်း သိရပါတယ်။
(Photo: Reuters)
EMA က Pfizer-BioNTech ကာကွယ်ဆေးကို ဒီဇင်ဘာ ၂၁ ရက်နေ့မှာ ခွင့်ပြုချက်ပေးလိုက်တာ ဖြစ်ပါတယ်။ Pfizer-BioNTech ကာကွယ်ဆေးကို ဗြိတိန်၊ အမေရိကန်နဲ့ ဆော်ဒီအာရေဗျကဲ့သို့ နိုင်ငံတွေမှာ စတင်ထိုးနှံခဲ့ပြီးနောက် ဥရောပသမဂ္ဂကလည်း ဥရောပဒေသတွင်းရှိ လူဦးရေ ၄၄၆ သန်းအတွက် အဆိုပါ ကာကွယ်ဆေးကို ခွင့်ပြုချက်ပေးလိုက်ပါတယ်။
EMA က ခွင့်ပြုချက်ပေးခဲ့ပြီးနောက် ဥရောပကော်မရှင်က Pfizer-BioNTech ကာကွယ်ဆေးကို တရားဝင် ခွင့်ပြုချက်ပေးခြင်းကို ထိုနေ့နှောင်းပိုင်းမှာပင် ဆောင်ရွက်သွားမယ်လို့ ဆိုပါတယ်။ ဥရောပကော်မရှင် ဥက္ကဌ Ursula von der Leyen က ကာကွယ်ဆေးကို ဒီဇင်ဘာ ၂၁ ရက် ညပိုင်းမှာ တရားဝင် ခွင့်ပြုချက်ပေးသွားမယ်လို့ မျှော်လင့်ကြောင်း သူမရဲ့ Twitte မှာ ရေးသားထားပါတယ်။
ဥရောပသမဂ္ဂရဲ့ EMA က Pfizer-BioNTech ကာကွယ်ဆေးကို အသက် ၁၆ နှစ်နဲ့အထက် လူတွေမှာ အသုံးပြုနိုင်ကြောင်း ပြောခဲ့ပါတယ်။ ဥရောပနိုင်ငံများသို့ Pfizer-BioNTech ကာကွယ်ဆေး ဖြန့်ဖြူးပေးပို့မှုတွေကို အစောဆုံးအဖြစ် လာမယ့် တနင်္ဂနွေနေ့ (ဒီဇင်ဘာ ၂၇ ရက်) မှာ စတင်သွားနိုင်ကြောင်းလည်း သိရပါတယ်။ ဂျာမနီ၊ အီတလီ၊ ပြင်သစ်နဲ့ ဩစတြီးယား အပါအဝင် ဥရောပအဖွဲ့ဝင်နိုင်ငံတွေက ဒီဇင်ဘာ ၂၇ ရက်နေ့မှာ COVID-19 ကာကွယ်ဆေးထိုးနှံမှုအစီအစဥ် စတင်ရန်ပြင်ဆင်ထားတယ်လို့ ပြောထားပါတယ်။
COVID-19 ကြောင့် သေဆုံးသူ ၃၁၁,၀၀၀ ကျော်ရှိခဲ့တဲ့ ဥရောပဒေသမှာ လတ်တလော သီတင်းပတ်များအတွင်း ကူးစက်မှုတွေ သိသိသာသာ မြင့်တက်နေပြီး ဂျာမနီ၊ အီတလီနဲ့ နယ်သာလန်ကဲ့သို့ နိုင်ငံတွေမှာ ခရစ်စမတ်နဲ့ နှစ်သစ်ကူးကာလကို lockdown သတ်မှတ်ချက်များ ထုတ်ပြန်ထားပါတယ်။ ထိုအတောအတွင်း ဗြိတိန်နိုင်ငံမှာ မျိုးဗီဇပြောင်း ကိုရိုနာဗိုင်းရပ်စ်အသစ် ကူးစက်မှုတွေ မထိန်းချုပ်နိုင်ဖြစ်နေခဲ့ရာ ဥရောပနိုင်ငံအများအပြားက ဗြိတိန်မှ လေကြောင်းခရီးစဥ်တွေကို ပိတ်ပင်ထားပါတယ်။